LECCIÓN 01
¿Ximodo zanda gacané Biblia lii?
Nabé nga rinabadiidxanu stale cosa de xquendanabáninu, casi xiñee ridídinu lu stale yuubaʼ, xiñee rátinu ne xi zazaaca despué. Laaca nabé raca preocuparnu pur ca cosa ni rizaacanu, casi pa zanda guni ganarnu bueltu para tídinenu dxi o ximodo guibaninenu familia stinu nayecheʼ. Stale binni maʼ bidii cuenta ricabi Biblia ca pregunta risaca ni rúninu riʼ ne cadi ngasi, laaca rudiini laanu conseju galán ni racané laanu guiráʼ dxi. ¿Ñee rábiluʼ zanda gacané ca conseju zeeda lu Biblia tuuxa ni runibiaʼluʼ la?
1. ¿Gunáʼ nga ca pregunta ni ricabi Biblia yaʼ?
Ndiʼ nga caadxi de laacani: ¿ñee guyuu tu bizáʼ guiráʼ ni nuu la? ¿Xi para nabáninu lu Guidxilayú? ¿Xiñee runi sufrir binni nachaʼhuiʼ? ¿Xi rizaaca binni despué de gatiʼ? ¿Xiñee nuu stale guerra pa ni racalaʼdxiʼ binni nga chuʼ paz? ¿Ñee zanitilú Guidxilayú stinu la? Pa gúʼndaluʼ Biblia la? zadxélaluʼ respuesta stiʼ ca pregunta riʼ, ne stale binni ni huayuni ni huaniʼcaʼ guizáʼ galán ni huabeenducaʼ.
2. ¿Ximodo racané Biblia laanu chuʼnu nayecheʼ guiráʼ dxi yaʼ?
Guizáʼ galán ca conseju rudii Biblia purtiʼ rusiidini ca familia ximodo zanda guibánicaʼ nayecheʼ. Laaca racaneni laanu para cadi tan gaca preocuparnu pur xiixa ne chuuláʼdxinu dxiiñaʼ ni rúninu. Ra maʼ zidúʼndanu publicación riʼ, zaziidiluʼ ximodo zanda gacané Biblia laanu guiénenu ca ni bizéʼtenu riʼ ne xcaadxi cosa. Dede zándaca zudiiluʼ cuenta, guiráʼ ni cá lu Biblia «nuu ni para gusiidini laanu» (2 Timoteo 3:16).
Cadi guiníʼ íqueluʼ publicación riʼ nga chiguiaana lugar stiʼ Biblia. Sínuque zacaneni lii guiéneluʼ xii nga ni rusiidiʼ Biblia. Nga runi, ora maʼ cayuundaluʼ ni galán gúʼndaluʼ ca textu cá luni, zacá zudiiluʼ cuenta guiráʼ ni guiziidiluʼ lu publicación riʼ la? zeedani lu Biblia.
GUIZÍʼDIRUNU JMA
Guidúʼyanu ximodo huayacané Biblia binni, xi zanda gúninu para ganda chuuláʼdxinu ni cadúʼndanu de lu Biblia ne xiñee galán nga gudiʼnu lugar gacané sti binni laanu guiénenu ni nani.
3. Rabi Biblia laanu ximodo naquiiñeʼ guibáninu
Zeeda gaca Biblia casi ti biaaniʼ ni ruzaaniʼ neza ra zizanu. Zacaneni laanu gánnanu guicaanu decisión jneza ne gánnanu xi chiguizaaca despué.
Laguundaʼ Salmo 119:105 ne laiquiiñeʼ ca pregunta riʼ para güitu diidxaʼ:
-
¿Ximodo biiyaʼ hombre bicaa salmo riʼ Biblia?
-
¿Lii yaʼ? ¿Xi riníʼ íqueluʼ de Biblia?
