Gã ɖɛ-dyí-poìn-poìn ɓè se múin wɔ̃́uń kàmà kɛ. Nyùìn ɖɛ tííwè ɓè kũ̀à mú, ɓɛ́ m̀ ké ɖɛ vɛ̀nɛ̀ ɓè jè kɔ̃in zaìn, ké nyùìn ɖɛ se múin wɔ̃́uń kàmà ɓè kũ̀à mú, ɓɛ́ m̀ ké ɖɛ kàmà múin wɔ̃́uń ɓè jè kɔ̃in zaìn kà Jízɛ̀ nyuɛ ma kà kɛ. Ɓɔ́ ɖɛ gbɔɖɔun ɓè mu ɖɛ-dyí-poìn-poìnɔ̀ mú kàmàìn nyɛɛ jè cɛ̃ɛ. Ðɛ ɓè m̀ cɛ̃ jè ɖé nì ɖɛ-dyí-poìn-poìnɔ̀ múɛɛ mɛ ɓá ɖɛ m̀ nìà tɛ̀mɛ̀ìn nyɛɛ dyí jɛ́ɛ́, ɓɛ́ nyɔ ɓèɔ̀ hwòɖò ní kɔ̃̀ ɖà kɔ̃in cá ɓó ɖɛ ɓè se gbo muìn nyɛɛ jè.

Poìn nyɔ ɓè m̀ wùɖùà gboɛɛ jè hwìɖìi. Gã ɖɛ-dyí-poìn-poìn ɓè ɓɛ́ wa ɓá ɖɛ ɓè ɓɛ́ nyɔ ɓèɔ̀ nì nyuɛń nyɛ, kè waà hwòɖò-kpɔ̃-ɖɛ̀ ɓè dyíɛ. Ma mú, ɓɛ́ nì ɖɛ-dyí-poìn-poìn ɓèɔ̀ ní kɔ̃̀ ɖà wa dɛ̃ nyùìn mɔɔ wa dyoɖoún po.

Tɛ̀mɛ̀ìn fɔ̀nɔ̀-hwòɖò jɛ́ɛ́ɔ̀. Ðɛ m̀ mɛ vòìn gbo ɓó ɖɛ dyí poìn jèɛɛ mɛ mɔ̀ fɔ̀nɔ̀-hwòɖò jɛ́ɛ́ ɓè, ɔ se ɖɛ ɓè se ná ɖɛ kpa cá kɛ. Nyuɛ ɓɛ́ ɖɛ-dyí-poìn-poìnɔ̀ ké se nyɔɔ̀ hwìɖìi sè ɖòùn pu, kɛɛ ɓɛ́ cɛ̃́ɛ́-ɖɛ̀ sɔ̀àìn ɖéɛɛ ké ɔ hwìɖìi sè ɖekè.