KUKWE JA TÖTIKARA 03
¿Kukwe Bibliabätä ye metre?
Kukwe käbämikata aune kukwe ja jie ngwankäre ye raba kwen Bibliabätä. Mä törba kukwe ye mikai gare jai, akwa ñaka nuäre mä kräke mikakäre era jai raba ruin nunye. Kukwe käbämikata aune kukwe ja jie ngwankäre tä tärä kira yebätä, ¿ye ie tö ngwan raba? Nüna raba kä jutobiti nengwane aune ja känenkäre nieta Bibliakwe, ¿ye mika raba era jai? Kukwe ye metre nitre kwati kräke. Kukwe ye mä raba mike era jai o ñakare ye ani mike gare jai.
1. ¿Kukweta tikani Bibliabätä ye namani bare metre ya?
“Kukwe metre” aibe tä tikani Bibliabätä, ñobätä ñan aune dre nakaninkä ye erere tä tikanibätä (Eclesiastés 12:10). Nitre kä nünanbare aune kukwe metre nakaninkä ye erere mikata gare Bibliabätä (mäkwe ñäkä Lucas 1:3; 3:1, 2 yebätä). Kukwe namani bare ñongwane, medente, nitre aune dre namani bare nieta Bibliakwe, ye namani bare metre nieta nitre historiador aune arqueólogo yekwe.
2. Biblia ye kira, ¿akwa ñobätä kukweta tikanibätä ye ie tö ngwanta?
Mekera, kukwe jämi nemen gare ye känenkri nämänena tikani Bibliabätä. Ñodre, kukwe científico nüke gare nengwane ye nämänena tikani mekera Bibliabätä. Akwa kukwe ye tikani Bibliabätä ngwane, kukwe ye ñan nämäne nüke gare ja erebe nitre ie. Kä nengwane, kukwe nüke gare nitre científico ie ye tä mike gare kukwe nieta Bibliabätä ye metre. Kukwe ye ie “tö ngwan raba nengwane aune kärekäre” (Salmo 111:8).
3. Kukwe rabai bare ja känenkäre nieta Bibliakwe, ¿ye ie ñobätä tö ngwan raba?
“Kukwe jämi nakainkä” ye profecía a keta kabre Bibliabätä tä mike gare (Isaías 46:10). Kukwe nakaninkä kirabe ye jämi nakainkä känenkri nämänena tikani Bibliabätä. Aune kukwe rakaikä ño kä nengwane ye Biblia tä mike gare mrebe arato. Profecía ruäre yebätä nibike ja tötike kukwe ja tötikara nekänti. Kukwe metre tä tikani Bibliabätä ye käkwe mä töi mikai niä.
JA TÖTIKE BÄRI NGUSETA
Kukwe nüke gare nitre científico ie ye erere nämänena Bibliabätä aune profecía meden namanina bare ye ani mike gare jai.
4. Kukwe nüke gare nitre científico ie ye erere nämänena Bibliabätä
Kira nitre kwati nämäne nütüre kä tibien ne jondron ruäre nämäne ketebätä. VIDEO mikadre ñärärä.
Kä nikanina 3,500 ta yete, dre tikani tärä Job yebätä ye mike ñärärä. Ñäkädre Job 26:7 yebätä aune kukwe ne kädriedre jabe:
-
Kä tibien tä nakaninkä deme kwin nämänena tikani Bibliabätä, ¿ye ñobätä raba ni töi mike ñan krütare?
Ñobätä ñö ñaka krüte ye Biblia tä mike gare. Ñö tä mrente ye ñänä ngire köböire tä nikwite ngübüre tä nikenta kunkwäre, ye arabe tä näkäinta ñüre kä tibienbiti aune tä niken nenta mrente. Krire kä nikani 200 ta yete kukwe ye nükani gare mrebe. Akwa kä nikanina 3,500 ta yete, dre mikani gare Bibliakwe ye ani mike gare jai. Ñäkädre Job 36:27, 28 yebätä aune kukwe ne kädriedre jabe:
-
Kukwe miri gare ñö yebätä, ¿ye meden nibi tuin bäri ütiäte mäi?
