ISAMBILILO 6
Mulelondolola Bwino ico Mwabelengela Ilembo
Yohane 10:33-36
IFILI MULI ILI ISAMBILILO: Tamufwile ukubelenga fye ilembo mwatendeka no kulanda pa cishinka cimbi. Mulingile ukulenga abalekutika bamona ifyo ilembo mwabelenga lyampene ne cishinka mulelandapo.
IFYO MUFWILE UKUCITA:
-
Mulesoobolamo amashiwi yamo. Nga mwabelenga ilembo, soobolenimo amashiwi ayampene sana ne cishinka cikalamba ico mulelandapo. Pa kucita ifi, nalimo kuti mwabwekeshapo ayo amashiwi nelyo kuti mwaipusha icipusho icingalenga abalekutika bamona amashiwi ayalelanda pa cishinka cikalamba.
-
Mulekomaila pa cishinka ico mulefwaya abalekutika bomfwikishe. Nga ca kuti mwalanda ico mwalabelengela ilembo ilyo mushilalibelenga, mufwile ukulondolola ifyo amashiwi ayali mwi lembo yalelondolola icishinka ico mulefwaya bomfwe.
-
Mulelondolola bwino ilembo. Mwilalanda pa fishilingile, mulelanda fye pa fyampene ne cishinka cikalamba. Ukulingana ne fyo abalekutika baishiba kale pa fyo mulelandapo, saleni ifishinka mwalalandapo ifingalenga abalekutika baumfwikisha ico mulelandapo.
