BʼANOK. Misach saʼ leechʼool naq li naʼaj aʼin KAʼAJWIʼ choʼq re li AAJEL RU.

CHUNLEBʼAAL. Naqatzʼaama chaawu naq twoxloqʼihebʼ li junchʼol. Jultikoʼq aawe naq kaʼajwiʼ taachap xnaʼaj laajunkabʼal, li xkohebʼ chaawix saʼ laabʼelebʼaal chʼiichʼ, li wankebʼ saʼ laawochoch malaj li nekeʼxtzol li Santil Hu aawikʼin. Maakʼe li kʼaru aawe saʼebʼ li naʼaj li inkʼaʼ yookat roksinkil.

KUBʼSINK HAʼ. Ebʼ li naʼaj li wank toj chiru txokmanq choʼq rehebʼ li teʼkubʼeeq xhaʼ, wi inkʼaʼ xkʼemank resil naq tjalaaq, aʼan xnaʼajebʼ. Li teʼkubʼeeq xhaʼ tento teʼchunlaaq saʼ li naʼaj aʼin naq toj maajiʼ natiklaak li seeraqʼ chirix li kubʼsink haʼ li twanq saʼ li Sabado eqʼla. Chixjunilebʼ tento teʼxkʼam chaq xtoʼaay ut xtʼikrebʼ, joʼ xkʼulubʼ aj paabʼanel.

KʼULUL ULAʼ. Ebʼ laj kʼulul ulaʼ wankebʼ choʼq re aatenqʼankil. Abʼin chiruhebʼ naq teʼxye aawe bʼar taakʼe laabʼelebʼaal chʼiichʼ, bʼar tatbʼeeq, jarubʼ li naʼaj taachap ut junaq chik li naʼlebʼ.

LI NEKEʼRAJ KʼANJELAK. Wi nakaawaj xyeechiʼinkil aawibʼ re kʼanjelak saʼ li nimla chʼutam, aatinan rikʼinebʼ li xaqabʼanbʼilebʼ re kʼehok esil ut kʼanjel.

LI XSACH CHIQU. Chixjunil li ttawmanq chi tzʼeqtzʼo tento xkanabʼankil chaq saʼ li naʼaj re xkʼulankil. Wi xaasach kʼaru aawe, sikʼ chaq saʼ li naʼaj aʼin. Aran ajwiʼ, teʼkʼameʼq li kokʼal li teʼsachq. Abʼanan, re naq inkʼaʼ t-oq eekʼaʼuxl, ilomaq leekokʼal ut junelik teekʼe cheekʼatq.

TENQʼANK RIKʼIN TUMIN. Naabʼal li tumin kiʼoksimank re naq chaabʼilaq qanaʼaj, kiʼoksimank li kʼanjelobʼaal re rabʼinkil li xyaabʼ kuxej ut re rilbʼal ebʼ li bʼideo, ut naabʼal chik li kʼanjelobʼaal li nokooxtenqʼa re naq tqataw rusilal li nimla chʼutam aʼin ut re naq toojiloq chiʼus chixkʼatq li Jehobʼa. Li tenqʼ tumin li nekeekʼe nakʼanjelak re xtojbʼal li sachomq aʼin ut re xtenqʼankil li xkʼanjel li Yos saʼ chixjunil li Ruuchichʼochʼ. Ut re naq inkʼaʼ chʼaʼajkaq chaawu, yalaq bʼar taataw li kaax li wank reetalil. Naqabʼanyoxi eere li tenqʼ li nekeekʼe. Li Nekeʼjolomink re Xmolam li Jehobʼa nekeʼxbʼanyoxi eere naq chi anchal eechʼool nekeetenqʼa li Xʼawabʼejilal li Jehobʼa.

TZOLOK REHEBʼ LI NEKEʼKʼAMOK BʼE CHI XPUKTESINKIL XʼAWABʼEJILAL LI YOS. Bʼoqbʼilebʼ laj kʼamolbʼe saʼ li puktesink li wankebʼ 23 toj 65 chihabʼ re, re naq teʼwanq saʼ jun li chʼutam saʼ li Domingo ewu. Li chʼutam aʼin choʼq rehebʼ li nekeʼraj xkʼebʼal xtzʼaqobʼ li xkʼanjel chiru li Yos ut nekeʼraj xik saʼ li tzolebʼaal. Li yook chi bʼeresink re li chʼutam tixkʼe resil li hoonal ut li naʼaj bʼarwiʼ t-uxmanq.