Sampatilah kalak gelah rukur. Banlah penungkunen retorik, eme penungkunen si ijawap kalak i bas pusuhna. Enda banci nampati kalak e gelah rukur.

Positiplah perukurenndu man kalak si megiken kam. Iahken kalak si megiken kam gelah iukurina kai alasenna ngelakoken perbahanen si mehuli. Sampati kalak e gelah alasenna ngelakoken si mehuli eme perban keleng atena Jahwe, manusia, bage pe kai si iajarken bas Pustaka. Sampati ka kalak e gelah itehna maka erguna kel kai si ikataken bas Pustaka, tapi carandu mpesehsa ula tempa bagi nuruh-nuruh kalak. Ula ka permelakenndu kalak e, tapi iahken ia gelah ilakokenna si mehulina.

Lalaplah hubungken ku Jahwe. Jelasken maka ajaren, pedah-pedah, ras perentah si lit bas Pustaka lit hubungenna ras sipat-sipat Dibata janah e mbuktiken keleng ateNa kita. Banlah gelah nggit kalak si megiken kam ngukuri perasan Jahwe janah nggit erban Ia senang.