DJONDZO 03
U Nga Li Tshemba Bibele?
Bibele li vulavula hi minchumu ya lisima leyi nga ta yentxeka ka nkama lowu taka, naswona li ni minawu leyi pfunaka. Swi nga yentxeka u swi navela ku tiva leswi li swi vulaka, kambe swi nga yentxeka u kanakana. Indje u nga kholwa ka switshembiso ni minawu ya buku la khale la ku fana ni Bibele? Swa twala ku kholwa leswi Bibele li swi vulaka hi ku va ni wutomi la ku tsakisa swoswi ni ka nkama lowu taka? Vanhu va vanyingi va kholwa. Wena ke, u nga swi kholwa?
1. Leswi Bibele li vulaka swaku swi yentxekile i ntiyiso?
Bibele hi loxe li vula swaku vatsali va lona va vule “marito ya ntiyiso hilaha manga hakona.” (Eklesiasta 12:10) Leswi Bibele li vulavulaka hi swona i ntiyiso, ni vanhu va kona va ve kona. (Lerha Luka 1:3; 3:1, 2.) Tintivi tin’wana ni vakambeli va minchumu ya khale va vula swaku minchumu leyi nga ka Bibele leyi fambisanaka ni masiku, vanhu, tindhawu ni minchumu leyi nga yentxeka i ntiyiso.
2. Hi nga vula swaku Bibele la tshembeka hambileswi li nga la khale?
Ku sukela khale Bibele i buku leli vulaka minchumu na yi nge se yentxeka. Hi xikombiso, li vulavula hi minchumu leyi yelanaka ni siyensiya. Nkama lowu Bibele li nga tsaliwa, vanhu va vanyingi a va nga kholwi leswi a li swi vula hi siyensiya. Kambe namuntlha, a siyensiya la pfumelelana ni leswi Bibele li swi vulaka. Marito ya lona ma “tshembeka swoswi” ni hi masiku. — Tipisalema 111:8.
3. Hi mhaka muni hi fanele hi kholwa ka leswi Bibele li vulaka swaku swi ta yentxeka ka nkama lowu taka?
Bibele li ni wuprofeta a leli vulavulaka hi “leswi kalaka swi nge se humelela.” (Esaya 46:10) Hi xikombiso, minchumu leyi nga yentxeka ku sukela khale se a yi tsaliwile ka Bibele swaku a yi ta yentxeka. Naswona Bibele se a li swi vulile leswi wutomi a li ta tshamisa xiswona ka masiku ya hina. Ka djondzo leyi, hi ta kambisisa wuprofeta la Bibele. Swa hlamalisa ku vona swaku leswi nga profetiwa ka Bibele swi yentxekisa xileswi swi nga tsalisiwa xiswona!
DJONDZA SWIN’WANA
Vona swaku siyensiya li yelanisa ku yini ni Bibele namuntlha, naswona kambisisa lin’wana la wuprofeta la lona la ku hlamalisa.
4. A siyensiya la yelana ni Bibele
A khale vanhu va vanyingi a va kholwa swaku misava yi le henhla ka nchumu. Sixtirani VHIDIYO.
Vona swaku buku la Yobo li vule swa ku yini ka 3.500 wa malembe lawa ma nga hundza. Lerhani Yobo 26:7, mi gama mi bula hi xivutiso lexi landzelaka:
-
Hi mhaka muni swi hlamalisa ku tiva leswaku Bibele a li vulile swaku misava a yi le henhla ka nchumu?
Loko dlambu li hisa li yentxa swaku mati ma psha, loko mati ma psha ma yentxa swaku ku va ni marhefu, marhefu wolawo ma nisa mpfula leyi tlhelaka yi ya tata malwandle. Leswo vanhu va sungule ku swi twisisa ka 200 wa malembe lawa ma nga hundza. Kambe vona leswi Bibele se a li swi vulile khale swinene. Lerhani Yobo 36:27, 28, mi gama mi bula hi swivutiso leswi landzelaka:
-
Leswi yentxekaka swaku hi va ni mati swi hlamalisa hi mhaka muni?
