Kalaksakti ni xatuwa liʼakxilhtit. Chuna la Jesús, kamaklakaskinti tuku xalaktsu xlakata nalichuwinana tuku laklanka, chu kamaklakaskinti tuku ni tuwa xlakata nalichuwinana tuku tuwa. Ni kalichuwinanti tuku ni xlakaskinka nema natlawa pi tuwa nataʼakgatekgsa liʼakxilhtit. Kuenta katlawa pi tuku maklakaskimpat xlikana tatalakxtumi tuku masiyapat, xlakata tiku kgaxmatnimakgon ni atanu tuku nalakpuwankgo kaj xlakata miliʼakxilhtit ni tatalakxtumi tuku masiyapat.

Kakalilakpuwanti tiku kgaxmatnimakgon. Kalaksakti liʼakxilhtit nema lakgapaskgo o tatalakxtumi tuku tlawakgo tiku kgaxmatnimakgon. Kuenta katlawa xlakata miliʼakxilhtit ni nakamamaxani o nitlan nakamamakgkatsini.

Kamasiya tuku tlakg xlakaskinka. Kawili akgtum liʼakxilhtit xlakata namasiyaya tuku tlakg xlakaskinka, ni wa tuku ni lu xlakaskinka. Kuenta katlawa pi tiku kgaxmatnimakgon ni kajwatiya nalakapastakkgo liʼakxilhtit, wata nalakapastakkgo tuku kamasiyani liʼakxilhtit.