ပှၤအါဂၤန့ၣ် အိၣ်ဒီးတၢ်ကီတၢ်ခဲတဖၣ် လၢအမၤသးအုးအဝဲသ့ၣ်, မၤကိၢ်မၤဂီၤအဝဲသ့ၣ် ဒီးမၤဆါအဝဲသ့ၣ်. တၢ်ကဲထီၣ်အသးဒီးနၤ ဒ်န့ၣ်တဘျီဘျီဧါ. မ့ၢ်လၢနအိၣ်ဒီး တၢ်ဆူးတၢ်ဆါ မ့တမ့ၢ် ပှၤလၢနအဲၣ်တဂၤဂၤ သံကွံာ်အဃိ ဘၣ်သ့ၣ်သ့ၣ် နၤစ့ၢ်ကီး နကတူၢ်ဘၣ်ဒ်န့ၣ် ဒီးဘၣ်သ့ၣ်သ့ၣ် နကဆိကမိၣ်ဘၣ်လၢ ‘ယတၢ်အိၣ်မူအံၤ မုာ်ထီၣ်က့ၤကန့ၢ်ဒံးဧါ.’ လံာ်စီဆှံဟ့ၣ်ပှၤ တၢ်သံကွၢ်တဖျၢၣ်အံၤ အတၢ်စံးဆၢ လၢအမၤမုာ်ထီၣ်က့ၤပသး.

၁. ဘၣ်ဃးဒီး ခါဆူညါန့ၣ် လံာ်စီဆှံဟ့ၣ်ပှၤ တၢ်မုၢ်လၢ်ဒ်လဲၣ်.

ဘၣ်မနုၤအဃိ ဟီၣ်ခိၣ်အံၤ အိၣ်ထဲတၢ်ကီတၢ်ခဲလဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ. တကးဒံးဘၣ် လံာ်စီဆှံ ပာ်ဖျါထီၣ် တၢ်သးခုကစီၣ်လၢ တယံာ်လၢၤဘၣ်န့ၣ် ကစၢ်ယွၤ ကမၤလီၤမၢ်ကွံာ် တၢ်ကီတၢ်ခဲတဖၣ်အံၤခဲလၢာ်. လံာ်စီဆှံ အတၢ်အၢၣ်လီၤတဖၣ်န့ၣ် ဟ့ၣ်ပှၤ “တၢ်မုၢ်လၢ် ဒီးတၢ်အိၣ်မူလၢ အဂ့ၤလၢ ခါဆူညါ” သ့လီၤ. (ဖး ယံးရမံယၤ ၂၉:​၁၁, ၁၂.) တၢ်အၢၣ်လီၤတဖၣ်အံၤ မၤစၢၤပှၤဒ်သိး ပလဲၤခီဖျိ ပတၢ်ကီတၢ်ခဲကန့ၢ် ဒီးပကအိၣ်ဒီးတၢ်ထံၣ်လၢအဂ့ၤ. တကးဒံးဘၣ် တၢ်အၢၣ်လီၤတဖၣ်အံၤ ဒုးနာ်န့ၢ်ပှၤ သပှၢ်တၢၢ်လၢ ပကအိၣ်ဒီး တၢ်သးခုလၢခဲအံၤ ဒီးခါဆူညါ လီၤထူလီၤယိာ်လီၤ.

၂. လံာ်စီဆှံ အၢၣ်လီၤဝဲလၢ ခါဆူညါန့ၣ် တၢ်အိၣ်သး ကမၤသးဒ်လဲၣ်.

လံာ်စီဆှံ တဲဝဲလၢ ခါဆူညါန့ၣ် “တၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.” (ဖး လီၣ်ဖျါ ၂၁:၄.) တၢ်ကီတၢ်ခဲတဖၣ် လၢပှၤဟီၣ်ခိၣ်ဖိထံၣ်ဘၣ်ဝဲ လၢမုၢ်မဆါတနံၤအံၤ ဒ်သိးဒီး တၢ်ဖှီၣ်တၢ်ယာ်, တၢ်တတီတလိၤ, တၢ်ဆူးတၢ်ဆါ ဒီးတၢ်သံန့ၣ် တအိၣ်လၢၤဘၣ်. လံာ်စီဆှံ အၢၣ်လီၤဝဲလၢ ပှၤဟီၣ်ခိၣ်ဖိ ကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ် လၢဟီၣ်ခိၣ်ပၤရဒံစူး အပူၤလီၤ.

၃. လံာ်စီဆှံ အတၢ်အၢၣ်လီၤတဖၣ် ကဟဲလၢထီၣ်ပှဲၤထီၣ် နီၢ်ကီၢ်န့ၣ် နနာ်အီၤသ့ဧါ.

