PWONY ME 04
Lubanga En Anga?
Nicakke i acakki piny, dano gubedo ka woro lubange mapol mapatpat. Kadi bed kit meno, Baibul loko i kom Lubanga mo acel ma “dit makato lubanga mukene-gu ducu.” (2 Tekwaro 2:5) Meno anga? Dok pingo en dit kato lubange mukene ducu ma dano giworo? I pwony man, wabineno jami mogo ma Lubanga man mito ni inge madok i kome.
1. Lubanga nyinge anga, dok ngo ma nyuto ni en mito ni wange nyinge?
Lubanga otitiwa nyinge i Baibul. En owaco ni: “An Jehovah. Meno aye nyinga.” (Icaya 42:5, 8, NWT) Nying ni “Jehovah” oa ki i nying me leb Ibru ma gonye ni “En Miyo Timme.” Jehovah mito ni inge nyinge. (Nia 3:15, coc ma tye i tere piny.) Wangeyo man nining? En otiyo ki nyinge tyen makato 7,000 kulu i Baibul! a Nying ni Jehovah tye pi Lubanga acel keken me ada ma loyo “malo i polo ki piny i wi lobo.”—Nwoyo Cik 4:39.
2. Gin ango ma Baibul waco i kom Jehovah?
Baibul waco ni ki i kin lubange ducu ma dano giworo, Jehovah keken aye Lubanga acel me ada. Pingo? Pi tyen lok mapol. Jehovah aye laloc madit loyo ducu, dok en keken aye “Ngat Mamalo Twal ma loyo wi lobo-ni ducu.” (Kwan Jabuli 83:18.) En aye “Lubanga Matwero ducu,” man nyuto ni en tye ki teko me timo gin mo keken ma iye mito. En ‘ocweyo jami ducu’—polo ki lobo ki jami ducu makwo. (Niyabo 4:8, 11) Dok en keken aye acakkine pe, dok bedo kwo nakanaka.—Jabuli 90:2.
NONG NGEC MATUT
Nen kong apokapoka ma tye i kin nying me dog tic pa Lubanga ki dong nyinge kikome. I nge meno, ibipwonyo bene kit ma en onyutiwa nyinge ki tyen lok ma oweko en otimo meno.
3. Lubanga tye ki nying me dog tic mapol ento nyinge tye acel keken
Me neno apokapoka ma tye i kin nying me dog tic ki nyinge kikome, tuk VIDIO, ci igam lapeny man.
-
Apokapoka ango ma tye i kin nying me dog tic calo “Rwot,” ki nying kikome?
Baibul waco ni dano giworo lubange ki rwodi mapol. Kwan Jabuli 136:1-3, ci wunyam lapeny man:
-
Anga ma obedo ‘Lubanga ma loyo lubange ducu’ ki “Rwot ma loyo rwodi ducu”?
4. Jehovah mito ni inge nyinge dok iti kwede
Ngo ma nyuto ni Jehovah mito ni inge nyinge? Tuk VIDIO, ci wunyam lapeny magi.
-
Itamo ni Jehovah mito ni kinge nyinge? Pingo?
Jehovah mito ni dano guti ki nyinge. Kwan Jo Roma 10:13, ci wunyam lapeny magi:
-
Pire tek lakwene me tic ki nying Lubanga, Jehovah?
-
Iwinyo nining ka ngat moni wiye po i kom nyingi dok tiyo kwede?
-
Itamo ni Jehovah winyo nining ka itiyo ki nyinge?
5. Jehovah mito ni ibed lareme
Dako mo ma nyinge Soten ma a ki i Cambodia owaco ni pwonyo nying Lubanga okele “yomcwiny madit loyo gin mo keken.” Tuk VIDIO, ci wunyam lapeny ma lubo.
-
Kit ma kinyuto kwede i vidio, ngeyo nying Lubanga ogudo Soten nining?
Ma peya idoko larem ngat moni, omyero kong inge nyinge. Kwan Yakobo 4:8a, ci wunyam lapeny magi:
-
Jehovah kwayi me timo gin ango?
-
Ngeyo nying Lubanga ki tic kwede konyi me nyikke cok bote nining?
JO MOGO GIWACO NI: “Lubanga tye acel keken, pi meno, pe balo kadi pe itiyo ki nyinge.”
-
In tika iye ni Lubanga nyinge Jehovah?
-
Itwero titone nining ni Lubanga mito ni wati ki nyinge?
WOT WIYE WIYE
Jehovah obedo nying Lubanga acel keken me ada. En mito ni wange dok wati ki nying meno wek wanyikke cok bote.
Ngo ma ipwonyo?
-
Jehovah pat nining ki lubange mukene ma dano woro?
-
Pingo myero wati ki nying Lubanga?
-
Ngo ma nyuto ni Jehovah mito ni inyikke cok bote?
TIM KWED
Nen jami abic ma moko ni Lubanga tye.
Pingo rwatte me ye ni Lubanga pe ki acakkine?
Nen tyen lok ma oweko omyero wati ki nying Lubanga kadi bed pe wangeyo kit ma onongo kilwongo kwede nying meno i kare macon.
Tika Lubanga paro kit ma walwongo kwede nyinge? Nen gin ma nyuto ni nyinge kikome tye acel keken.
