DILONGESHA 02
Bible udi ukupetesha ditekemena dia malu mimpe
Bantu ba bungi pa buloba badi ne ntatu idi ibabungamija, ibakengesha, ne ibapetesha tunyinganyinga. Ukadi pebe mutuilangane ne nsombelu ya nanku anyi? Pamuapa udi utata ne disama anyi bua muudi mufuishe. Udi mufuane kudiebeja ne: nsombelu neakanaku dimue dituku anyi? Bible udi wandamuna lukonko elu bimpe be!
1. Bible udi utupetesha ditekemena mushindu kayi?
Bible udi uleja bua tshinyi buloba mbuwule tente ne ntatu. Udi umanyisha kabidi bantu lumu luimpe lua ne: ntatu eyi nya tshitupa tshîpi, ne mu katupa kîpi emu neyijike. Milayi ya mu Bible idi mua ‘kukupetesha matuku atshilualua mimpe ne ditekemena.’ (Balayi Yelemiya 29:11, 12.) Milayi eyi idi ituambuluisha bua kutantamena ntatu itudi nayi lelu, kuikala ne muoyo mukole, ne kupeta disanka dia kashidi.
2. Mmatuku atshilualua a mushindu kayi adi Bible utulaya?
Bible udi umvuija matuku atshilualua ne: “Lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.” (Balayi Buakabuluibua 21:4.) Malu adi apangishangana bua kuikala ne ditekemena lelu bu mudi bupele, kansungansunga, masama, ne lufu kabiakuikalaku kabidi to. Bible udi ulaya ne: bantu nebashale basanka ne muoyo kashidi mu Mparadizu pa buloba apa.
3. Bua kutuishibua ne: ditekemena didi Bible utupetesha nedikumbane, mbimpe wewe kuenza tshinyi?
Bantu ba bungi badi bajinga ne: malu mimpe enzeke kumpala eku. Kadi ki mbajadike ne: malu au neenzeke anyi kaakuenzeka to. Malu adi Bible yeye ulaya neakumbane too ne mu katoba. Wewe ‘ukonkonona mifundu bimpe menemene,’ neufike ku dituishibua ne: malu atudi tutekemena au neakumbane. (Bienzedi 17:11) Paudi wenda ulonga Bible, neumanye mua kudisunguila bua kuitaba tshidi Bible wamba bua matuku atshilualua anyi kubenga kutshitaba.
BUELA MU BUONDOKE
Longa malu adi Bible ulaya bua matuku atshilualua. Mona mudi ditekemena didi Bible utupetesha diambuluisha bantu lelu.
4. Bible udi utupetesha ditekemena dia kushala ne muoyo kashidi pa buloba katuyi tutata to
Mu milayi ya mu Bible idi ilonda eyi, mmilayi kayi idi ikusankisha bikole? Bua tshinyi?
Balayi mvese idi muaba udi malu adibu balaye au, pashishe nuandamune nkonko eyi:
-
Kuena umona ne: mvese eyi idi mua kukuambuluisha anyi? Idi mua kupeteshaku bena mu dîku dienu ne balunda bebe ditekemena anyi?
Difuanyikija ukadi mu bulongolodi muikala:
|
MUNTU KAYI MUA . . . |
MUNTU YONSO MUA . . . |
|---|---|
|
|
|
|
|
|
|
|
|
|
5. Ditekemena didi Bible utupetesha didi mua kukuambuluisha
Bantu ba bungi mbatekete mu mikolo bua malu mabi adi enzeka miaba idibu bansombele. Mbipeshe ne bamue tshiji tshia bungi. Bakuabu badi baluangana bua kushintulula malu miaba idibu. Mona mudi mulayi wa mu Bible wa ne: malu onso neakane muambuluishe bantu lelu. Tangilayi FILME, pashishe nuandamune nkonko eyi:
-
Mu filme eu, mmalu kayi mabi avua atonda Rafika?
-
Nansha muvua malu mabi avuaye umona kaayi majike, mmushindu kayi uvua Bible mumuambuluishe?
Ditekemena didi Bible utupetesha bua matuku atshilualua didi mua kukuambuluisha bua kuluisha ditekeshibua mu mikolo ne kumanya mua kupita ne ntatu bimpe menemene. Balayi Nsumuinu 17:22 ne Lomo 12:12, pashishe nuandamune nkonko eyi:
-
Mukenji wa ditekemena udi mu Bible udiku mua kukuambuluisha mu nsombelu webe lelu anyi? Bua tshinyi?
BAMUE BATU BAMBA NE: “Bible mmuele kalele bua bidiye ulaya bua matuku atshilualua.”
-
Bua tshinyi bidi ne mushinga bua wewe kukeba mua kudijadikila malu au nkayebe?
TSHIA KUKUATA
Milayi ya mu Bible ya masanka atshilualua idi itupetesha ditekemena ne ituambuluisha bua kutantamena ntatu mpindieu.
Diambulula
-
Bua tshinyi bantu badi dijinga ne ditekemena?
-
Ntshinyi tshidi Bible wamba bua matuku atshilualua?
-
Mmunyi mudi kuikala ne ditekemena mua kukuambuluisha anu ku mpindieu?
BIA KUTANGILA KABIDI
Mona mudi ditekemena mua kukuambuluisha paudi mu ntatu.
“Nkuepi kuudi mua kupetela ditekemena?” (Tabulukayi! 22/4/2004)
Mona mudi ditekemena mua kuambuluisha bantu badi ne masama a munanunanu.
Paudi wenda ulonda musambu eu, difuanyikija wewe ne bena mu dîku dienu bikale ne muoyo mu Mparadizu udi Bible ulaya bua matuku atshilualua.
Bala bualu bua muvua muntu uvua uluila dishintuluka dia malu panu mushintulule nsombelu wende pakamanyaye bualu bua ditekemena didi Bible ufila bua matuku atshilualua.
“Tshiena kabidi ne meji a kushintulula malu a pa buloba to” (Tshibumba tshia Nsentedi 1/7/2013)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
