AHOLE WA MBIDJASƐ Lam’alangayɛ, tambokɔlɔmba dia wɛ kanɛ anto akina. Ohɔ dia paka wanɛ woye la yɛ kana wodjashi la yɛ lo luudu ɔtɔi kana wanɛ wekayɛ la wɔ Bible nshi nyɛ mbahombayɛ namɛ ahole wa mbidjasɛ. Lam’alangayɛ, tambokɔlɔmba diaha wɛ nkitsha diangɔ laadiko di’ekala ekina.

BATISIMU Ekala wahomba mbidjasɛ wanɛ wayolongola batisimu pombaka monga la ntondo, mbɛlanɛ la lɔyɛnga naka ndooko otshikitanu wongi. Wanɛ wayolongola batisimu pombaka mbidjasɛ la ntondo ka sawo dia batisimu ntatɛ Lushi la samalo la pindju. Onto l’onto pombaka ndja la ɛsiyamɛ ande ndo l’ahɔndɔ wakoka dia ndjɔtɔ la wɔ l’ashi.

DIANGƆ DIASHISHƆ NDO DIƐNAMA Diangɔ tshɛ diatɔngɔnama pombaka tɔlama lo departɛma dia Diangɔ diashishɔ ndo diɛnama. Naka wɛ amboshisha ɛngɔ kɛmɔtshi, kete tshɔka lo departɛma sɔ dia toyanga ɛngɔ kakɔ. Ana wambonganɛ pombaka tɔlama lo departɛma diakɔ. Tambonyɔlɔmba dia nyu nama ananyu ndo watotapɔke oma lalenyu.

ESAKELO KA WANYANDJA Lam’alangayɛ, ohɔ dia departɛma nɛ mendanaka PAKA LA ESAKELO KA WANYANDJA.

OLONGWELO Wanɛ wakamba olimu w’olongwelo wekɔ la ɔkɛndɛ wa kokimanyiya. Lam’alangayɛ, tambokɔlɔmba dia wɛ nkamba kaamɛ la wɔ lo ndjelaka alako wayowokosha lo kɛnɛ kendana la dihole dia mbɛkɛ dikalo kana mututu, wetetelo wa lo ahole wa losanganya, wombelo w’ahole wa mbidjasɛ ndo l’awui akina.

WANƐ WAYAKIMƆ LA LOLANGO Naka wɛ nangaka nkamba olimu ɔmɔtshi lo losanganya la woke lɔnɛ, kete ewoya Departɛma diendana la wanɛ wayakimɔ la lolango.

WESHASHA Falanga efula yakatombe dia tɛdikɔ tɔmɔtshi mbɔsama dia nɔngɔsɔla ahole wa mbidjasɛ, dihomɔ dia sɔnɔrizasiɔ, dihomɔ dia tovidɛo ndo elimu ekina efula l’oyango wa wanɛ wɔtɔ lo nsanganya ya weke ngɛnangɛna ndo dia tokimanyiya dia ndjasukanya la Jehowa. Weshasha anyu wa la lolango kimanyiyaka dia nkaloya falanga yatomba shɔ ndo nsukɛ olimu wakambema lo andja w’otondo. Dia nyokimanyiya, tɔshɛtɛshɛtɛ ta weshasha tekɔ lo dihole diasalema losanganya. Weshasha tshɛ mandɔmaka efula. Olui-walɔmbɔla nangaka nyosha losaka lo woho wasukɛnyu wahɔ wa Diolelo la lokaho tshɛ.

KALASA K’ESAMBISHA WA DIOLELO Ambatshi mboka wa pondjo wele l’ɛnɔnyi l’asa 23 la 65 walanga mfudia olimu awɔ nɔmbamaka dia mbɔtɔ lo losanganya lendana la wanɛ walanga mbɔtɔ lo Kalasa k’esambisha wa Diolelo layosalema Lushi la lomingu l’ɔkɔngɔ a midi. Wayonyewoya wonya ndo dihole shikaa diayolosalema losanganya lɔsɔ.