Sankhulani mathere yakusaya kunesa kubvesesa. Ninga momwe Jezu akhacitira, mbaphatisanimbo basa bzinthu bzomwe wanthu ambabzidziwa kale kuti muwapfunzise bzinthu bzakufunika kwene-kwene mu njira yakusaya kunesa kubvesesa. Tcenkhani kumbafotokoza nfundo zakusaya kufunikira, bzomwe bzingacitise kuti there lanu lireke kubveseseka. Tsimikizirani kuti there lanulo linkubverana na nfundo yomwe mun’funa kuibvekesayo kuti abveseri wanu aleke kuzungaira.

Kumbukirani bzomwe bzingathandize abveseri wanu. Sankhulani mathere yakubverana na bzomwe abveseri wanuwo ambacita nsiku na nsiku. Tsono samalani kuti mathere yanu yaleke kuwacitisa manyazi.

Tsindikani nfundo ikulu. Cakulinga canu cikhale kutsindika nfundo zikulu-zikulu, sikuti tunfundo twense. Tsimikizirani kuti abveseri wanu an’dzakumbukira nfundo ikulu ya nkhaniyo, sikuti there lokhalo.