Mkaanem sha ci u Mba Ve Ve Mkohol La
MBASÔRON MTEM Í ver mbasôron mtem ér ve wase u. Ungwa imo ve sha akaa cii sha u dondon gbendatesen ve sha kwagh u ijiir i veren kwaghhendan shi nengen sha ikpelaior shi tsôron akaateman, kua akaa agen kpaa.
BATISEMA I ver akaateman sha ci u mba i lu u a er ve batisema la sha ishigh ki tsembe u nan kwaghôron la, saa di a tese ijiir igen. Mba í lu u á er ve batisema la ve tema hen ijiir i i ver sha ci ve la sha iyange i Sati pepe cii man kwaghôron u batisema la una hii ye. Hanmô ve nana̱ va a taor u nan u uman iyol man ikyondo i gban iyol i i̱ lu sha inja yô.
IYUA I EREN I vihi inyaregh kpishi sha u wan ago iyol sha akaateman man akaa a samber a iliam man ikyav mbi tesen vidio, kua akaa agen kpishi a ka a na i kpe se mbavan mkohol iyol shi a wase se se seer kporom ikyua a Yehova yô. Iyua i u er a ishima you la ia wase u kimbin inyaregh sha akaa ne shi ia sue tom u i eren tar sha won cii la kpaa. Í ver mbaakwati mba eren iyua shimi sha ajiir kposo kposo hen mkohol ne cii sha er ú zende ú ker a ker ga yô, shi í nger kwagh sha mi kpeher kpeher sha er a nzughul we ga yô. Mba ngohol uiyua enev mbara cii ave ahar. Mbahemenev mba Shin Itine mba sughun ne sha uiyua mba ne eren mgbeghaa sha u suen tom u Tartor la.
TWERSÔRON U ABURABUR Umbur wer, ijiir ne ngi sha ci u kwagh u a er or ABURABUR TSEEGH.
A SAA KPA I ZUA A MI Akaa a á saa kpa i zough a mi cii i̱ va a mi hen Gbaatom u Veren Akaa a A Saa Kpa I Zough a Mi La. Aluer ma kwagh saa u yô, za hen afishi ne za nenge una lu her yô. Mbayev mba kiriki mba ve tsum ve undu mbamaren vev man i zough a ve cii i̱ yem a ve hen afishi ne. Nahan kpa, ver ishima sha mbayev ou, ve̱ luun vea we hanma shighe, sha er kwagh ne una na or môm ishimanyian a ityôkyaa shio ga yô.
KWAGHTEMAN Wa mbagenev ikyo. Umbur wer, ka tsombor wou shin mba u henen Bibilo a ve gayô mba ve ve mkohol a we imôngo shin mato môm shin mba ve tse hen ya wou la tseegh, ú fatyô u tsôron akaateman sha ci ve ye. De pende akaa sha akaateman a u lu tsôron ga la ga.
TOM U NAN IWASEN Aluer ú soo u wasen tom u i lu eren sha u mkohol ne a za i doo la yô, za hen Gbaatom u Nan Mkaanem man Gbaatom u Nengen sha Tom u Nan Iwasen sha Mkohol la.
MKOMBO U INJAA
MAKERANTA U MBAPASEN IVANGELI I TARTOR Upania mba ve kom anyom 23 zan zan anyom 65 mba i sar ve u seer eren tom u pasen kwagh la cii, mba lôhôn ve mkombo u mba ve soo u zan Makeranta u Mbapasen Ivangeli i Tartor la sha iyange i Lahadi pepe. A yôô ijiir man shighe u a nyôr mkombo ne la jighilii.
Ka Mbahemenev mba Shin Itine mba Mbashiada mba Yehova Ve Lehe Se Mkohol Ne Ye
