OZUMALƐDƖYƐ 04
Aninyia Yɛ Lɛ Nyamɩnlɩ a?
Adasamaa bɔzʋ̃mɩ anyamɩnlɩ sʋ̃maa wɔ mmɩlɩ tɩndɩnlɩ mɔɔ bɛva bɔwʋwa azɩ munwala nɩ nu. Naasʋ̃, Bayɩbʋlʋ ɩkã Nyamɩnlɩ ɔkʋ̃ be mɔɔ “ɩdɩ kezi ɩtɛla anyamɩnlɩ munwala” nwʋ odwokɔ. (2 Mmɩlɩzʋdwokɔ 2:5) Mɛyɩ yɛ lɛ aninyia? Na mɩnla yɛ ɩma ɩyɛ kezi ɩtɛla anyamɩnlɩ mvʋlɔ munwala mɔɔ mmenii sʋ̃mɩ bɛ nɩ a? Wɔ ozumalɛdɩyɛ eyi nu nɩ, kilá mɔɔ ɔzɔ Nyamɩnlɩ eyi ɩpɛ kɛɛ ɔnwʋ ɛfalɩ yɩ nwʋ.
1. Nyamɩnlɩ yi dima yɛ lɛ mɩnla, na mɩnla yɛ ikile kɛɛ ɩpɛ kɛɛ yɛnwʋ ɔzɔ dima nɩ a?
Nyamɩnlɩ ɩla yɩ nwʋ ali ihile yɛ wɔ Bayɩbʋlʋ yi nu. Ise: “Mamɩ yɛ lɛ Gyehova. Mi dima yɛ nɩ.” (Kɩnga Ayɩzaya 42:5, 8.) Hibulu dima mɔɔ behile yɩ tʋ “Gyehova” nɩ, nnimidimaa sʋ̃maa bekile yɩ tʋ kɛɛ “Mɔɔ Ɩma Ɩyɛlɩ Ɛkɛ.” Gyehova ɩpɛ kɛɛ yɛnwʋ yi dima nɩ. (Ɛkɩsadɔsʋ 3:15) Kɛ ɩyɛ mɔɔ yɛnwʋ kɛɛ, ɩpɛ kɛɛ yɛnwʋ yi dima a? Yi dima ifidenli Bayɩbʋlʋ nu mbɔmɩ 7,000 nɩ yɩ mɛda! a “Nɔhʋanlɛ Nyamɩnlɩ ɔkʋ̃ kyeinyii wɔ sʋlɔ nɩɩ azɩlɛ yɩ zʋ nɩ,” yi dima yɛ lɛ Gyehova.—Ditilonɔmi 4:39.
2. Mɩnla yɛ Bayɩbʋlʋ ɩma yɛnwʋ yɛfalɩ Gyehova nwʋ a?
Bayɩbʋlʋ ɩkã kɛɛ, anyamɩnlɩ munwala mɔɔ adasamaa bɔsʋ̃mɩ bɛ nɩ, Gyehova nkʋ̃ʋ̃ la yɛ ɩdɩ nɔhʋanlɛ Nyamɩnlɩ a. Mɩnla ti a? Sianti sʋ̃maa ti yɛ ɩma yɛkãã ɔzɔ a. Gyehova yɛ ɩdɩ tumi munwatĩĩ diibenyia a, na yɩzayɩ nkʋ̃ la yɛ ɩdɩ “Sʋlɔ Sʋlɔnii wɔ azɩlɛ yɩ munwatĩĩ zʋ a.” (Kɩnga Ndwomi 83:18.) Mɛyɩ yɛ ɩdɩ “Dɩyɛ Munwala Zʋ Tumivʋlɔ” a, eyi ikile kɛɛ ɩwɔ tumi mɔɔ ɩkʋla ɩfa ɩyɛ mɔɔ ɩpɛ kɛɛ ɩyɛ bela. Mɛyɩ yɛ “ɩwɔlɩ nninyeni munwatĩĩ” yɩ a—kile kɛɛ, amansɔnɩ eyi nɩɩ dɩyɛ bela mɔɔ ɩwɔ azɩlɛ yɩ zʋ nɩ. (Yikile 4:8, 11) Na Gyehova yɩzayɩ nkʋ̃ kyeinyii yɛ ɩwʋwa azɩ mmɩlɩ tɩndɩnlɩ na ɩkɔwʋwa azɩ daabaa sʋ̃ a.—Ndwomi 90:2.