-
¿Ñäri gwä textobätä ye raba mä dimike tö ngwen bäri Biblia ie?
5. Kukwe kira jämi nakainkä känenkri Bibliakwe mikanina gare
Ñäkädre Isaías 44:27-45:2 yebätä aune kukwe ne kädriedre jabe:
-
¿Kukwe meden nakaninkä Babilonia yebätä abokän Bibliakwe mikani gare kä 200 känenkri?
Nitre ja tötikaka kukwe kirabätä tä mike gare metre, kä 539 Kristo känenkri, Ciro rei Persia aune nitre rükä kwe namani juta Babilonia ye bökänkä. Ñö nämäne juta ye kriemike ye jie tikaninte kwetre. Biti, jukwe Babilonia namaninte tikani yete ta nikanintre aune ñaka rübare kwetre. Kä nikanina 2,500 ta yete kukwe ye nakaninkä. Nengwane juta Babilonia käibe namani. Kukwe ye rakadrekä känenkri dre niebare Bibliakwe ye ani mike gare jai mada.
Ñäkädre Isaías 13:19, 20 yebätä aune kukwe ne kädriedre jabe:
-
¿Profecía ne namani bare ño?
Kä Irak yekänti Babilonia käibe namani
6. Kukweta nakainkä nengwane ye Bibliakwe mikanina gare
Nita nüne kä krüte näire nieta Bibliakwe (2 Timoteo 3:1). Dre rabai bare mikani gare Bibliakwe ye ani mike gare jai.
Ñäkädre Mateo 24:6, 7 yebätä aune kukwe ne kädriedre jabe:
-
¿Kukwe meden rakaikä kä krüte ne näire mikani gare Bibliabätä?
Ñäkädre 2 Timoteo 3:1-5 yebätä aune kukwe ne kädriedre jabe:
-
¿Kä krüte ne näire nitre rabai ja ngwen ño mikata gare Bibliabätä?
-
Nitre rabai ja ngwen blo mikata gare texto nekänti, ¿ye meden meden tä nemen bare mä okwäbiti?
NITRE RUÄRE TÄ KUKWE NE NIERE: “Cuento kira aune kukwe ngwarbe tä tikani Bibliabätä”.
-
Kukwe nibi gare mäi, ¿ye meden raba mä dimike tö ngwen bäri Biblia ie?
¿DRE NIBI GARE MÄI?
Kukwe científico, kukwe kira aune profecía ye tä mike gare tö ngwan raba Biblia ie.
Ngwankäreta törö
-
¿Kukweta tikani Bibliabätä ye namani bare metre o kukwe ngwarbe nieta?
-
¿Kukwe meden nämänena Bibliabätä abokän nengwane nüke gare nitre científico ie?
-
¿Dre rabai bare ja känenkäre ye Biblia tä mike gare ruin mäi? ¿Ñobätä mätä töbike kore?
KUKWE MIKE GARE BÄRI JAI
¿Kukwe nüke gare nitre científico ie ye tä mike gare kukwe Bibliabätä ye metre ya?
“¿Biblia tä kukwe mike gare ye nüke gare ja erebe nitre científico ie?” (Artículo jw.org)
¿Dreta nakainkä kä nengwane abokän tä mike gare nita nüne kä krüte näire?
“Profecía keta ti tä nemen bare ni okwäbiti” (Ni Mikaka Mokre, 1 mayo 2011)
Profecía niebare juta kira Grecia yebätä ye namani bare ño ye mike ñärärä.
Ni iti ñaka nämäne kukwe Bibliabätä mike era jai, akwa profecía namani gare ie ye käkwe töi kwitani ye mike gare jai.
“Ti ñaka nämä Ngöbö mike era jai” (Ni Mikaka Mokre, núm. 5 2017)
a Profecía ye abokän kukwe rabai bare ja känenkäre mikata gare Ngöbökwe.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
