Seekkite qixxaawi. Hatte borro borreessinoonnihu mayiraatiro hedi. Mitto mitto qaale calla ikkikkinni haammata qaalla mitteenni nabbabbanni rosiisiˈri. Nookki qaale ledattokki gede, kubbite saˈˈattokki gede woy wole qaale eessite nabbawattokki gede qorophi. Taxxeessu malaate, uurrinshu malaate, xaˈmote malaatenna wole borrote malaatta seekkite lai.

Mitto mittonka qaale garunni woshshi. Mitto qaale woshshinanni woy coyishiinshanni gara afa hoogittoro, dikshinere laˈˈa, qaddaˈnoonniha macciishsha woy seekke nabbawa dandaanno manchi kaaˈlannohe gede xaˈmiˈra dandaatto.

Xawisse coyiˈri. Coyiˈrattori xawe leellanno gede, umo heeshshi yitooti, hattono afoo seekkite fante nabbawi. Mitte mittenta qoonqote tuqqo (syllable) coyishiishate sharrami.