ESI ITUUGHẠ PHỌ 04
Anhiạn Kụ Egey Enhaạn Phọ?
Emhiigh k’amem mọ awe omhiigh bọ orarạ isiẹn ade phọ, kụ edị bidị omhiigh ooḅereghị yogh akirokirọ arumhụgh. Toroboiperolbọ, aBaibul phọ akaạph ni ilọ Emhụgh “dị epu iphediphọ arumhụgh phọ.” (2 Chronicles 2:5) Eeghe kụ iḍighi kụ Emhụgh phọ ephẹn phọ epu bọ iphediphọ arumhụgh phọ awe rooḅereghị ghan bọ? Siẹn esi ituughạ phọ ephẹn phọ, yira kooḅeghiọn omiịn idị Emhụgh phọ ephẹn phọ iḅenhị iyira ilọ odọ oye phọ odị aru bọ.
1. Aḍien Enhaạn ughol ika, kụ yira ulhegheri ika mọ odị rawạ ni mọ yira olhegheri?
Siphẹ aBaibul phọ, Enhaạn uḅenhị ni iyira ilọ odị. Odị aḅẹm mọ: “Mị aZihova. Aḍiẹn kụ aḍien amhị.” (Ibạl Isaiah 42:5, 8.) Aḍien phọ aḍiẹn phọ ogbạ bọ mọ “Zihova” onhụ aHibru remạ ghan mọ “Odị kaḍighi ni torobọ iyaạr dị ewạ.” AZihova rawạ mọ yira olhegheri ḍien phọ odị. (Exodus 3:15) Uḍighi ika kụ nạ akuphom bọ owol iphẹn phọ? Aḍien phọ aḍiẹn phọ emite siphẹ aBaibul phọ riisi dị r’epel li 7,000! a Aḍien phọ aḍiẹn phọ Zihova eḍighi “ḍiọ egey Enhaạn phọ epẹ k’akẹ phọ r’isiẹn ade phọ.”—Deuteronomy 4:39.
2. ABaibul phọ akaạph eeghe ilọ aZihova?
ABaibul phọ akaạph ni mọ igbo arumhụgh phọ awe rooḅereghị ghan bọ, aZihova kụ egey Enhaạn phọ. Eeghe kụ iḍighi? Ibadị ariphigh edi ni. AZihova bịn kụ amhoọgh oomo iikpọ, esi iduọn phọ, odị bịn “kụ Apelheghiom oomo isiẹn ade phọ.” (Ibạl Psalm 83:18.) ABaibul phọ aḅẹm mọ odị “kụ Apelheghiom,” loor esi dị odị amoọgh iikpọ oḍighinhom atorobọ iyaạr lọ odị rawạ oḍighi. Odị kụ ‘alhẹm oomo araraạr phọ’—epẹ k’akẹ r’siẹn ade phọ. (Ogananami 4:8, 11) Kụ oginha aZihova bịn kụ odi ghan k’iiḍuul k’iiḍuul.—Psalm 90:2.
OLHEGHERI OBUGHẸ
Ooḅeghiọn ogbaranhaạn dị odi igbo itaanheẹn asiḍien Enhaạn r’aḍien phọ odị egbatanhaạn bọ. Ḅilhẹ r’eten phọ epẹ Enhaạn asighẹ bọ ragananamiom ḍien phọ odị, r’iyaạr phọ eḍighi bọ kụ odị raḍighi bọ iduọn phọ.
3. Enhaạn amoọgh ibadị itaanheẹn asiḍien r’aḍinhiin aḍikaraghị aḍien
Omhiịn ogbaranhaạn dị odi igbo aḍien r’aḍitaanheẹn aḍien, ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Eeghe kụ ogbaranhaạn dị odi igbo aḍitaanheẹn aḍien, idiphọ “Omoọgh-we,” r’aḍikaraghị aḍien?
ABaibul phọ aḅẹm mọ awe rooḅereghị ghan ni ibadị arumhụgh. Ibạl Psalm 136:1-3, kụ eeḅeghiọn ḍipuru phọ aḍiẹn:
-
Anhiạn kụ ‘Emhụgh phọ epu bọ oomo arumhụgh phọ’ ḅilhẹ ‘Uw-emhoọgh dị apu r’uw-emhoọgh’?
