LES 03
Yu kan bribi den sani di Bijbel e taki?
Bijbel abi furu pramisi nanga furu rai. Kande yu wani kon sabi san Bijbel e leri. Ma kande yu e aksi yusrefi tu efu yu musu bribi den sani di de na ini Bijbel. Yu kan bribi den pramisi nanga den rai fu so wan owru buku? Yu denki taki den sani di Bijbel e taki kan yepi wi fu abi wan bun libi now? Wi kan bribi den sani di a e taki fu a ten di e kon? Milyunmilyun sma e bribi den sani di de na ini Bijbel. Meki wi luku fu san ede yu kan bribi na ini Bijbel tu.
1. Den tori na ini Bijbel tru?
Bijbel srefi e taki dati den sani di skrifi na ini „tru” (Preikiman 12:10). A e taki fu sani di ben pasa trutru èn fu sma di ben libi trutru. (Leisi Lukas 1:3; 3:1, 2.) Furu historia skrifiman nanga sma di e ondrosuku owruten sani e taki dati den tori di skrifi na ini Bijbel tru. Den e taki tu dati den sma nanga den presi di kari na ini Bijbel ben de trutru.
2. Fu san ede wi kan taki dati Bijbel kan yepi wi awinsi na wan owru buku?
Den sma di skrifi Bijbel ben taki fu furu sani di den sma fu a ten fu den no ben sabi. Fu eksempre, Bijbel e taki fu sani di sabiman kon sabi na ini a ten fu wi. Fosi, furu sma no ben bribi den sani di Bijbel e taki fu den tori disi. Ma sabiman kon si taki den sani di skrifi na ini Bijbel tru. Ala ten wi kan bribi den sani di Bijbel e taki.—Psalm 111:8.
3. Fu san ede wi kan bribi den pramisi na ini Bijbel di e sori san o pasa na ini a ten di e kon?
Bijbel abi profeititori a di e sori san o pasa „na ini a ten di e kon” (Yesaya 46:10). Furu fu den Bijbel profeititori disi ben sori fa sani ben o waka èn den alamala kon tru. Bijbel e sori finifini tu fa sani ben o de na ini a ten fu wi. Na ini a les disi wi o taki fu wan tu fu den profeititori na ini Bijbel. Yu srefi o si taki ala sani di Bijbel e taki e kon tru!
SORTU TRA SANI YU KAN LERI?
Wi o si taki den sani di skrifi na ini Bijbel e kruderi nanga den sani di sabiman kon sabi. Wi o taki tu fu wan tu moi Bijbel profeititori.
4. Den sani na ini Bijbel e kruderi nanga den sani di sabiman kon sabi
Fosi, furu sma ben bribi taki wan sani ben e hori grontapu. Prei a FELEM.
Luku san Gado ben meki sma skrifi sowan 3500 yari pasa na ini Bijbel. Leisi Yob 26:7 èn taki fu na aksi disi:
-
Fa Yob ben kan sabi taki grontapu e anga „na noti” èn san disi e sori?
Sowan 200 yari pasa libisma no ben sabi ete taki a son e hari a watra fu grontapu go na loktu èn taki a watra dati e fadon kon baka leki alen. Ma luku san Bijbel ben taki sowan 3500 yari pasa. Leisi Yob 36:27, 28 èn taki fu den aksi disi:
-
Fa yu feni a sani disi di Bijbel e taki fu a watra na grontapu?
-
Den tekst disi e tranga yu bribi na ini Bijbel?
5. Bijbel ben taki na fesi fu son prenspari sani di ben o pasa
Leisi Yesaya 44:27–45:2 èn taki fu na aksi disi:
-
San Bijbel ben taki sowan 200 yari na fesi fu a fasi fa den ben o teki a foto Babilon abra?
Sani waka precies leki fa Bijbel ben taki. Kownu Sirus fu Persia nanga en legre teki a foto Babilon abra na ini 539 Fosi Krestes. Den ben meki a liba di ben lontu a foto kon drei èn fu di den portu ben opo meki den ben kan teki a foto abra sondro fu feti. A sani disi pasa sowan 2500 yari pasa. Now a foto Babilon na wan brokopresi. Luku san Bijbel ben taki fu a tori disi.
Leisi Yesaya 13:19, 20 èn taki fu na aksi disi:
-
Fa a sani di skrifi na ini a tekst disi kon tru?
Na ini Irak yu kan si san tan abra fu a foto Babilon
6. Langa ten kaba Bijbel ben taki fa sani ben o de na ini a ten disi
Bijbel e taki dati wi e libi na ini „den lasti dei” (2 Timoteyus 3:1). Luku san Bijbel e taki fu a ten disi.
Leisi Mateyus 24:6, 7 èn taki fu na aksi disi:
-
Sortu sani ben o miti sma na ini den lasti dei?
Leisi 2 Timoteyus 3:1-5 èn taki fu den aksi disi:
-
Te yu luku a tekst disi, dan sortu maniri sma ben o abi na ini den lasti dei?
-
Sortuwan fu den maniri disi yu e si na sma?
SON SMA E TAKI: „Bijbel na wan buku di lai nanga anansitori.”
-
San na a moro bigi buweisi gi yu taki den sani na ini Bijbel tru?
SAN YU LERI?
A historia, den sani di sabiman kon sabi nanga den profeititori e sori taki yu kan bribi san Bijbel e taki.
Fa yu ben o piki den aksi disi?
-
Bijbel e taki fu sani di pasa trutru?
-
Gi wan tu eksempre di e sori taki den sani di skrifi na ini Bijbel e kruderi nanga san sabiman kon sabi.
-
Yu feni taki den profeititori na ini Bijbel e kon tru? Fu san ede yu e taki dati?
TRA SANI DI YU KAN LUKU
Sani de na ini Bijbel di no e kruderi nanga san sabiman kon sabi?
„Bijbel e taki den srefi sani di sabiman e taki?” (Web-artikel)
San ben o pasa na ini „den lasti dei”?
„6 Bijbel profeititori di e kon tru nownowde” (A Waktitoren, 1 mei 2011)
A felem disi e sori fa den sani di Bijbel taki fu Grikikondre kon tru.
Na artikel disi e sori fa Bijbel profeititori yepi wan man fu denki tra fasi fu Bijbel.
„Mi no ben e bribi taki wan Gado de” (A Waktitoren Nr. 5 2017)
a Profeititori na boskopu fu Gado di e sori san o pasa na ini a ten di e kon.
