ANAMALABA OVIVELELA Akhala munofuna khami-a nao basa vagumanula, dhowani wu Departamento yokhami-a atu thitho yoig’anela anamalaba ovivelela.

DEPARTAMENTO YOKHAMI-A VA VYOIREYA VYO-ODEDI-EDHA Ninouvephani thuulela ira departamento yenna inokhami-a va VYOIREYA VYO-ODEDI-EDHA BAA-I.

MAMBURO OKHAATHI Muwesedhenga thuulela atu enango. Muumbuwelenga ira munooda lokhotedha mburo banja linyu, atu awendilena nyo karoni imbo-ive, venango atu anofunji-a nyo Bibilya. Khamu-elenga vyongo valimburo lokhaathi nli duzi na nyo.

OWACHELA ALENDO Ale anowachela alendo basa liwa kuukhami-ani. Eeno, arelani malangi-o anauva-eni aliwa va mwasa oimecha karo na njinga, ndhila dhofwanela wendamo, vovolowa na vokhuma valimburo la gumano, lokota mburo dhokhaathi na vinango.

UBADIZO Mipando ya alimbo dhowa mabadiziwa inodha eliwa sogolo wa pulatifomu. Atu ale anodedi-edhela dhowa mabadiziwa anofwanela dhakhaathi sogolo uno mwasa wa ubadizo wa-anarome Sabudu namaebe-i. Uliwathene unofwanela dhana thuwalia na nguo dhofwanela bwinana mwikho.

VYODIMELA NA VYODODIWA Mwadoda yongo iliyothene, mumajivelele wu Departamento ya vyodimela thitho yolokhota vyongo. Akhala mutomori-a yongo iliyothene, dhowani mafukha departamento yenna. Mwafwanya mwana wu-olowile, dhowani mumanvelele wu departamento yenna. Mbwenye departamentwila khai yolokhotao a-ima, moi eno muwasamale phama a-iminyu thitho hora dhothene mukhalenga nao vambo-i.

VYOVELELA Fwanya limburo lokwakwanela loirelavo gumano, vyoulukhuli-a madhu, vyongo vyooni-edha mavidiyo, na vyongo vinango vyokhami-a ira gumanula ukhale odhiveliwi-a, unofuna kobiri dhinjinji. Vyothene vyevi pyokhami-a ira nimmwandamele Yohova. Kobiri dhile munavelele nyo mofuna winyu vagumanula, dhinonikhami-a pagali vyongo ninga vyevi thitho dhinonikhami-a vabasa ya vailambo yothene yavathi. Makaxa olembiwa phama enao munaponyemo nyo vyovelela vinyu, tato-eliwa vamamburo o-iyana-iyana vagumanula. Vyovelela vinyu vyothene pyofuneya vinjinji. Thitho Gulu Lotonga linousimbani va mwasa okhami-a na rima othene vabasa la Umwene.

XIKOLA LA ANAMALALEELA A UMWENE Apainiya avyawa vya vari va 23 na 65, anofuna wenjedhela urumiwi wiwa, tanoitaniwa ira tadhafwanyeye va gumano wa atu ofuna dhowa wu Xikola la Anamalaleela a Umwene, Dimingu nathana va hora yovuma. Limburo na horae la gumanula vinodha ongiwa.