4. AZihova rawạ mọ legheri kụ aḅilhẹ amhạgh ghan ḍien phọ odị
Yira ulhegheri ika mọ aZihova rawạ ni mọ legheri ḍien phọ odị? Ipegh VIDIO phọ, kụ eeḅeghiọn sipuru phọ edaphạn bọ siẹn.
-
Nạ aatughiạn mọ aZihova rawạ ni mọ awe olhegheri ḍien odị? Eeghe kụ iḍighi?
AZihova rawạ mọ awe omhạgh ghan ḍien phọ odị. Ibạl Rom 10:13, kụ eeḅeghiọn sipuru phọ iphẹn:
-
Eeghe kụ iḍighi kụ emhạn bọ maạr omhạgh ghan aḍien phọ Enhaạn, Zihova?
-
Retọl ghan ika mem dị oye aatughiạn ḍien anạ kụ amhạgh nyinhạ?
-
Nạ aatughiạn mọ retọl ghan ika esi aZihova mem dị nạ amhạgh ḍien phọ odị?
5. AZihova rawạ mọ ḍighi oyaghirị odị
Oniin anhịr olọ aCambodia dị oghol mọ Soten aḅẹm mọ olhegheri aḍien phọ Enhaạn mengọ nyodị “oḅaạl olhoghi dị odị ko/mhoọgh ghan.” Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Siẹn avidio phọ, ika kụ idị olhegheri aḍien phọ Enhaạn etir Soten?
Tutụ oye r’anạ keḍigh righirị, nạ kapụr ri alegheri ḍien oye phọ. Ibạl Jems 4:8a, kụ eeḅeghiọn sipuru phọ iphẹn:
-
AZihova ramhạgh ghan nyinhạ oḍighi eeghe?
-
Ika kụ idị olhegheri aḍien phọ Enhaạn kụ oḅilhẹ omhạgh ghan kelhoghonhaạn nyinhạ ḍighaạgh okuamhị oḍuraan otumhan odị?
ABUNIIN AWE OOTUGHIẠN MỌ: “Eḍighi bọ edị eniin Enhaạn bịn kụ edi ghan, torobọ aḍien dị nạ amhạgh nyodị enighẹ ni.”
-
Uḍighi ika kụ nạ amheeraam bọ mọ aZihova kụ aḍien Enhaạn?
-
Ika kụ idị nạ katue agbạ aḅenhị oye mọ Enhaạn rawạ ni mọ osighẹ ḍien odị oḍighinhom?
OGHAẠPH OOKARAGH
AZihova kụ aḍien eginha egey Enhaạn phọ. Odị rawạ ni mọ yira olhegheri oḅilhẹ omhạgh ghan ḍien phọ odị pidị yira oḍuraan otumhan nyodị.
Ooḅula
-
Eeghe kụ iḍighi bọ iyaạr phọ aZihova agbatanhaạn bọ r’inhọn arumhụgh dị awe rooḅereghị ghan?
-
Uḍighi ika kụ yira komạgh ghan bọ ḍien Enhaạn?
-
Eeghe kụ iḍeenhaan bọ mọ aZihova rawạ ni mọ ḍuraan atumhan nyodị?
WAAGHỊ AMHIỊN
Ḅeeḅeghiọn oogh araraạr dị eḍeenhaan mọ Enhaạn edi ni.
Eeghe kụ iḍighi kụ eḍighi bọ ni osụ-olhoghi omheeraam mọ Enhaạn edi ghan ni?
Tuughạ alhegheri iyaạr phọ eḍighi bọ kụ yira koḍighinhom bọ ni ḍien phọ Enhaạn, ghalhamọ r’iduọn yira u/kạr bọ ulegheri okạr ipẹ oghol ghan bọ iḍiodi phọ.
Torobọ aḍien dị nạ amhạgh Enhaạn enighẹ ni ḍughụm? Miịn iyaạr phọ eḍighi bọ kụ oḅẹm bọ mọ odị amoọgh ḍinhiin aḍien bịn.
a Olhegheri obughẹ ilọ emhụ aḍien phọ Enhaạn r’iyaạr phọ eḍighi bọ kụ abuniin abuphẹ rogbạ ghan bọ Baibul phọ ogbuurogh bọ ḍien phọ siphẹ aBaibul phọ, kiạ Appendix A4 aNew World Translation of the Holy Scriptures phọ.
