ADZESUA 03
Aso Ibotum Dze Woho Ato Nsɛm A Ɔwɔ Bible Mu No Do?
Bɔhyɛ ahorow nye afotusɛm pii ahyɛ Bible no mu ma. Bi a na epɛ dɛ ihu Bible no mu nsɛm no yie, naaso bi so a na wo tsirmu nntsen wo papa wɔ Bible no ho. Sɛ ehwɛ mbrɛ Bible no esi akyɛr no a, aso ɔsɛ dɛ inya awerɛhyɛmu wɔ no bɔhyɛ nye n’afotusɛm ahorow no mu? Bible no mu nsɛm a ɔnye dɛ yebotum enya enyigye mapa ndɛ nye daakye no, aso ibotum agye edzi? Nyimpa ɔpepem pii gye Bible no mu nsɛm dzi. Ɔwodze, ma yensusu ho kakra nhwɛ, na bi a woara so bɛgye edzi.
1. Bible no mu nsɛm no, aso ɔyɛ nokwar anaa ɔyɛ ndaadaa?
Bible no ankasa ka dɛ, no mu nsɛm no yɛ “nokwar nsɛm.” (Ɔsɛnkafo 12:10) Nyimpa a Bible no ka hɔnho asɛm no tsenaa ase ankasa, na nsɛm a ɔka no so sisii ankasa. (Kenkan Luke 1:3; 3:1, 2.) Nyimpa, mbea, mber a nsɛm bi sisii anaa date, nye nsɛm afofor bi a Bible aka ho asɛm no, abakɔsɛm akyerɛwfo nye hɔn a wotutu famu hwehwɛ tsetse ndzɛmba mu no mu piinara aka nsɛm bi dze afoa do dɛ ɔyɛ nokwar.
2. Ebɛnadze ntsi na yebotum aka dɛ Bible no mu nsɛm nntwaa mu?
Nsɛm a Bible no ka no, pii wɔ hɔ a, aber a wɔkyerɛwee no, nna hɔn a wɔwɔ hɔ dɛm aber no nnyi ho nyimdzee biara. Dɛ nhwɛdo no, nsɛm a ɔwɔ Bible mu no, ibi fa abɔdzenyansahu ho. Abɔdzenyansahu ho nsɛm a Bible ka no, ibi wɔ hɔ a aber a wɔkyerɛwee no, nna ɔsor dza nkorɔfo keka wɔ nsɛm a ɔtsetse dɛm ho. Naaso ndɛ, abɔdzenyansahu ada no edzi dɛ dza Bible ka no mbom na ɔyɛ nokwar. Bible no mu nsɛm yɛ nokwar na ‘otsim hɔ daa daa.’—Ndwom 111:8.
3. Dza Bible ka fa daakye ho no, ebɛnadze ntsi na yebotum agye edzi?
Bible no ka nkɔnhyɛsɛm a ahorow bi a ɔma yehu “dza wonnyae nnyɛe no.” (Isaiah 46:10) Nsɛm a osisii tsetse no, pii wɔ hɔ a Bible no kaa ho asɛm too hɔ koraa ansaana orisisi. Afei so, Bible no kaa ndzɛmba pɔtsee bi a ɔbɔkɔ do wɔ hɛn aber yi do ho asɛm, na ne nyina aba mu pɛpɛɛpɛ ma ɔyɛ nwanwa. Wɔ adzesua yi mu no, yebosusu Bible mu nkɔnhyɛ ahorow no bi ho. Mbrɛ wosii nyaa mbamu no yɛ nwanwa ankasa!
PƐNSAPƐNSA MU KƆ EKYIR
Ma yɛnhwɛ mbrɛ nsɛm ahorow bi a abɔdzenyansahufo ka no ndɛ no nye Bible no mu nsɛm hyia. Afei so, Bible mu nkɔnhyɛ ahorow a ɔyɛ nwanwa no, ma yensusu kakraabi ho nhwɛ.
4. Abɔdzenyansahu nye Bible no hyia
Tsetse no, nna nyimpa pii gye dzi dɛ asaase no si biribi do. Ma yɛnhwɛ VIDEO no.
Hwɛ asɛm bi a wɔkyerɛwee wɔ Job nwoma no mu bɛyɛ mfe 3,500 bi a abɛsen kɔ no. Ma yɛnkenkan Job 26:7, na yensusu dɛm asɛmbisa yi ho:
-
Sɛ ehwɛ ber a Job tsenaa ase no a, ebɛnadze ntsi na ɔyɛ nwanwa dɛ otumii kaa dɛ asaase no sɛn “mbrɛ hwee nnyi”?
