YAĆHACHICUY 2

Bibliami yanapamanchic allin cawsanapä

LIMAY

Enterun allpaćhu, nunacunaca ñacaculcan ñatac llaquisha cayalcan sasachacuycunapï. Amta chay, ¿pasaśhulanquichun? Ichapishćha ñacacunqui ishyaycawan o mayan cuyaśhayqui wañucuśhampï, tapucunquichun, imayćha camacan’a cay sasachacuycunaca nil. Bibliaca nishan’a cushichimanchicmi.

1. ¿Ima allin willacuytam Bibliaca umanchic?

Bibliaca willamanchicmi imapïmi cayan achca sasachacuycuna. Niamanchicmi cay llapan sasachacuycunaca prontuñam chincan’a. Bibliaca nishan uśhunquim “śhamü timpucunaćhu allin cawsayćhu capäcunayquipämari” (liguicuy Jeremías 29:11, 12). Bibliaca willacuśhan yanapamäśhunmi sasachacuyninchiccunapi canan, ñatac allin cananchicpä. Chaymi yanapaycamanchic alli seguru cananchicpä, cushisha cawsananchicpä wiñay-wiñaypä.

2. ¿Ima ninmi Bibliaca śhamü tiempupi?

Bibliaca limayanmi śhamü tiempućhu “manañam can’añachu wañuypis, awćhuypis, wa’acuypis, nanaypis” (liguicuy Apocalipsis 21:4). Aw, manañam can’añachu sasachacuycunaca ñacachimananchicpä, wacchacayca, juyu lulayca, ishyaycunaca ñatac wañuyca. Bibliaca seguramanchicmi nunacunaca cawsapäcun’a wiñay-wiñaypämi paraisućhu cay allpaćhu.

3. ¿Imam yanapaśhunqui confianayquipä Biblia nishanman?

Achca nunacunam munapäcun imapis allin cananta, pero ishcayapäcunmi cay pasananta. Bibliawan manam chay pasanchu. Confiaśhunmi Dios nimaśhanchicman aw ‘cada muyunmi Bibliata estudiachwan’ (Hechos 17:11). Cayta lulal quiquiquim confianqui Diospa promesanman śhamü tiempupä.

MASTA YAĆHAYCUŚHUN

Yaćhaśhun waquinnin promesacunacta, Biblia niśhanta śhamü tiempupä. Licaśhun imanuypam yanapaycun juc nunacunacta Biblia nishan.

4. Bibliaca nin, mana ñacacullal wiñay-wiñaypämi cawsaśhun

Licay cay promesacunata Bibliaca umaśhanchicta. ¿Mayannintam cumplinanta munanqui?

Liguiśhun Bibliapi textuncunacta cayćhu camaläcunata, ñatac limaśhun chaypi:

Bibliapi cay textocunaca, ¿yanapamachwanchućh? ¿Yanapanmanchućh familiayquita o amiguyquicunacta?

Täntiay, caynümi cawsanqui:

MANAÑAM...	LLAPA NUNACUNA...
... llaquicünquichu nï yaśhamanquichu nï wañunquichu (Isaías 25:8)	... licapäcun’am familiancunacta cawsamuśhanta (Juan 5:28, 29)
... ishyanquichu (Isaías 33:24; 35:5, 6)	... cawsapäcun’a sanullam wamla walaśhnülla (Job 33:25)
... lulapäcun’achu mana allincunacta quiquin pula (Isaías 32:16, 17)	... uywapäcun’a achca micuyta, wasicta ñatac allin trabajucta (Salmo 72:16; Isaías 65:21, 22)
... guerrapis can’achu nï ñacacuycunapis (Salmo 46:9)	... jawcallam cawsapäcun’a (Salmo 37:11)
... yalpaśhunchu juyu lulaycunaca pasamaśhanchicta (Isaías 65:17)	... cushisham cawsapäcun’a wiñay-wiñaypä (Salmo 37:29)

5. Biblia nishanca yanapamanchic allin cawsananchicpä

Canan tiempo achca nunacunam llaquisha cayalcan, ñatac piñacalalisha sasachacuycunapï. Waquinnincuna callpanchaculcan imacunactapis allichananpä cay mundućhu, pero manam puydipäcunchu. Bibliaca ninmi lluy imacunapis allichacun’am, cay yanapanmi achca nunacunacta. Licaśhun VIDEUCTA ñatac limaśhun caypi:

VIDEO: Quería luchar contra las injusticias (4:07)

Video licaśhayquinü, ¿imapïmi Rafika llaquicuśha cayala?
Masqui jinalla nunacunaca ćhininacuyaptinpis, ¿imanuypam payta yanapala Bibliaca?

Biblia nishanca yanapamäśhun cushisha cawsananchicpä ima sasachacuycuna captinpis. Liguiśhun Proverbios 17:22 ñatac Romanos 12:12, ñatac limaśhun caypi: