DYONDZO 8
Tirhisa Swikombiso Loko U Dyondzisa
Matewu 13:34, 35
HI KU KOMISA: Antswisa ndlela leyi u dyondzisaka ha yona, hi ku tirhisa swikombiso leswi vayingiseri va wena va swi tivaka leswaku u va dyondzisa tinhla ta nkoka.
NDLELA LEYI U NGA SWI ENDLAKA HA YONA:
-
Hlawula swikombiso leswi twisisekaka hi ku olova. Tirhisa swikombiso leswi twisisekaka hi ku olova leswaku u hlamusela mhaka leyi rharhanganeke. U nga boxi vuxokoxoko lebyi nga pfuniki nchumu lebyi nga ta endla xikombiso xa wena xi nga ha twisiseki. Tiyiseka leswaku swilo leswi u vulavulaka ha swona eka xikombiso xa wena, swi fambisana kahle ni mhaka leyi u yi dyondzisaka leswaku vayingiseri va wena va nga pfilunganyeki.
-
Anakanya hi swikombiso leswi nga ta pfuna vayingiseri va wena. Tirhisa swikombiso leswi vayingiseri va wena va swi toloveleke leswi nga ta va koka rinoko. U nga tirhisi swikombiso leswi nga ta va khunguvanyisa kumbe ku va khomisa tingana.
-
Kandziyisa tinhla ta nkoka. Tirhisa swikombiso leswaku u hlamusela tinhla ta nkoka ku nga ri ku hlamusela vuxokoxoko lebyi nga pfuniki nchumu. Loko u endla tano, vayingiseri va wena a va nge tsundzuki xikombiso xexo ntsena kambe va ta tsundzuka ni leswi u va dyondziseke swona.