LIJIGANYO 17
Aŵeceteje Yakupikanika kwa Ŵandu
1 Akolinto 14:9
YACITULIJIGANYE: Ŵakamucisyeje ŵakupikanila ŵawo kuti ajipikanicisyeje ngopolelo ja utenga wakusala.
MWAMPAKA ATENDELE:
-
Akoseceleje ngani jawo mwakwanila. Akusosekwa kuwupikanicisya mtwe wa ngani jawo kuti ajilondesye m’maloŵe gawogawope.
-
Akamulicisyeje masengo maloŵe gamnono soni gangasawusya. Atamose yili yakundidwa kuŵeceta yindu yejinji, nambope pakusala yiwundo yekulungwa akamulicisyeje masengo maloŵe gejipi soni gangasawusya kupikana.
-
Alondesyeje cenene yindu yayili yacilendo. Aŵambaleje kukamulicisya masengo maloŵe gakuti ŵakupikanila ŵawo ngakugamanyilila. Pakusala yindu yakuti ŵandu ngakuyimanyilila cenene, mpela ya mundu jwine jwa m’Baibulo, yakulinjila yindu yakala kapena ndamo sya ŵandu ŵane, ayilondesyeje mwakupikanika.
