A RE EMHIN RE Igho a noo nan rẹ lu emhanmhan ọsi aga nan rẹ dotọa, emhin nan rẹ talọ bi emhin nekẹle kẹkẹ ne zẹle mhan sabọ sọnyẹnmhẹn bhi ọne usikoko nan. Ene emhanmhan nan rebhe rẹkpa mhan rẹ sabọ sikẹ iJehova. Emhin nin bha re ọkhọle re re, ọle a rẹ haosa ene emhin nan rebhe. Ọle a yẹ rẹ rẹkpa iwẹnna itẹmhọn Agbejele bhi otọ agbọn nan rebhe. Nọn hẹi ha nọghọ uwẹ, a mun ẹkpẹti ọbhi ije kẹkẹ bhi eji mhan da do ọne usikoko nan. Emhin nin uwẹ hi ki rẹ sabọ re re dẹ wo ti mhan bhọ. Otu Nọn Sun Oga ọsi Esali Jehova yi bha rebhe obulu bhi uwedẹ nin bha rẹ ze emhin bhi obọ rẹ rẹkpa ọne iwẹnna Agbejele nan lu bhi otọ agbọn nan rebhe.

EJI A DA DOTỌA Huẹan, ha ria ẹmhọn eria nekẹle. Yere ghe, uwẹ sabọ mun otọ khẹ eria nin bha ko nabhi imoto ọkpa vae, eria nin bha ko nyẹn bhi uwa, bi eria nin uwẹ man ele iBaibo. Huẹan, hẹi ne emhin ọbhi okhun aga nin uwẹ bha mun ya khẹ ọria soso.

EMHIN NE YULUA NAN MIẸN Ahamiẹn uwẹ miẹn emhin re bhi otọ, uwẹ bha da miẹn ọnọn nyan ọlẹn, re ha khian eji a da guanọ Emhin Ne Yulua Nan Miẹn. (Lost and Found) Ahamiẹn emhin nọnsẹ yulua, uwẹ ha yẹ dọ fẹ enin ghe. Uwẹ ha miẹn ọmọn nọn bibi sibhi eji ene biẹ ọle ye re, nọn yulua, re ọle diọ bhi enin. Ọrẹyiriọ, ranmhude mhan bha guanọ nin mhan rẹ ọne ẹsọn kpokpo ọria soso, huẹan, bha ha gbẹloghe imọn nesẹbha ẹghe rebhe, bha ha yẹ ne ele sikẹ egbe.

ENE ROBỌKPAEne robọkpa muegbe nin ele rẹ rẹkpa uwẹ, ọnin bhọ nan da zẹ ele. Huẹan, ka ele ehọ. Lu rẹkhan ebi ele taman uwẹ rẹji eji uwẹ ha mun imoto nọnsẹ i, eji uwẹ ha rẹkhan nabhi ẹkẹ eji a da do usikoko, bi eji uwẹ ha rẹkhan dagbare. Yẹ rẹkhan adia nọnsele rẹji eji a da dotọa bi emhin nekẹle.

IMIANMẸN Aga nin ene ha mianmẹn ha da dotọa ribhi odalo esẹ. Ahamiẹn ọ iyi iriọ, a dẹ taman uwẹ eji ọ khin. Ọkhẹke nin ene ho nin ele mianmẹn dotọa bhi enin, ọkuẹsẹ ọta ọsi imianmẹn munhẹn ọsewewiẹ bhi edẹ iSaturday. Ọdeọde re ukpọn nọnsọle nan rẹ ka amẹn bhi egbe mhọn, bi ukpọn nọn gbale nan rẹ nabhi amẹn.

IWẸNNA NAN ZEGBERE LU Ahamiẹn uwẹ ho nin uwẹ rẹkpa bhi iwẹnna nan ha lu bhi ọne usikoko nan, huẹan, ji ene ribhi eji a da zegbere bhi iwẹnna lẹn. (Information and Volunteer Service Department)

URẸKPA ỌSI ỌHẸNHẸN NAN RE NIN ENE KHỌNMHỌN Huẹan, yere ghe, urẹkpa rẹji ẹbho ne munhẹn ha khọnmhọn ọsi IGUAGUAKO, ọle ọkpa a re nin ọria bhi enan.

ISIKU ỌSI ENE TẸMHỌN AGBEJELE Ekanẹfan ne ribhi ikpe 23 rẹ sẹbhi 65 ne ho nin ele lu ba iwẹnna nin ele lu bhi ẹkẹ oga, sabọ rẹ yo ikolo ọsi ẹbho ne ho nin ele yo Isiku ọsi Ene Tẹmhọn Agbejele, nan da do bhi ọsewewiẹ bhi ẹdẹ iSunday. A dẹ ta ẹghe bi eji a ha da do ọne ikolo.