YACHACHINA 02

Biblia suyana ckoáysh

REPRODUCIYTA EN

Túcuy mundu sajras imastis usushcan chay ckopucun ashca lláquiy, afliciún y nánay. ¿Ckam chayta llalleranqui? Nacha usus tianqui suj ónckoy o huañusckanraycu suj aillu munascka, y tapunacunqui huaquin punchau imastis allichácoj ʼrincu. Biblia chayta contestan y chay yanapaaycu.

1. ¿Ima suyana Biblia ckon?

Biblia niaycu ímaj ancha ashca mana alli imastis mundupi llallin. Y nátaj, ckoaycu cá ancha súmaj noticias cá mana alli imastis maa unáypaj caj ʼrincu y maa unas chincácoj ʼrincu. Promesas Bibliamanta ckamta atin ckosuyta «suj ámoj pacha y suyana» (léey Jeremías 29:11, 12). Cá promesas yanapaaycu cunan aguantayta afliciunes y suj alli layamanta pusayta. Seguridad ckoaycu unáypaj cusisckas cayta atiycu.

2. ¿Imát niaycu Biblia ámoj pachamanta?

Biblia ʼriman suj ámoj pachamanta maypi «na mana tíaj ʼrin huáñuy ni úsuy ni nánay» (léey Apocalipsis 21:4). Na maa tíaj ʼrincu afliciunes ima ancha usuchiaycu, múchuy ina, injusticia, onckoycuna y huáñuy. Biblia nin persunas cusisckas causanckancu cay ashpapi suj jardín ina captin.

3. ¿Ímaj confiayta suyanapi ima Biblia ckon?

Ashca persunas suyancu imastis allichacunancunát, pero chay llallinanta maa segurus tiancu. Bibliaan chay maa llallin. Atiycu confiayta promesasninpi estudiaspá «cuidauan Escriturasta» (Hechos 17:11). Bibliát estudiaspá, ckamlla convecécoj ʼrinqui Biblia nisckanta ámoj pachamanta.

ASTAAN ESTUDIANÁYSH TÍAN YACHÁYPAJ

Ckaasúysh promesas Bibliamanta ámoj pachaycúpaj. Ckaasúysh imaina cá suyana yanapashcan ashca persunasta cunan punchau.

4. Biblia suyana ckoáysh causáypaj únay unáypaj maa defetusníyoj

Ckáay cá promesas ima Bibliapi taricun. ¿Mayckan huajyasun astaan atenciún? ¿Ímaj?

Leeychis testus Bibliamanta ima cá promesasmanta ʼriman y ʼrimaychis cá tapunasmanta:

¿Creenquichu Bibliapi leesckaycu suyana ckon? Pénsay ailluspi y yanasuspi, ¿paycunát yanapapucunman?

Ckaanacunqui na causas suj chayna mundupi:

NI PIPAS...	TÚCUY MUNDU...
... úsoj ʼrin, viejóyaj ʼrin ni huañunan tiancka (Isaías 25:8).	... ckáaj ʼrin aillusnincu munasckas causachickas captincuna o voliacuptincuna causáypaj caypi ashpapi (Juan 5:28, 29).
... maa ónckoy ápej ʼrin y nima afliciun (Isaías 33:24; 35:5, 6).	... maa ónckoj ʼrin y suj muchachu ina cáusaj ʼrin (Job 33:25).
... maa injusticias úsoj ʼrin (Isaías 32:16, 17).	... ashca micúypaj, suj ancha súmaj huasi y llámcay ápej ʼrin (Salmo 72:16; Isaías 65:21, 22).
... úsoj ʼrin guérrap tumpanraycu (Salmo 46:9).	... cusícoj ʼrin paspi tias (Salmo 37:11).
... cáusaj ʼrin sustuscka maa alli pensamientusraycu o sajra imastis yuyas (Isaías 65:17).	... unáypaj cáusaj ʼrincu y ancha cusisckas (Salmo 37:29).

5. Suyana ima Biblia ckon causayniyshta allichayta atin

Ashca persunas ancha desengañasckas senticuncu y piñacus tiancu cá múndup afliciunesninpa tumpanraycu. Huaquincuna túcuy atisckancuta ʼruancu imastista allichanaas. Ckáay imaina Biblia nin túcuy allichácoj ʼrin y na yanapashcan ashca persunasta cunan punchau. Ckaaychis VIDIU y ʼrimaychis cá tapunasmanta:

VIDIU: Pelianaarani injusticias puchucanancúpaj (4:07)

Imaina vidiupi ckaaraycu, ¿ima injusticia Rafika ckáaj cara?
Amapas injusticias ima pay ckáaj cara maa chincacorancu, ¿imaina Biblia nisckan yanapara?

Suyana ima Biblia ckon atin yanapaayshta desengañu chincayta y afliciunesniyshta allichayta suj alli cayan. Leeychis Proverbios 17:22 y Romanos 12:12 y ʼrimaychis cá tapunasmanta: