Nvèè bá nè gbò e bà gé pãané ni tṍ ló kọ bàá ẹ̀à ba lóó. Bĩiná sìgà bíb ea é nveè bá nè gbò e bà gé pãane tṍ kọ bàá láá nyimá bé e ba dùm dì naa kọbé bà mon kiẽ́e eo lòbèl tọ́a vá ló.

Ló bel boo bùlà e bà íé. Siè kpóó ló gbò e bà gé pãané ni tṍ ló kọ bàá nyímá nú ea náa vaá bà sí lé tóm. Nvèè bá nè va kọ bàá láá ié kà lé bug ea é náa kọ bàá​—⁠vùlè Jìhóvà, gbò nen, nè gbò nú e Kpá Káí nóòmà. Naa kọ bàá mòn nyìmànù ea di mm̀ nú e Kpá Káí kọ́. Tãa vó eo lóò bel ea é síìmà va kẹ́ẹ, naa kọ o lòbèl á siè va kpóó ló, kọbé bà láá kpáá pììgà bé e ba kpóó sim tùlà naa.

Kolí ba bùlà nyòòmà Jìhóvà. Baatẽ́ bé e gbò nú e Kpá Káí nóòmà, gbò a nòòkúù, nè gbò a log zógè gbò kpãà Bàrì nè a vùlè kìlmàí ló tẹlẹ bàlà kẽ naa. Naa kọọ̀ gbò e bà gé pãané ni tṍ ló á bugi togó boo bé e Jìhóvà ólò ẹ̀b nu naa nè ge gbĩ́ gè naa nú ea é léémáe.