Ta ẹmwẹ nọ gha ya emwa ni danmwehọ ruẹ gha roro ẹre vbene ẹmwẹ nii ya kaan iran hẹ. Gha nọ ọta nọ gha ya iran gha mu ẹmwẹ ne u ta roro.

Rhie igiọdu ne emwa ni danmwehọ ruẹ wẹẹ iran gha sẹtin musọe. Gua iran kpa, ne iran muẹn roro evbọzẹe ne ọ na khẹke na gha ru emwi esi. Ọ khẹke ne iran rẹn wẹẹ, ahoẹmwọmwa na mwẹ dae Jehova, emwa nagbọn kevbe imamwaemwi ọghe Baibol, ẹre ọ gu ọmwa kpa ya ru vbene ẹtin ẹnrẹn sẹ. Gha gu iran guan vbene a miẹn wẹẹ te u wa ziro kugbe, ghẹ gha gu iran guan vbene a miẹn wẹẹ, ototọ ruẹ ẹre iran ye. Ghẹ ya ekhue mu iran. Ọ khẹke na miẹn wẹẹ u gha ghi guan fo nẹ, emwa ne u gu guan ghi gha mwẹ igiọdu ne iran ya ru vbene ẹtin iran sẹ.

Gi emwa rẹn vbene ẹmwẹ ne u ta ya dekaan e Jehova hẹ. Niania vbene imamwaemwi, ilele kevbe uhi ni rre uwu e Baibol ya rhiẹre ma hẹ ighẹ avbe akpa ọghe Jehova kevbe ahoẹmwọmwa nọ mwẹ ghee ima. Kọe ye emwa ni danmwehọ ruẹ ekhọe, ne iran gha roro emwi nọ gha yẹẹ e Jehova.