03 NU GÈ NÒ
É Kọ Òó Láá Dẹlẹ Nyíé Boo Gbò Nú E Kpá Káí Kọ́?
Gã́bug zìgànù nè dùùlà bá deè tṍ di mm̀ Kpá Káí. Be à sẹlẹ, àé láá tàn ni gè nyimá nú ea kọ́, sõò ò íè bàà-bàà bùlà ea kil ló gbò nú ea nóòmà. É kọọ̀ à bọ́ló kọ ó dẹlẹ nyíé boo gbò zìgànù nè dùùlà bá deè tṍ ea di mm̀ kpá ea ni dú nómáí? É kọ òó láá dẹlẹ nyíé boo nú e Kpá Káí kọ́ ea kil ló gè dé kpéè ló dùm kátogóí nè dì deèsĩ́? Gã́bug gãà gbò nen zigà naa vó. Be à sẹlẹ olo é láá dẹlẹ nagé nyíé boo.
1. É kọọ̀ gbò nòòtẽ́ ea di mm̀ Kpá Káí dú gé kà kà?
Gbò e ba beè emí Kpá Káí kọ́ọ̀ gbò nú ea di m “dú kà kà.” (Ẹ̀klìzíástìs 12:10) Kpá Káí nootẽ́ kà lèlà nú ea beè naaá ló gbò nen. (Bugi Lúùk 1:3; 3:1, 2.) Gã́bug gbò e bà ólò kọ́ nú ea beè naaá nè gbò gbĩ̀tẽ́ ló nu beè mòn kọọ̀ gbò dee, gbò nen, gbò ketõ̀ò, nè gbò nú ea beè naaá e Kpá Káí kọ́ nú ea kil ló dú kà kà.
2. Éé ní ea náa vaá èé láá kọọ̀ dee gáà ta ló gbò nú ea di mm̀ Kpá Káí é?
Kpá Káí ló bel boo gã́bug nú e gbò nen gáà beè nyima tṍó e bà géè emí Kpá Káí. Dì belí nu dòòmà bá, à ló bel boo gã́bug nú ea kil ló sã́ìns. Vaá gbò nen gáà beè nyima kà kà bel ea kil ló gã́bug nú ea kọ́ ea kil ló sã́ìns tṍó ea kil nvéeá. Sõò deè nieí, gbò e bà gé nó nú ea kil ló sã́ìns a mon kọọ̀ gbò nú e Kpá Káí beè kọ̀ dú kà kà. “Èé láá dẹlẹ . . . nyíé boo lọl kátogóí dọ̀ọ̀mà dè-dè.”—Psalm 111:8.
3. Éé ní ea náa à bọ́ló kọ é dẹlẹ nyíé boo nú e Kpá Káí kọ́ kilma ló dì deèsĩ́ ẽ́?
Kpá Káí ólò gbẹẹ́ sĩ́ kọ́ gbò “nú ea gáà zẹẹ naaa.” (Àìzáíà 46:10) A beè gbẹẹ́ sĩ́ kọ́ gbò nú ea gáà naaá vaá à naaá kà lèlà bé ea beè kọ́ naa. A beè kọ́ nágé gbẹẹ́ sĩ́ kà lèlà gbò nú ea gé nááá mm̀ bàlà booí deè nieí. Mm̀ nakà nu gè nòí, èé ló bel boo sìgà gbò nú e Kpá Káí beè gbẹẹ́ sĩ́ kọ àé nááá. Ge kọọ̀ à ḿḿ-mági gbõ̀ònà bé ea beè kọ́ naa é palàge bọọ́ ní ló!
KPÁÁ NÓ BỌ̀Ọ̀VẸ̀
Nyimá bé e nú e gbò e bà gé nó sã́ìns deè nieí kọ́ gbááá ló gbò nú ea di mm̀ Kpá Káí naa, vaá ò gbĩ́tẽ́ ló sìgà gbò nú e Kpá Káí beè kọ́ gbẹẹ́ sĩ́.
4. Gbò nú e gbò e bà gé nó sã́ìns kọ́ gbááá ló Kpá Káí
Tṍó ea kil nvéeá, gbò nen beè olòó zìgà kọọ̀ à íe nú e bàlà booí di boo. Bìlà VÍDIÒÍ.
Nvèè kpíí ló nú e kpá Jóòb beè kọ̀ mm̀ nú ea é dú 3,500 gbáá ea kil nvéeá. Bugi Jóòb 26:7, vaá ò gbóó aalai nakà bíbví:
-
Éé ní ea náa vaá bel ea di mm̀ kpá Jóòb ea kọ́ọ̀ “náa tú boo kunukẽ̀í sẹlẹ́ boo tọ́ọ̀ nu” à bọọ́ ní ló é?
Kóló nú ea é láá dú 200 gbáá ea kil nvéeá ní e gbò nen ã́àa palàge nyimá bé e múú ólò aa boo kunukẽ̀í kil sĩ́ dee vaá aa sĩ́ dee dú boo kunukẽ̀í naa ẽ́. Sõò nvèè kpíí ló nú e Kpá Káí beè kọ̀ mm̀ nú ea é dú 3,500 gbáá ea kil nvéeá. Bugi Jóòb 36:27, 28, vaá ò gbóó aalai gbò bíbví:
-
Éé ní ea léémá ni ea kil ló bé e bà baatẽ́ bé e múú ólò aa boo kunukẽ̀í kil sĩ́ dee vaá òòa kẽ naa ẽ́?
