LESON 03
Akory Hahavy Anao Hatoky Raha Koran̈iny Baiboly?
Baiboly mampan̈anten̈a atsika raha maro ndreky man̈amia torohevitry maro. Mety tianao hay mare raha ampianarinizio, fa mety mavozo hely koa anao. Akory hahavy anao hatoky fampan̈antinan̈a ndreky torohevitry koran̈iny boky efa ela io? Akory tokotro hataonao, baka anao hatoky volan̈a Baiboly fa ho tsara fiain̈ananao rango izioty ndreky aminy amaray? Maro mare olo matoky zen̈y. Anao koa mety mba ho an̈isandro io.
1. Marin̈y ma tantara aby amy Baiboly ao?
Raha misoratra amy Baiboly ao “volan̈any fahamarin̈ana tsisy diso.” (Mpitoriteny 12:10) Izio mitantara raha ten̈a nisy ndreky olo ten̈a nisy. (Vakia Lioka 1:3; 3:1, 2.) Maro olo panoratra tantara ndreky pandiniky raha efa ela aby io man̈eky fa tsisy vandy daty, olo, tany ndreky raha nandalo koran̈iny Baiboly ao.
2. Nan̈ino atsika mivolan̈a fa Baiboly io tsy boky lany daty?
Maro raha koran̈iny Baiboly efa ela, kanefa efa tafara tatỳ vo ikenolo fa marin̈y. Ohatra amy zen̈y raha momba tany ty. Maro olo taloha be tan̈y nifamatra raha nisoratiny panoratra Baiboly momba tany ty. Fa iro manampahaizan̈a momba tany ty efa tafara be tatỳ ndraiky nan̈eky fa marin̈y raha koran̈iny Baiboly momba izio. Izio “atokisan̈a fo na izioty na mandrakizay.”—Salamo 111:8.
3. Nan̈ino atsika tokony hatoky fa marin̈y raha koran̈iny Baiboly momba ny amaray?
Amy Baiboly ao misy faminanian̈a a momba “raha mbala tsiary natao.” (Isaia 46:10) Marin̈y tsarabe raha koran̈inizio tsialohaloha momba raha maventy handalo. Efa nambaranizio rango efa ela koa raha ratsy iain̈antsika erantany izioty io. Amy leson ty, atsika handiniky sasany amy raha efa nambarany Baiboly tsialohaloha. Ho gaga foeky anao koa mahay zen̈y!
ALEVA ONON̈O
Alà onon̈o tsara fa iro manampahaizan̈a momba siansy izioty man̈eky raha koran̈iny Baiboly ndreky mandiniky faminanian̈a sasany amy Baiboly ao.
4. Raha koran̈iny siansy io mifan̈araka amy Baiboly
Maro olo taloha tan̈y nivolan̈a fa tany ty zen̈y nisy raha mitana. Alifasa VIDEO io.
Aleva onon̈o ino raha koran̈iny bokiny Joba, kadiriny 3500 taon̈o loso zay. Vakia Joba 26:7, avio iaraha dinihin̈y fan̈ontanian̈a ambany io:
-
Nan̈ino mahagaga nivolan̈any Joba fa tany ty ‘mihevaheva’?
Efa 3500 taon̈o zay Baiboly mivolan̈a fisiany tsingerin̈iny rano. Fa efa 1800 taon̈o tafara tatỳ vo hainolo raha zen̈y. Vakia Joba 36:27, 28 ndreky Mpitoriteny 1:7, avio iaraha dinihin̈y fan̈ontanian̈a aby ambany io:
-
Nan̈ino mahagaga tsingerin̈iny rano io?
-
Nankafatatra fatokisanao Baiboly ma andininy aby nivakin̈y tio in̈y?
5. Misy raha maventy sasany efa koran̈iny Baiboly tsialohaloha
Vakia Isaia 44:27–45:2, avio iaraha dinihin̈y fan̈ontanian̈a ambany io:
-
Ino aby raha efa nikoran̈iny Baiboly momba tanànany Babylony, 200 taon̈o talohany namparesy Babylony?
Tantara koa mankamarin̈y fa Panjaka Kyrosy, baka a Persy io ndreky tafikinany nandresy Babylony, 540 taon̈o talohany nitirahany Jesosy. Navilindro lalan̈a ten̈arano niaro tanàna io. Tsy nafodindro tamy tanàna io varavaran̈a tanàna io tamy zen̈y, ke tsy nila niady aby iry Kyrosy, efa nazondro edy tanàna io. Lemby tanàna io kadiriny 2500 taon̈o tafara tatỳ. Zahava amy zay baka raha efa nikoran̈iny Baiboly momba zen̈y.
Vakia Isaia 13:19, 20, avio iaraha dinihin̈y fan̈ontanian̈a ty:
-
Nan̈ino atsika matoky fa tanteraka ankitin̈y raha koran̈iny Baiboly momba Babylony?
Babylony lemby a Irak an̈y
6. Efa nambarany Baiboly koa raha miboaka aminy andra izioty
“Andra farany” ivolan̈any Baiboly andra misy atsika izioty. (2 Timoty 3:1) Zahava baka raha efa nambaranizio momba andra farany io:
Vakia Matio 24:6, 7, avio iaraha dinihin̈y fan̈ontanian̈a ty:
-
Ino aby raha ho hisy, ke mampiavaka andra farany ho Baiboly?
Vakia 2 Timoty 3:1-5, avio iaraha dinihin̈y fan̈ontanian̈a aby ty:
-
Han̈ano karakory toetriny ankamarozanolo aminy andra farany ho Baiboly?
-
Ino amindro io efa hitanao izioty?
MISY OLO MIVOLAN̈A: “Baiboly io boky niforoporôn̈inolo fo.”
-
Ino raha ten̈a mahavy anao man̈eky fa atokisan̈a raha koran̈iny Baiboly?
INO RAHA NIANARANAO TATO?
Atokisan̈a Baiboly io fotony marin̈y raha koran̈inizio momba tantara, siansy, ndreky faminanian̈a.
Fan̈ontanian̈a Fameren̈ana
-
Baiboly io ma boky man̈ambara raha marin̈y sa bokiny angano?
-
Ino aby raha koran̈iny siansy ke mifan̈araka amy Baiboly?
-
Fahitanao izy ma Baiboly io mahavita man̈ambara raha mbala ho avy? Nan̈ino?
ZAHAVA
Diso ma raha volan̈iny Baiboly momba siansy?
“Mba Mifan̈araka ma Raha Koran̈iny Baiboly Ndreky Siansy?” (Lahatsoratra aminy Internet)
Ino aby ma raha mampiavaka “andra farany”?
“Faminanian̈a 6 Efa Tanteraka” (Tilikambo Fiambesan̈a 1 May 2011)
Zahava akory nampatanteraka raha efa nivolan̈iny Baiboly momba Fanjakan̈a Griky.
Zahava nan̈ino nan̈ova fihiverany lelahy araiky Baiboly faminanian̈a an̈atinizio ao.
“Taminaka, Zan̈ahary Zen̈y Tsisy” (Tilikambo Fiambesan̈a No. 5 2017)
a An̈isany faminanian̈a koa hafatra baka amy Zan̈ahary man̈ambara raha mbala ho avy.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
