CILONGESA 02

Mbimbiliya ye ku Hana Lulavelelo

ZIKULENU

Vantu mu mavu ose ve ku pinda na visoti vie ku va kokela vusiua, ku lisosomua, ni vene ku vavala. Nenu mua hitaho laza mu visoti viaco ni? Ca ku muenako, halumo muli na ku pinda na vumo vuvezi vua kama ni mu na tsisa umo muntu i mua lema. Kaha mu hasa ku lihula nguenu: ‘Vuno visoti tangua vi ka hua vene ni?’ Mbimbiliya ya hana cikumbululo ci vuisa ndzolela ku cihula eci.

1. Vati Mbimbiliya ye ku Hana Lulavelelo?

Mbimbiliya ka ya lomboluele lika omo lia vika mavu a na sulu na visoti, vunoni ya muesa naua muzimbu ua cili ngecize visoti vi li na ntsimbu, kaha vuovuno vi ka hua. Vikulaheso via mu Mbimbiliya, vi hasa ku mi hana “lulavelelo.” (Tandenu Yelemiya 29:11, 12.) Lulavelelo luaco, lu hasa ku tu kuasa ku lua na visoti vietu na ku yoya mu ndzolela cipue mu ntsimbu ino vene. Kaha via tu hana naua vusunga ngecize tangua tu ka yoya mu ndzolela ku miaka yose.

2. Vika ya Handeka Mbimbiliya ku tuala ha viuma vi ka soloka ku lutue?

Mbimbiliya ya handeka nguayo, “ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala.” (Tandenu Ku-Solola 21:4.) Viuma vie ku kokela vantu visoti lelo lino, ngeci mua vuhutu, vuhenge, mavezi na ku-tsa ka vi ka kalako naua. Mbimbiliya ya kulahesa ngecize vantu tangua va ka yoya mu ndzolela ku miaka yose mu Citungu ha mavu.

3. Vati mu hasa ku kala na vusunga ngecize vi ya kulahesa Mbimbiliya tangua vi ka lipuisamo?

Vantu va vengi va lavelela viuma via cili, vunoni ka va kele na vusunga nga viuma vi va lavelela tangua vi ka lipuisamo mpundu. Vunoni viose vi ya kulahesa Mbimbiliya, tangua vi ka lipuisamo. Kaha tu hasa ku kaniamesa lulavelelo luetu mu ku ‘hilula visoneka.’ (Vilinga 17:11) Omo mu lilongesa Mbimbiliya, mu ka lihanguila enu vavene nga mu ka tsiliela vi ya handeka Mbimbiliya ku tuala ha viuma vi ka soloka ku lutue.

TANTEKEYENU VIKUAVO

Hilulenu vimo vikulaheso via ku lutue vi ya hana Mbimbiliya. Kaha talenu naua vati lulavelelo luaco lu li na ku kuasa vantu lelo lino.

4. Mbimbiliya ya kulahesa muono ua ya-ye mu vutantuluke

Talenu mukana ua vikulaheso via mu Mbimbiliya vi na hatako. Cikulaheso cika mu na lemeho cikuma? Omo lia vika?

Tandenu vinimbu vi va na tumbula ku mukulo ua vikulaheso viaco, kaha hilulenu evi vihula:

Mu ku mona cenu, vuno evi vinimbu vie ku hana vene lulavelelo ni? Vuno vavusoko vuenu na vavusamba, navo ci hasa ku va kuasa ku tanda evi vinimbu ni?

Singaniekenu ku yoyela mu mavu a ku linga:

NA UMO UAHI . . .	VUNONI VOSE . . .
a ka yanda, ku kulupa, ni ku tsa.—Isaya 25:8.	va ka mona ku sanguka ca vantu va va lema.—Yoano 5:28, 29.
a ka vavala ni ku pinda na vumo vulema vua ha muvila.—Isaya 33:24; 35:5, 6.	va ka kala na cihindu ca ku tantuluka na ku pua vakuendze.—Yombi 33:25.
a ka hita mu vuhenge.—Isaya 32:16, 17.	va ka kala na via-ku-lia via vingi, ndzivo ya cili na vipanga via cili.—Visamo 72:16; Isaya 65:21, 22.
a ka yanda omo lia ndzita.—Visamo 46:9.	va ka yoyela mu mavu a ciyulo ca vutuntu.—Visamo 37:11.
a ka yanda na visinganieka via ku vihia ni ku vuluka viuma vi mu vavalesa ku mutima.—Isaya 65:17.	va ka yoya miaka ya ya-ye mu vutantuluke.—Visamo 37:29.

5. Lulavelelo lua mu Mbimbiliya lu hasa ku mi kuasa cikuma

Vavengi ve ku ivua vusiua ni vene matoto mu ve ku mona visoti kuose ku va talela. Ngeci vamo ve ku seteka ku alulula viuma mu cifuti cavo ni mu mavu ose. Talenu vati cikulaheso ca Mbimbiliya ca muesa ngecize vuovuno viuma vi ka vuaha, ci li na ku kuasa vantu mu ntsimbu ino vene. Talenu VIDEO, na ku simutuila ha vihula vi na hatako.

VIDEO: Nja Tondele Mavu a ku Hona Vuhenge (4:07)

Mu video, vuhenge vuka ua zindile Rafika?
Vutuhu vuhenge vua muene ka vua huile, vati Mbimbiliya ya mu kuasele?

Lulavelelo lu ya hana Mbimbiliya ku tuala ha muono ua ku lutue, lu hasa ku tu kuasa ku-lua na vusiua kaha na ku yoya mu ndzolela cipue nga tuli mu visoti. Tandenu Visimo 17:22 na Loma 12:12, kaha mu nima yaco simutuilenu ha vihula vi na hatako.