SUMÁ SƲ̃MAA
Sunzú sʋnʋnkʋ̃ mɔɔ ɩwɔ Nyamɩnlɩ yɩ abodini azʋlɔtʋ nɩɩ yi dima mɔɔ ɩda ndwɩ nɩ nwʋ. Na sumá kezimɔ ɩlalɩ yi dima nɩ ali ihileli wʋ, nɩɩ sianti mɔɔ ɩyɛlɩ ɔzɔ nɩ.
3. Nyamɩnlɩ ɩwɔ abodini sʋ̃maa, naasʋ̃ yi dima ɩdɩ ɔkʋ̃ kyeinyii
Sɛ ɛpɛ kɛɛ ɔnwʋ sʋnʋnkʋ̃ mɔɔ ɩwɔ abiye yi abodini nɩɩ yi dima nu a, Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Mɩnla sʋnʋnkʋ̃ yɛ ɩwɔ abodini dɩkɛɛ “Niibenyia” nɩɩ dima nu a?
Bayɩbʋlʋ ɩkã kɛɛ, mmenii sʋ̃mɩ anyamɩnlɩ nɩɩ niibenyiammɔ sʋ̃maa. Kɩnga Ndwomi 136:1-3, na bozunzú odwokɔɣizialɛ eyi nwʋ:
-
Aninyia yɛ ɩdɩ “anyamɩnlɩ nu Nyamɩnlɩ” yɛɛ “niibenyiammɔ nu Niibenyia a”?
4. Gyehova ɩpɛ kɛɛ ɔnwʋ yi dima, na ɛfa edi egyima
Mɩnla yɛ ikile kɛɛ Gyehova ɩpɛ kɛɛ ɔnwʋ yi dima a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Ekila a, mɩnla ti mɔɔ Gyehova ɩpɛ kɛɛ ɔnwʋ yi dima a?
Gyehova ɩpɛ kɛɛ bɔnwʋ yi dima na bɛfa bɔfʋlɔ yɩ. Kɩnga Wulomimaa 10:13 (NWT), na akʋ̃ bozunzú ndwokɔɣizialɛ eyimmɔ nwʋ:
-
Mɩnla ti mɔɔ nwʋmɔ ihyinyia kɛɛ ɛfa Nyamɩnlɩ yi dima Gyehova edi egyima a?
-
Sɛ abiye ɩkakɛ wu dima na ɩfa ɩfʋlɔ wʋ a, ɩyɛ a, kɛ ɛtɩ nɣanlɩ ese a?
-
Sɛ ɛfa Gyehova yi dima ɔfʋlɔ yɩ a, ekila a kɛ ɩkɛdɩ nɣanlɩ ikeze a?
5. Gyehova ɩpɛ kɛɛ ebike yi
Baalɛ be mɔɔ ɩzʋ̃ Cambodia mɔɔ bɔfʋlɔ yɩ Soten ɩhanlɩ kɛɛ, Nyamɩnlɩ yi dima nwʋ dɩyɛ mɔɔ izuma nɩ, ɩma “inyia anyɩnlɩlelɛ mɔɔ ɩtɛla ebiyela.” Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, Nyamɩnlɩ yɩ nwʋ dɩyɛ mɔɔ Soten izumanlɩ nɩ kɛ ɩhanlɩ yɩ izeli a?
Ansaana ɛkɛyɛ abiye yɩ ɔhɔnwʋ nɩ, edi bɔmʋnlɩ ɔnwʋ yi dima. Kɩnga Gyemisi 4:8a, na akʋ̃ bozunzú ndwokɔɣizialɛ eyimmɔ nwʋ:
-
Mɩnla yɛ Gyehova ɩtʋʋ salɛ ɩfʋlɔ wʋ kɛɛ ɛyɛ a?
