KWAGHHENEN U SHA 6
Ta Iwanger sha Ivur i U Er la Wang
Yohane 10:33-36
NGEREN U SAVEN: De gbe ôron ivur Bibilo tsô maa yemen sha kwagh ugen ga. Nenge wer mba u lu lamen a ve la kav wang er ivur Bibilo i u er la i zough sha kwagh u u lu ôron la yô.
ER U ER KWAGH NE YÔ:
-
Tsua asemberatii a hange hange la lam sha mi. U ôron ivur Bibilo u been kera yô, lam sha asemberatii a a zough sha ityôkwagh i vesen i u lu lamen sha mi la jighilii yô. U fatyô u eren kwagh ne sha u kimbir asember shon shin pinen mpin u una wase mba u lu lamen a ve la u fan atôakaa a vesen la yô.
-
Kume acin ape jindikwagh i lu la. Aluer ityôkyaa ngi wang i i ne ve u er ma ivur Bibilo yô, pase er asember a hange hange a a lu ker la a zough sha ityôkyaa shon yô.
-
Ta iwanger sha gbenda u taver ga. Palegh u lamen sha akaa a kiriki a a lu hange hange ga la. Shi akaa a a sue ityôkwagh i vesen i u lu lamen sha mi ga la kpa palegh. Fa kwagh u mba u lu lamen a ve la ve vande fan sha itinekwagh i u lu lamen sha mi la man mluainja u ma jindikwagh, maa tsua akaa a mimi a a lu hange hange a u za zwa sha mi ve, a seer wanger mba u lu lamen a ve la yô.
