Toorora ovisasanekero ovipupu. Ungurisa oviṋa oviṱiṱi okukahurura ovinene, noviṋa ovipupu okukahurura imbi ovizeu, tjimuna Jesus tjaa tjiti. O weza ondjivisiro ndji he ri ohepero ndji mai tjiti kutja otjisasanekero tji rire otjizeu okuzuva. Kondja kutja oviṋa motjisasanekero tjoye vi hitasane nawa nepu ndi mo vanga okuhonga, kutja ovapuratene voye ave ha pambaukisiwa i ondjivisiro ndji hi notjiṋa nepu roye poo ndji i hi nokuzuvaka nawa.

Ripurira koviṋa mbi mavi vatere ovapuratene voye. Toorora ovisasanekero mbi mavi kamburire mo ovitjitwa nozonḓero zovapuratene voye. Kengeza kutja ovisasanekero vyoye avi ha ṱisa varwe ohoṋi poo okuvehihamisa.

Yandja ombango kepu enanḓengu. O yandja ombango kondjivisiro ndji hi notjiṋa nepu, nungwari yandja ombango kepu enanḓengu motjisasanekero. Kondja kutja omupuratene woye aha zemburuka otjisasanekero uriri, nungwari wina ma zemburuke kutja we rihongo tjike kotjisasanekero hi.