Kwashai bantu kwipima abo bene. Ipuzhainga mepuzho afwainwa kulengela bantu mu luonde kulanguluka pa byo boba mu bwikalo bwabo.

Batundaikai kutwajijila kuba bintu byawama. Tundaikai bantu kulanguluka pa ene mambo o kyawamina kwikala na byubilo byawama. Bafunjishai kutemwa Yehoba, kutemwa bantu ne kutemwa bintu byo bafunda mu Baibolo. Bakwashai kulanguluka pa mafunde a mu Baibolo, kechi kwibabuulatu bya kuba ne. Kabiji kechi mwafwainwa kwibalengesha bumvu ne, bino mwafwainwa kwibatundaika kutwajijila kuba byawama.

Tumbijikainga Yehoba. Lumbululai mafunde ne mizhilo iji mu Baibolo byo imwesha byubilo bya Lesa ne butemwe bwanji. Kwashai bantu kulanguluka pe Yehoba ne kwibatundaika kuba bintu bimutokesha ku muchima.