-
Mɩnla ɔhʋanɩ zʋ yɛ Nyamɩnlɩ yi dima mɔɔ ɔkɔnwʋ yɩ na wʋava wʋavʋlɔ yɩ nɩ, ɩkɔwʋwa wʋ ma ekeɣike yɩ a?
ABIYEMMƆ BƐKÃ KƐƐ: “Nyamɩnlɩ ɔkʋ̃ la yɛ ɩwɔ ɛkɛnɩ a, meti dima bela mɔɔ ɛkɛva ɔkɔvʋlɔ yɩ nɩ, ɩávalɩ nwʋ.”
-
Asʋ̃ ede edi kɛɛ Nyamɩnlɩ yi dima yɛ lɛ Gyehova a?
-
Sianti mɔɔ Nyamɩnlɩ ɩpɛ kɛɛ yɛfa yi dima yɛfʋlɔ yɩ nɩ, kɛ ekehilehile numɔ ekeze a?
YƖ DƆKƆWƆLƐ
Nɔhʋanlɛ Nyamɩnlɩ ɔkʋ̃ kyeinyii nɩ, yi dima yɛ lɛ Gyehova. Ɩpɛ kɛɛ yɛnwʋ yi dima nɩ na yɛfa yɛfʋlɔ yɩ, na ama yɛahʋla yɛaɣike yi.
Kɛ Okowuwa Ekeze a?
-
Mɩnla yɛ ɩma Gyehova ɩyɛ sʋnʋnkʋ̃ wɔ anyamɩnlɩ mvʋlɔ mɔɔ mmenii sʋ̃mɩ bɛ nɩ nwʋ a?
-
Mɩnla ti mɔɔ ɩsɛ kɛɛ yɛfa Nyamɩnlɩ yi dima yɛfʋlɔ yɩ a?
-
Mɩnla yɛ ikile kɛɛ Gyehova ɩpɛ kɛɛ ebike yɩ a?
PƖBƐ́ SƲ̃MAA
Sunzú sianti azʋlɔtʋ anlu be ti mɔɔ yɛkɔhʋla yekele yekeli kɛɛ Nyamɩnlɩ ɩwɔ ɛkɛnɩ nɩ nwʋ.
Mɩnla ti mɔɔ ntɩyasɩ wɔ numɔ kɛɛ, yekele yekeli kɛɛ Nyamɩnlɩ ɩwɔ ɛkɛnɩ eɣile bela a?
“Aninyia Yɛ Ɩwɔlɩ Nyamɩnlɩ a?” (Ɔwɩɛnɩlɛ Aɣanɩ, August 1, 2014)
Sumá sianti mɔɔ ɩsɛ kɛɛ yɛfa Nyamɩnlɩ yi dima yedi egyima ɩávalɩ nwʋmɔ kɛɛ yézi kezimɔ nɩ bɔbɔ dima yɩ wɔ ɔwɔkɩ nɩ.
Asʋ̃ dima kʋ̃ mɔɔ yɛfa yɛfʋlɔ Nyamɩnlɩ nɩ nwʋmɔ ihyinyia a? Kilá sianti mɔɔ yɛkɔhʋla yɛkɛhã kɛɛ yi dima ankasa ɩdɩ ɔkʋ̃ kyeinyii nɩ.
a Sɛ ɛpɛ kɛɛ ɔnwʋ ndwokɔ sʋ̃maa ɛfalɩ Nyamɩnlɩ yi dima nɩɩ sianti mɔɔ Bayɩbʋlʋ tʋhilelɛmaa sʋ̃maa bɛyɩ dima nɩ wɔ Bayɩbʋlʋ nu nɩ nwʋ a, kilá Nninyeni Mvʋlɔ A4 wɔ New World Translation of the Holy Scriptures yi nu wɔ Twi nu.
