Wase mba u lu lamen a ve la ve gbidye kwar sha akaa a ve ne jighjigh a mi la man sha mbaawashima vev. Pine mbampin mba henen sha kwagh, mba vea wase mba u lu lamen a ve la u tôvon asema a ve yô.

Na jighjigh wer mba u lu lamen a ve la vea er kwagh u vough. Taver mba u lu lamen a ve la ishima, ve tôv ve fa er i hii ve ve eren ityom i dedoo yô. Wase ve sha er Yehova una doo ve ishima man mbagenev kua atesen a Bibilo kpaa yô. Nahan kwagh ne una lu ityôkyaa i dedoo i vea eren akaa yô. Wase mba u lu lamen a ve la ve nenge a kwaghfan ken kwagh u Bibilo i kaa la; de ôron ve a ôr kwagh u vea er ga. De ôron kwagh sha gbenda u vea nenge ér u ngu nan ve ibo ga, kpa gema ôr kwagh u una taver ve ishima yô. Nahan ishima ia mgbegha ve u eren kwagh u ve fetyô la cii.

Na ve ver ishima sha Yehova. Tese var var er atesen a Bibilo man akaawan kua atindi a i la, a tese aeren a Aôndo man dooshima na a vese yô. Wase mba u lu lamen a ve la, ve nôngo ve fa mnenge u Yehova sha akaa man er vea er ishima na yô.