ATENDAN TAUDIA Atendan taudia edia gaukara be oi do idia durua. Mani idia oi kamonai henia bona idia gwauraia gabudia dekenai emu motuka oi atoa, oi raka, bona oi helai.

BAPATISO Bapatiso idia abia gwauraia taudia edia helai gabudia be platfom vairanai idia makaia. Namona be Saturday daba ai bapatiso herevana ia do matamaia lasi neganai, bapatiso idia abia gwauraia taudia be idia totona ai makaia gabuna dekenai idia helai. Idia ta ta ese edia tauele bona hemataurai digudigu dabuadia idia mailaia be namo.

KONTRIBIUSEN Hebouhebou ena helai gaudia, saun gaudia, bona gau idauidau totona, moni sisina bada idia negea. Unai gaudia ese ita idia durua hebouhebou ita moalelaia bona Iehova kahirakahira ita lao totona. Oiemu kontribiusen be heduru gauna unai gaudia edia davana karaia totona bona tanobada hegegemadai gaukarana ia durua danu. Unai dainai, hebouhebou ena gabu idauidau idia makaia vadaeni kontribiusen mauadia idia atoa. Oi henia kontribiusen ibounai ai laloa bada. Hakaua Oreana ia ura oi ia tanikiu henia, badina emu henia karana amo oi ese Basileia gaukarana oi durua.

MEDIKOL HEDURU Laloatao, inai be bero o gorere badadia idia davaria taudia SIBONA DURUA HARAGA GABUNA.

BOIO GAUDIA Mani oi davaria gaudia ibounai be Boio Gaudia Dipatmen dekenai oi abia lao. Bema gau ta oi haboioa, inai gabu dekenai oi lao bona oi sekea. Tama sina amo ia raka boio natuna maragina bema oi davaria, mani inai dipatmen dekenai oi hakaua lao be namo. To, unai gaukara idia durua taudia dekenai hekwarahi ita henia lasi totona, mani emui natudia umui naria namonamo, bona umui badibadinai do idia noho.

HELAI GAUDIA Mani haida edia namo oi laloa. Laloatao, emu ruma bese, oi danu idia mai taudia, o emu Baibel stiuden tauna sibona totona, helai gaudia oi abia hegaegae diba. Mani oiemu kohu be helai gabuna latanai oi atoa lasi.

VOLANTIA GAUKARA Bema hebouhebou totona idia hegaegaelaia gaukarana oi ura durua, mani Infomeisen Bona Volantia Gaukara Dipatmen oi hadibaia.

BASILEIA EVANELIA SIKULI Painia taudia edia mauri lagani be 23 bona 65 huanai edia hesiai gaukara bema idia ura habadaia Sunday adorahi ai Basileia Evanelia Sikuli idia ura lao taudia edia hebou totona idia mai diba. Unai hebou ena taim bona gabu be do idia gwauraia.