-
Leswi u nga swi djondza swi ku yentxa u li tshemba Bibele?
5. Bibele li vulavule hi minchumu ya lisima leyi a yi ta yentxeka
Lerhani Esaya 44:27–45:2, mi gama mi bula hi xivutiso lexi landzelaka:
-
I mpsini leswi Bibele li nga swi vula hi ku hohlotiwa ka Babilona na ka ha sale 200 wa malembe swaku swi yentxeka?
Mabuku lawa ma vulavulaka hi minchumu ya khale ma kombisa swaku Korexe hosi ya Pérsia ni masonchwa ya yena va hlule Babilona hi lembe la 539 na Yesu a nge se ta misaveni. Loko va djikise mati lawa a ma vhikela doropa, va nghene hi swipfalu leswi a swi pfulekile. Hi mhaka leyo, va kote ku hlula Vababilona na va nga karhatekanga. Namuntlha, se ku hundza 2.500 wa malembe, lani a ku li Babilona ku yo sala makhumbi lawa ma nga diliziwa. Vona leswi Bibele a li swi vulile hi Babilona.
Lerhani Esaya 13:19, 20, mi gama mi bula hi xivutiso lexi landzelaka:
-
Li hetisekise ku yini wuprofeta leli?
Makhumbi ya doropa la Babilona leli nga diliziwa lawa namuntlha ma kumekaka a Iraque
6. Bibele se a li swi vulile leswi swi yentxekaka ka masiku ya hina
A Bibele li vula swaku hi hanya “ka masiku ya wugamu.” (2 Timotiyu 3:1) Vona leswi Bibele li nga vula swaku a swi ta yentxeka ka masiku ya hina:
Lerhani Matewu 24:6, 7, mi gama mi bula hi xivutiso lexi landzelaka:
-
Bibele li vule swaku a ku ta yentxeka yini ka masiku ya wugamu?
Lerhani 2 Timotiyu 3:1-5, mi gama mi bula hi swivutiso leswi landzelaka:
-
Bibele li vule swaku vanhu a va ta tshamisa ku yini ka masiku ya wugamu?
-
I mpsini leswi u swi vonaka swi yentxeka ka masiku lawa hi hanyaka ka wona?
VAN’WANA VA LI: “Bibele i buku la minkaringana leli nga tsaliwa hi vanhu.”
-
Hi mavonelo ya wena, i mpsini leswi swi hi yentxaka hi kholwa swaku leswi Bibele li swi djondzisaka i ntiyiso?
LESWI HI NGA SWI DJONDZA
Mabuku lama nga tsaliwa khale, siyensiya, ni wuprofeta, hinkwaswu swi kombisa leswaku u nga li tshemba Bibele.
Ku kambela leswi hi nga swi djondza
-
Leswi Bibele li vulavulaka hi swona swi yentxekile hikakunene?
-
Hi swini swikombiso leswi kombisaka swaku siyensiya la pfumelelana ni Bibele?
-
Indje wa kholwa swaku Bibele li nga ku byela leswi nga ta yentxeka ka nkama lowu taka? Hi mhaka muni u kholwa?
LOKO U LAVA KU TIVA SWIN’WANA
Bibele la phazama loko li vulavula hi siyensiya?
“Ciência La Pfumelelana Ni Bibele?” (Nhlokomhaka leyi nga ka site la jw.org)
I yini leswi kombisaka swaku hi le ka “masiku ya wugamu”?
“6 Profecias bíblicas que estão se cumprindo hoje” (Murindzi wa 1 ka Maio wa 2011 hi Xiputukezi)
Vona ndlela leyi wuprofeta la Bibele leli vulavulaka hi mfumu wa Grécia li nga hetiseka hi yona.
Vona leswi swi nga yentxekela wanuna mun’wana, yena a a nga kholwi ka Xikwembu kambe wuprofeta la Bibele li mu pfunile ku txintxa mapimiselo ya yena.
“A Ni Nga Kholwi Swaku Xikwembu Xi Kona” (Murindzi wa N.o 5 wa 2017)
a Wuprofeta i marito ya Xikwembu lawa xi ma vulaka na ma nge se yentxeka.