ပှၤအါဂၤ မုၢ်လၢ်ဝဲလၢ ဟီၣ်ခိၣ်အတၢ်အိၣ်သးတဖၣ် ကဂ့ၤထီၣ်က့ၤ. ဘၣ်ဆၣ် အဝဲသ့ၣ် အတၢ်မုၢ်လၢ် ကဟဲလၢထီၣ်ပှဲၤထီၣ် နီၢ်ကီၢ်ဧါန့ၣ် အဝဲသ့ၣ် တသ့ၣ်ညါဝဲ လီၤတံၢ်ဘၣ်. သနာ်က့ တၢ်လၢလံာ်စီဆှံ အၢၣ်လီၤဝဲတဖၣ်န့ၣ် ကဟဲလၢထီၣ်ပှဲၤထီၣ် နီၢ်ကီၢ်. အဃိ ပမ့ၢ် ‘ဃုကွၢ်တၢ်ကွဲးအသးတဖၣ် လီၤတံၢ်လီၤဆဲး’ န့ၣ်ပတၢ်နာ် လၢလံာ်စီဆှံ အတၢ်အၢၣ်လီၤတဖၣ်အံၤ အဖီခိၣ်န့ၣ် ကအါထီၣ်ဝဲ. (မၤတၢ် ၁၇:၁၁) နမ့ၢ်မၤလိ လံာ်စီဆှံန့ၣ် တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်တဖၣ် နနာ်အီၤသ့ဧါ တသ့ဘၣ်ဧါန့ၣ် နသ့ၣ်ညါနီၤဖးအီၤ ကဘၣ်လီၤ.

 ဃုသ့ၣ်ညါအါထီၣ်

၄. လံာ်စီဆှံ အၢၣ်လီၤဝဲလၢ ပကအိၣ်မူဘၣ် လီၤထူလီၤယိာ် ဒီးတၢ်ကီတၢ်ခဲ တအိၣ်နီတမံၤလၢၤဘၣ်

ကွၢ်လံာ်စီဆှံ အတၢ်အၢၣ်လီၤ လၢလာ်တဖၣ်အံၤ. အထုးန့ၢ်နသးဒိၣ် ဖဲလဲၣ်တခါလဲၣ်. ဘၣ်မနုၤအဃိ အထုးန့ၢ်နသးလဲၣ်.

ဖးလံာ်စီဆှံ အဆၢတဖၣ် လၢအဘၣ်တၢ်ပာ်ဖျါထီၣ်အီၤ ဖဲတၢ်အၢၣ်လီၤတဖၣ်အံၤ အကပၤ ဒီးဆိကမိၣ်ထံ တၢ်သံကွၢ် လၢလာ်တဖၣ်အံၤ–

• မ့ၢ်နဆိကမိၣ် လံာ်စီဆှံအဆၢတဖၣ်အံၤ ကဲဘျုးလၢ နဂီၢ်ဧါ. နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်မၤလိဘၣ် လံာ်စီဆှံ အဆၢတဖၣ်အံၤန့ၣ် နဆိကမိၣ် အကကဲဘျုးလၢ အဝဲသ့ၣ် အဂီၢ်စ့ၢ်ကီးဧါ.

ထံၣ်တမှံကွၢ်လၢ နအိၣ်မူဘၣ်လၢဟီၣ်ခိၣ် ဖဲတၢ်အိၣ်သး လၢအတဂ့ၤဘၣ် တအိၣ်နီတမံၤလၢၤဘၣ်အခါ.

 ၅. တၢ်အၢၣ်လီၤတဖၣ်လၢ လံာ်စီဆှံအပူၤန့ၣ် မၤစၢၤပှၤဒ်သိး ပကအိၣ်ဒီး တၢ်ထံၣ်လၢအဂ့ၤ

 တၢ်ဂ့ၢ်လၢအရ့ဒိၣ်

လၢလံာ်စီဆှံအပူၤန့ၣ် အိၣ်ဒီးတၢ်အၢၣ်လီၤတဖၣ် လၢအမၤသးခုပသးဒိၣ်မး ဒီးအဟ့ၣ်ပှၤ တၢ်မုၢ်လၢ်အဃိ ပလဲၤခီဖျိတၢ်ကီတၢ်ခဲ လၢဆၢကတီၢ် ခဲအံၤသ့.

တၢ်ကွၢ်ကဒါက့ၤ

• ဘၣ်မနုၤအဃိ ပှၤကဘၣ်သ့ၣ်ညါ ဘၣ်ဃးဒီး ကစၢ်ယွၤ အတၢ်အၢၣ်လီၤတဖၣ်လဲၣ်.

• ဘၣ်ဃးဒီး ခါဆူညါအဂ့ၢ်န့ၣ် လံာ်စီဆှံ တဲဝဲဒ်လဲၣ်.

• ပတၢ်မုၢ်လၢ် လၢအဘၣ်ဃးဒီး ခါဆူညါန့ၣ် ကမၤစၢၤပှၤ လၢဆၢကတီၢ်ခဲအံၤဒ်လဲၣ်.