4. Ricabi Biblia ca pregunta rúninu
Biiyaʼ xi nga nabé gunabadiidxaʼ ti gunaa ne ximodo bicabi Biblia pregunta stibe. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
¿Xi gucalaʼdxiʼ gunaa ni rihuinni lu videu riʼ ganna?
-
¿Ximodo gucané Biblia laabe ora bíʼndabe ni?
Biblia ná galán nga gúninu pregunta. Laguundaʼ Mateo 7:7 ne laiquiiñeʼ ca pregunta riʼ para güitu diidxaʼ:
-
¿Ñee rábiluʼ zanda guicabi Biblia ca pregunta rúniluʼ la? ¿Casi gunáʼ yaʼ?
5. Zanda chuuláʼdxinu guidúʼndanu Biblia
Stale tu laa nabé riuulaʼdxiʼ guʼndaʼ Biblia ne cayacaneni laa. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
¿Xi guníʼ ca joven rihuinni lu videu riʼ rizaacacaʼ ora gúʼndacaʼ xiixa?
-
¿Xi racané laacabe chuuláʼdxicabe gúʼndacabe Biblia?
Ni rusiidiʼ Biblia laanu racaneni gatadxí ladxidoʼno ne gápanu esperanza. Laguundaʼ Romanos 15:4 ne laiquiiñeʼ pregunta riʼ para güitu diidxaʼ:
-
¿Ñuuláʼdxiluʼ ñánnaluʼ ximodo riguixhedxí Biblia ladxidoʼno ne ximodo rudiini laanu esperanza la?
6. Zanda guiénenu ni ná Biblia pa gudiʼnu lugar gacané sti binni laanu
Galán nga gúʼndaluʼ Biblia stúbiluʼ, peru stale tu huaníʼ jma galán ora chuʼ ti binni gusiene ni laa. Laguundaʼ Hechos 8:26-31 ne laiquiiñeʼ pregunta riʼ para güitu diidxaʼ:
-
¿Xi caquiiñenu para guiénenu ni ná Biblia? (Laguuyaʼ ni ná versículo 30 ne 31).
Hombre de Etiopía que guníʼ caquiiñeʼ gacané tuuxa laa guiene ni ná Biblia. Ca dxi nabáninu riʼ, stale tu riníʼ jma galán pa gudiicaʼ lugar gacané sti binni laacaʼ guiénecaʼ ni ná Biblia.
NUU TU NÁ: «Cunítisiluʼ tiempu nga gúʼndaluʼ Biblia».
-
¿Lii xi rábiluʼ yaʼ? ¿Xiñee riníʼ íqueluʼ zacá ni yaʼ?
XI BIZÍʼDINU
Galán ca conseju ni rudii Biblia laanu purtiʼ zanda gacaneni laanu guiráʼ dxi, ricábini ca pregunta stinu, riguixhedxini ladxidoʼno ne rudiini laanu esperanza.
Xi biziidiluʼ
-
Bizeeteʼ xi clase conseju zanda guidxélanu lu Biblia.
-
¿Gunáʼ nga caadxi de ca pregunta ni ricabi Biblia?
-
¿Xi ñuuláʼdxiluʼ ñánnaluʼ de lu Biblia?
BIIYAʼ XIRUʼ ZANDA GUIZIIDILUʼ
Biiyaʼ ximodo zanda gacané ca conseju zeeda lu Biblia laanu ca dxi nabáninu riʼ.
«Qué ziuu dxi gusaana de gacané Biblia laanu» (Torre stiʼ ni rapa, núm. 1 2018)
Biiyaʼ ximodo gucané Biblia ti hombre ni bíʼnicabe menu laa dede dxi nahuiiniʼ.
Biiyaʼ xi conseju galán rudii Biblia laanu para ganda guibaninenu familia stinu nayecheʼ.
«12 cosa ni zanda gacané familia stiluʼ guibani nayecheʼ» (¡Gutaná! núm. 2 2018)
Biiyaʼ ximodo rusiene Biblia tuu nga cayuni mandar guidxilayú.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
