RI-LALE KÕJÃM RO Kar karõk bwe ri-lale kõjãm ro ren jipañ eok. Jouj im karejar im l̦oor naanin tõl ko jãn er ikijjeen jikin baak wa, diwõj del̦o̦ñ ñe elõñ armej, kakkon̦ jikin jijet ñan ro jet, im men ko ãierl̦o̦kwõt.

PEPTAIJ Naaj kakon̦ jea ko im̦aantata ñan ro renaaj peptaij ñe eaab renaaj kaalikkar l̦o̦k ñan er ia eo renaaj jijet ie. Ro renaaj peptaij rej aikuj jijet ilo jea kein m̦okta jãn an jinoe katak in peptaij eo ilo jibboñõn Jãdede. Kajjojo iaaer rej aikuj bõktok aer to̦o̦l im nuknuk ko rekkar ñan peptaij.

JABAWÕT Ewõr joñan jããn ko kar kõjerbali bwe jen maroñ kweilo̦k ilo juon jikin em̦m̦an joñan ñan aolep, bwe en maroñ wõr kein kõjañjañ, kein alwõj, im men ko jet ñan kõm̦m̦an bwe ad pãd ilo iien kweilo̦k in en juon iien ekanooj em̦m̦an im ejipañ kõj ñan epaakel̦o̦k Jeova. Am̦ jabawõt enaaj jipañ ñan kabwe on̦ããn men kein im jipañ jerbal eo ad ipel̦aakin lal̦ in. Ñe kokõn̦aan jabawõt, elõñ bo̦o̦k in jabawõt ko ilo jikin kweilo̦k in. El̦ap ad kam̦m̦oolol kõn jabawõt ko an aolep. El̦ap an Kumi eo Ej Lale Aolep Eklejia ko an Ri-Kõnnaan ro an Jeova kam̦m̦oolol kõn ami m̦õn̦õn̦õ im kõn̦aan rejetak jerbal ko an Aelõñ eo.

JIKIN JIPAÑ ÑE EWAL̦O̦K JORRÃÃN Jouj im keememej bwe ijin ej ñan jorrããn ak nañinmej ko rej wal̦o̦k ILO IDIÑ WÕT.

JIKIN M̦WEIUK KO REJAKO Ñe jej loe juon men me ejjab ad, jej aikuj bõkl̦o̦k ñan ijo ej ba, Jikin M̦weiuk ko Rejako. El̦aññe ewõr juon m̦weiõm̦ ejako, etal ñan ijin im kwal̦o̦k ta eo m̦weiõm̦ ejako. Ajri ro im rej jebwãbwe jãn jemãer im jineer remaroñ bõkl̦o̦k er ñan ijin. Bõtab, keememej bwe ijin ejjab jikin lale ajri. Jouj im lale ajri ro nejimi, im rej aikuj pãdwõt iturumi.

JIKIN JIJET Jouj im l̦õmn̦ak kõn ro jet. Keememej bwe kwõmaroñ kakkon̦ jikin jijet ñan ro wõt me rej uwe ilo wa eo waam̦, ro rej jokwe ilo m̦weo im̦õm̦, ak rũkkatak ro am̦. Jouj im jab likũt men ko m̦weiõm̦ ioon jea ko kwõjjab kõjerbali.

M̦ÕN̦ÕN̦Õ IN JIPAÑ ILO JERBAL KO El̦aññe kwõj m̦õn̦õn̦õ in jipañ ilo jerbal ko ilo kweilo̦k el̦ap, jouj im kõnnaanek ro rej pãd ilo department in bwe kwõj m̦õn̦õn̦õ in jipañ.

JIKUUL̦ EO ÑAN RI-KWAL̦O̦K NAAN RO AN AELÕÑ EO Bainier ro me 23 l̦o̦k ñan 65 aer iiõ im rekõn̦aan kal̦apl̦o̦k kun̦aaer, remaroñ pãd ilo kweilo̦k eo ñan ro rekõn̦aan apply ñan Jikuul̦ eo ñan Ri-Kwal̦o̦k Naan ro an Aelõñ Eo. Kweilo̦k in enaaj wal̦o̦k ilo Jabõt ãlikin raelep. Naaj kõjjel̦ã kõn jikin eo im awa eo enaaj kõm̦m̦an kweilo̦k in ie.