Ewia ne hyew no twe ehubɔhubɔw fi po mu ma ɔkɔ sor. Afei ɔdan nsu ma ɔsan tɔ gu asaase do, na nsu no san kɔbɔ po mu. Mbrɛ nsu dzi kyinhyia yi, bɛyɛ mfe ahaebien a abɛsen kɔ yi ara na abɔdzenyansahufo retse ase yie. Naaso, hwɛ asɛm bi a Bible no kae bɛyɛ mfe 3,500 a abɛsen kɔ no. Ma yɛnkenkan Job 36:27, 28, na yensusu nsɛmbisa yi ho:
-
Sɛ ehwɛ mbrɛ Bible no esi aka nsu kyinhyia ho asɛm yi a, ebɛnadze ntsi na w’enyi gye ho?
-
Aso kyerɛwnsɛm a ekenkaan no seseiara yi ama enya ahotodo kɛse wɔ Bible no mu?
5. Bible no hyɛɛ nsɛm bi ho nkɔm too hɔ ansaana orisisi
Ma yɛnkenkan Isaiah 44:27–45:2, na yensusu dɛm asɛmbisa yi ho:
-
Ebɛn nsɛm pɔtsee na Bible no kae faa Babylon n’asehwe ho bɛyɛ mfe 200 ansaana orinya mbamu?
Abakɔsɛm foa do dɛ Persiahen Cyrus nye no nsordaafo dzii Babylon do konyim wɔ afe 539 A.H.B. b Dza wɔyɛe nye dɛ, nsu a nna ɔbɔ kurow no ho ban no, wɔdaan n’enyi faa beebi ma ɔwewee. Babylonfo no anntotow hɔn aponkɛse no mu, ntsi Persiafo no hɛɛn mu, na wɔfaa kurow no a wɔannye Babylonfo no annko. Asɛm yi sii no, mfe bɔbor 2,500 etwa mu, naaso Babylon da ho ara yɛ amamfo. Ma yɛnhwɛ dza Bible no kae too hɔ.
Ma yɛnkenkan Isaiah 13:19, 20, na yensusu dɛm asɛmbisa yi ho.
-
Sɛ ehwɛ dza ɔtoo Babylon no a, ebɛnadze ntsi na yebotum aka dɛ dɛm nkɔnhyɛ yi aba mu?
Sɛ ekɔ Iraq ndɛ a, ibohu Babylon n’amamfo wɔ hɔ
6. Dza yehu dɛ ɔrokɔ do ndɛ no, Bible aka ato hɔ dadaada
Bible no ka dɛ mber a yɛtse mu yi yɛ “nda a odzi ekyir.” (2 Timothy 3:1) Ɔwodze, ma yɛnhwɛ dza Bible no kaa dɛ ɔbɔkɔ do wɔ nda a odzi ekyir yi mu.
Ma yɛnkenkan Matthew 24:6, 7, na yensusu dɛm asɛmbisa yi ho:
-
Ebɛn nsɛm na Bible no kaa dɛ obesisi wɔ nda a odzi ekyir yi mu?
Ma yɛnkenkan 2 Timothy 3:1-5, na yensusu nsɛmbisa yi ho:
-
Ebɛn suban ahorow na Bible no kaa dɛ nkorɔfo bɛda no edzi wɔ nda a odzi ekyir yi mu?
-
Suban ahorow no, no mu hendze na ihu dɛ ɔrokɔ do?
BINOM KA DƐ: “Bible no dze, akɔhwisɛm nye atsetsesɛm ara nko.”
-
Wɔ w’afamu no, ebɛnadze na ɔma egye dzi papaapa dɛ yebotum enya awerɛhyɛmu wɔ Bible no mu?
DZA ESUA
Abakɔsɛm, abɔdzenyansahu, nye nkɔnhyɛsɛm ahorow no nyina da no edzi dɛ, yebotum dze hɛnho ato nsɛm a ɔwɔ Bible mu no do.
Mbobɔdo
-
Ehwɛ a, Bible no mu nsɛm no yɛ nokwar anaa ɔyɛ ndaadaa?
-
Nsɛm a abɔdzenyansahufo aka a ɔnye Bible no mu nsɛm hyia no, ibi nye dɛn?
-
Ehwɛ a, Bible no tum kyerɛ dza obesi daakye? Ebɛnadze ntsi na ereka dɛm?
HWEHWƐ PII KA HO
Aso Bible no ka nsɛm bi a ɔnnye abɔdzenyansahu nnhyia?
“Ana Abɔdzenyansahu Nye Bible No Hyia?”(Asɛm bi a ɔwɔ wɛbsaet do)
Nokwasɛm a ɔfa “nda a odzi ekyir” no ho nye dɛn?
“Bible Mu Nkɔnhyɛ 6 Bi A Orinya Ne Mbamu Ndɛ” (Ɔweɔn-Aban, May 1, 2011)
Bible no hyɛɛ nkɔm ahorow bi faa Greece Ahenman no ho. Hwɛ mbrɛ iyi baa mu.
Hwɛ mbrɛ Bible mu nkɔnhyɛ ahorow sesaa adwen a ɔbarimba bi wɔ wɔ Bible no ho.
“Emidze, Nna Menngye Nndzi Dɛ Nyankopɔn Bi Wɔ Hɔ” (Ɔweɔn-Aban No. 5 2017)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
