EHONGWA 03
Mo yenene okukambura mOmbeibela?
Ombeibela i kwizika oviṋa ovingi nu i yandja ounongo ouingi. Ngahino mo vanga okutjiwa imbi mbi i honga, posi yokutja mo keyakeya. Hapo ove mo yenene okukambura momakwizikiro nondunge ndji za membo ekuru nao? Mape ya tjiri okara nongamburiro mu imbi Ombeibela mbi i hungira ohunga nokuyorokera ehupo nai na moruyaveze? Ovandu ovengi ve muna nao wina. Matu ku ṋanga kutja u tjite omakonḓononeno woye omuini.
1. Hapo Ombeibela embo rouatjiri poo indee?
MOmbeibela mwa tjangwa “omambo wouatjiri.” (Omuzuvarise 12:10) Oyo i hungira ohunga novandu novitjitwa mbya tjitwa tjiri. (Lesa Lukas 1:3; 3:1, 2.) Ovanamakuruhungi ovengi novakonḓonone woviṋa ovikuru va yakura kutja Ombeibela i hungira ouatjiri ohunga nomayuva omananḓengu, ovandu, otuveze novitjitwa mbya tjangwa mOmbeibela.
2. Ongwaye tji matu yenene okukara nongamburiro mOmbeibela nandarire kutja onguru?
Ombeibela povikando ovingi i hungira ohunga noviṋa mbya katjiukwa kombunda. Otjotjihorera, oyo i hungira ohunga nounongo wovimemwa. Moruveze Ombeibela tjaai tjangwa, ovandu ovengi kaave kambura moviṋa mbyaa i hungire ohunga nounongo wovimemwa. Nungwari, ounongo wovimemwa ndino u yakura kutja imbi Ombeibela mbi i hungira ouatjiri. Oyo “ya zikama . . . aruhe nga aruhe.”—Epsalme 111:7, 8.
3. Ongwaye tji matu yenene okukambura mu imbi Ombeibela mbi i hungira ohunga noruyaveze?
MOmbeibela mu nomaprofetero a nge hunganeka “imbi mbi mavi katjitwa.” (Jesaja 46:10) Oyo ya hunganeka ohunga noviṋa ovingi ngunda avi hi ya tjitwa. Nu wina i hungira ohunga noviṋa mbi tjitwa mouye ndino momuano omunanambango. Mehongwa ndi, matu katara komaprofetero tjiva wOmbeibela. Omaprofetero ngo ye yenenisiwa momuano omuhimise.
KONḒONONA OUKOTO
Konḓonona omuano ounongo wovimemwa mu u hitasana nOmbeibela ndino, nu u kondje okutjiwa omaprofetero warwe omananambango mOmbeibela.
4. Ounongo wovimemwa u hitasana nOmbeibela
Moruveze orukuru, ovandu ovengi aave kambura kutja ouye u ri kombanda yotjiṋa. Nyanda OKAVIDIO.
Yandja ombango ku imbi mbya tjangwa membo ra Job ozombura ape 3 500 nḓa kapita. Lesa Job 26:7, nu okuzambo hungirira kepuriro ndi:
-
Ongwaye omaheero wokutja ehi ra rekareka kombanda yopoṋa “pu pe ri tjo” tji ye ri omakumise?
Omuano omeva mu ye tanauka pokati keyuru nehi wa uta okuzuvakwa nawa ozombura ape 200 nḓa kapita. Posi yokutja, tara ku imbi Ombeibela mbi ya hungira ozombura ape 3 500 nḓa kapita. Lesa Job 36:27, 28, nu okuzambo hungirira komapuriro nga:
-
Otjikeṋa tji matji ku tjatere ohunga nomuano omeva mu ye tanauka?
-
Hapo omambo ngu wa zu nokulesa maye kurisa ongamburiro yoye mOmbeibela?
5. Ombeibela ya hunganeka ovitjitwa ovinanḓengu
Lesa Jesaja 44:27–45:2, nu okuzambo hungirira kepuriro ndi:
-
Ovikwaye Ombeibela mbi ya hunganeka ozombura 200 komurungu womawiro wa Babilon?
Omakuruhungi ye raisa kutja Ombara Kirus ya Persie notjimbumba tje tjovarwe wovita va wira otjihuro tja Babilon mombura ndji 539 K.O.Z. b Nu va tjita kutja omeva nga kondorokere otjihuro ho ye henduruke. Tji va za nokuhitira otjihuro momivero mbya isiwa kamwaha, va huura otjihuro ho nokuhina otjirwa. Ndino, ozombura 2 500 nḓa kapita Babilon tja rira etundu. Ripurira ku imbi Ombeibela mbi ya hunganeka.
Lesa Jesaja 13:19, 20, nu okuzambo hungirira kepuriro ndi:
-
Omaprofetero nga ya yenenisiwa vi?
Omatundu wa Babilon moIraq tjandino
6. Ombeibela ya hunganeka oviṋa mbi tu muna ndino
Ombeibela i tja tu hupa “momayuva omasenina.” (2 Timoteus 3:1) Tara koviṋa Ombeibela mbi ya hunganeka ohunga nomayuva omasenina.
Lesa Mateus 24:6, 7, nu okuzambo hungirira kepuriro ndi:
-
Ombeibela ya tja ma mu tjitwa tjike momayuva omasenina?
Lesa 2 Timoteus 3:1-5, nu okuzambo hungirira komapuriro nga:
-
Ovikaro viṋe vyovandu mbi tu muna mbya hungirwa mOmbeibela ohunga nomayuva omasenina?
-
Ovikaro mbya tamunwa mba ooviṋe mbi wa muna?
OVANDU TJIVA VE TJA: “Ombeibela embo ndi hi nouatjiri nu nde ura novihambarere.”
-
Otjikeṋa tji tji ku pa ongamburiro kutja Ombeibela i nouatjiri?
OKUYARUKIRA PO OUSUPI
Omakuruhungi, ounongo wovimemwa nomaprofetero vi raisa kutja matu yenene okukambura mOmbeibela.
Okurizemburukisa
-
Hapo Ombeibela embo rouatjiri poo indee?
-
Omomiano viṋe tjiva ounongo wovimemwa mu u hitasana ku nOmbeibela?
-
Hapo u muna kutja Ombeibela i hunganeka oruyaveze? Omena raye?
RIHONGA OVINGI
Hapo ounongo wovimemwa kau hitasana nOmbeibela?
“Hapo ounongo wovimemwa u hitasana nOmbeibela?” (Okarupa okasupi morungovi)
Oviraisiro viṋe mbi raisa kutja tu hupa “momayuva omasenina”?
“Omaprofetero 6 wOmbeibela nge yenenisiwa ndino” (Oruhungu, 1 ku Mei, 2011)
Rihonga kutja omaprofetero ohunga nOuhonapare wa Grike ya yenenisiwa vi.
Tara kutja omaprofetero wOmbeibela ya rundurura vi oumune womurumendu umwe.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
