ĨSOMO YA 20
Kũminĩĩa Ũneeni kwa Nzĩa Nzeo
Mũtavan’ya 12:13, 14
KWA ŨKUVĨ: Ũiminĩĩa ũneeni waku, tetheesya ethukĩĩsya metĩkĩle na maiatĩĩa kĩla meemanyĩsya.
ŨNDŨ ŨTONYA KWĨKA ŨU:
-
Onany’a ũndũ ndeto syaku sya kũminĩĩa ikonanĩtye na kĩla ũũneeneaa. Tũngĩlĩĩla maũndũ ala manene na ũndũ ũla mũnene vyũ ũũneeneaa.
-
Thangaasya ethukĩĩsya maku. Ony’a ethukĩĩsya kĩla maĩle kwĩka na ũimanenga itumi nzeo sya kwĩka ũu. Neena kuma ngoonĩ na ũte na nzika.
-
Minĩĩa ũvoo waku kwa kũweta maũndũ o manini na kwa ũkuvĩ. Ũiminĩĩa ũvoo waku, ndũkambĩĩe kũneenea ũndũ mũnene ũteĩ ũnaũweta. Tũmĩa ndeto nguvĩ ũndũ vatonyeka ũthangaasye ethukĩĩsya mose ĩtambya.