-
É kọọ̀ gbò dọ̀ Kpá Káí eo ã́àa bugiá náa kọ ó kpáá dẹlẹ nyíé boo gbò nú ea di mm̀ Kpá Káí?
5. Kpá Káí beè gbẹẹ́ sĩ́ kọ́ nú ea kil ló gbò agẹbá nú ea é beè naaá
Bugi Àìzáíà 44:27–45:2, vaá ò gbóó aalai nakà bíbví:
-
Éé ní e Kpá Káí beè kọ́ 200 gbáá besĩ́ bà kalá kyọ̀sĩ́ Bábilọ̀n ẽ?
Gbò nú ea beè naaá zógè kọọ̀ Sáírọ̀s, Méné Pésìà nè pá a gbò bé beè kyọ̀sĩ́ boǹ Bábilọ̀n mm̀ gbáá 539 B.C.E. a Ba beè baa múú ea géè kpènà boná. Tṍó e bà téní gbàn sĩ́ ea beè di sèèàá bãama mm̀ pọ̀b boná lọ̀l, ba beè gbóó kyọ̀sĩ́ boná e tọ́ọ̀ nen náa beè bé va. Deè nieí, nú ea ni sígá ló 2,500 gbáá a téní aa ló tṍó e kyọ̀à sĩ́ beè dọ boo Bábilọ̀n, vaá tọ́ọ̀ nen gáà tìb tọ boo. Nvèè kpíí ló nú e Kpá Káí beè kọ́ gbẹẹ́ sĩ́.
Bugi Àìzáíà 13:19, 20, vaá ò gbóó aalai nakà bíbví:
-
Mósĩ́ deè ní e nú e Kpá Káí beè kọ́ gbẹẹ́ sĩ́ kilma ló Bábilọ̀n beè mm-má ẽ́?
Kiẽ́e Bábilọ̀n beè olòó dì ea di kuló Iraq
6. Kpá Káí beè gbẹẹ́ sĩ́ kọ́ gbò nú ea gé nááá deè nieí
Kpá Káí kọ́ọ̀ è di mm̀ “gbò dee e tṍó é gé tà.” (2 Tímotì 3:1) Nvèè kpíí ló gbò nú e Kpá Káí beè kọ àé nááá mm̀ gbò deé e tṍó é gé tàí.
Bugi Máátìù 24:6, 7, vaá ò gbóó aalai nakà bíbví:
-
Gbò éé ní e Kpá Káí beè kọọ̀ àé nááá mm̀ gbò deé e tṍó é gé tà ẹ?
Bugi 2 Tímotì 3:1-5, vaá ò gbóó aalai gbò bíbví:
-
Kpá Káí beè kọọ̀ gbò nen é beè labví láb naa vàẹ mm̀ gbò deé e tṍó é gé tà ẹ?
-
Mókà gbàà gbò lábví ní eo monì mm̀ gbò nen ẽ́?
SÌGÀ GBÒ KỌ́Ọ̀: “Kpá Káí dú kpá ea kọ́ nú ea kil ló gbò nen nè gbò nú e náa dú kà kà.”
-
Éé ní ea náa kọ ó àgala boo kọọ̀ èé láá dẹlẹ nyíé boo gbò nú ea di mm̀ Kpá Káí é?
NÚ E NI NÓ
Gbò nòòtẽ́ ea kil ló nú ea beè naaá, nú e gbò e ba beè nó nú ea kil ló sã́ìns kọ́, nè gbò nú e Kpá Káí beè kọ́ gbẹẹ́ sĩ́ zógè kọọ̀ òó láá dẹlẹ nyíé boo gbò nú ea di mm̀ Kpá Káí.
Ge Òòa Boo
-
É kọọ̀ gbò nòòtẽ́ ea di mm̀ Kpá Káí dú gé kà kà?
-
Sìgà gbò éé ní e nòòmànù sã́ìns kọ́ ea gbááá ló Kpá Káí é?
-
É kọ ò bulà kọọ̀ Kpá Káí beè gbẹẹ́ sĩ́ kọ́ gbò nú ea é nááá dì deèsĩ́? Be ò náa ẽei àbèè ẽ́èe, ló éé?
KPÁÁ GBĨ́ TẼ́ LÓ
É kọ à íe nú e Kpá Káí kọ́ kilma ló sã́ìns e bè náa dú kà kà?
Gbò éé ní ea zógè kọọ̀ è di mm̀ gbò “dee e tṍó é gé tà” ẹ?
“6 Bible Prophecies You Are Seeing Fulfilled” (Kpá Tọ Kùdẽe Ló, May 1, 2011)
Nyimá bé e nú e Kpá Káí beè gbẹẹ́ sĩ́ kọ́ kilma ló bẹbẹ̀l pá Gríìs beè mm-má naa.
Nyimá bé e gbò kọ́ọ̀ bùlà Bàrì ea di mm̀ Kpá Káí beè naa kọọ̀ ene kà gbálà á nyaaná bé ea beè olòó ẹ̀b Kpá Káí naa.
a B.C.E. tõó dọ̀ “Besĩ́ Kráìst À Kalá Mèà,” vaá C.E. à tõó dọ̀ “Tṍó E Kráìst Ni Meà Lọ̀l.”
