တၢ်မၤလိ ၁၂
ပာ်ဖျါထီၣ်တၢ်အဲၣ် ဒီးတၢ်ဒိသူၣ်ဒိသးတက့ၢ်
၁ သ့းစၤလနံ ၂:၇, ၈
ဘၣ်မၤဒ်လဲၣ်– တဲတၢ်လၢတၢ်သူၣ်ဘျၢသးဘျၢအပူၤ ဒီးပာ်ဖျါထီၣ်လၢ နသူၣ်အိၣ်သးအိၣ် ပှၤဒိကနၣ်တၢ်ဖိနီၢ်ကီၢ်တက့ၢ်.
မၤဒ်အံၤတက့ၢ်–
-
ဆိကမိၣ်ထံ နပှၤဒိကနၣ်တၢ်ဖိ အတၢ်အိၣ်သးတက့ၢ်. နဘၣ်ဆိကမိၣ်ထံဘၣ်ဃးဒီး တၢ်ကီတၢ်ခဲလၢ နပှၤဒိကနၣ်တၢ်ဖိတဖၣ် ထံၣ်ဘၣ်ဝဲ ဒီးထံၣ်တမှံကွၢ်လၢ အဝဲသ့ၣ်တူၢ်ဘၣ်တၢ်ဒ်လဲၣ်န့ၣ်တက့ၢ်.
-
ဃုထၢတၢ်ကတိၤလၢ အကြၢးဝဲဘၣ်ဝဲတဖၣ် လီၤတံၢ်လီၤဆဲးတက့ၢ်. ဃုကျဲလၢ နကမၤမုာ်ထီၣ် ဒီးဟ့ၣ်ဂံၢ်ဟ့ၣ်ဘါ နပှၤဒိကနၣ်တၢ်ဖိတဖၣ်န့ၣ်တက့ၢ်. ဟးဆှဲးတၢ်ကတိၤလၢ ကကဲထီၣ်တၢ်လီၤဃံၢ်လၢ အဝဲသ့ၣ်အဂီၢ်တက့ၢ်. ဒီးတဘၣ်တဲဟးဂီၤ ပှၤတၢ်ချၢတဖၣ် အသူးသ့ၣ်လၤကပီၤ ဒီးအတၢ်စူၢ်တၢ်နာ်တဂ့ၤ.
-
ပာ်ဖျါထီၣ်တၢ်သူၣ်အိၣ်သးအိၣ်တက့ၢ်. တဲတၢ်ဒီးအဝဲသ့ၣ်လၢ ကလုၢ်မုာ်မုာ် ဒီးသူတၢ်နဲၣ်စုနဲၣ်ခီၣ် ဒီးတၢ်ပာ်မဲာ်ပာ်နါလၢ အကြၢးဝဲဘၣ်ဝဲန့ၣ်တက့ၢ်. ပာ်ဖျါထီၣ်လၢ နသူၣ်အိၣ်သးအိၣ် နပှၤဒိကနၣ်တၢ်ဖိဒီး အိၣ်ဒီးတၢ်မဲာ်မုာ်နါဆၢတက့ၢ်.