LIKE SUANLƐ 04
?Wan yɛle Ɲanmiɛn?
Kɛ ɔ fɛ i laa lele’n, sran’m be sɔ ninnge kpanngban. Sanngɛ Biblu’n se kɛ Ɲanmiɛn kun o lɛ m’ɔ ‘ti dan tra ɲanmiɛn onga’m be kwlaa-ɔ.’ (2 Be Ɲoliɛ 2:5) ?Wan yɛle Ɲanmiɛn sɔ’n? ?Yɛ ngue ti yɛ ɔ ti dan tra ninnge kwlaa nga sran’m be sɔ be’n niɔn? Like suanlɛ nga nun’n, á wá kán Ɲanmiɛn sɔ’n i ndɛ.
1. ?Ɲanmiɛn i dunman’n yɛle benin? ?Ngue yɛ ɔ kle kɛ ɔ kunndɛ kɛ e si i dunman’n niɔn?
Ɲanmiɛn bo i dunman’n kle e Biblu’n nun. Ɔ seli kɛ: “N ti Zoova. Min dunman’n yɛ ɔ o lɛ-ɔ.” (Kanngan Ezai 42:5, 8 nun.) Ebre nun’n, dunman Zoova’n i bo’n yɛle kɛ “ɔ yo maan ɔ kpɛn su.” Zoova kunndɛ kɛ e si i dunman’n. (Ezipti Lɔ Tulɛ 3:15) ?Ngue yɛ ɔ kle sɔ-ɔ? Ɔ yoli maan be klɛli i dunman’n Biblu’n nun kpɛ 7.000! a Dunman Zoova’n ɔ ti Ɲanmiɛn ng’ɔ “ti Ɲanmiɛn Kpli nglo lɔ nin asiɛ’n su” wa’n i dunman.—Mmla’n 4:39.
2. ?Zoova i su ndɛ benin yɛ Biblu’n kan-ɔn?
Biblu’n se kɛ Zoova kunngba cɛ yɛ ɔ ti Ɲanmiɛn Kpli’n niɔn. ?Ngue ti-ɔ? Sa nga ti yɛ ɔ se sɔ’n i wie yɛle kɛ Zoova ‘kunngba cɛ yɛ ɔ o Like Kwlaa Ti Su asiɛ wunmuan’n su-ɔ.’ (Kanngan Jue Mun 83:18 nun.) Ɔ “kwla like kwlaa yo,” i sɔ’n kle kɛ ɔ le tinmin fa yo like kwlaa ng’ɔ klo kɛ ɔ́ yó’n. Ɔ “yili like kwlaa” nglo lɔ nin asiɛ’n su wa. (Sa Nglo Yilɛ 4:8, 11) Zoova kunngba cɛ yɛ kɛ ɔ fɛ i laa lele’n ɔ o lɛ titi-ɔ, yɛ ɔ́ ká lɛ tititi.—Jue Mun 90:2.
SI NDƐ’N NUN KPA EKUN
Maan e fa e ɲin e sie i like nga ti yɛ e kwla se kɛ Ɲanmiɛn i tɔnndɔnlɛ dunman mun, ɔ nin i dunman kpakpa’n be timan kun’n i su. I sin’n é wá wún like nga Ɲanmiɛn yoli naan y’a kwla si i dunman’n, ɔ nin like nga ti yɛ ɔ yoli sɔ’n.
3. Ɲanmiɛn i dunman kpakpa’n ti kunngba cɛ
Kɛ ɔ ko yo naan w’a si ngbaciɛ ng’ɔ o sran kun i tɔnndɔnlɛ dunman’n nin i dunman kpakpa’n be afiɛn’n, an bo VIDEO’N, i sin’n an koko kosan yɛ’n i su yalɛ:
-
?Ngbaciɛ benin yɛ ɔ o sran kun i tɔnndɔnlɛ dunman’n nin i dunman kpakpa’n be afiɛn-ɔn?
Biblu’n kle kɛ sran’m be sɔ ninnge kpanngban. An kanngan Jue Mun 136:1-3 nun, i sin’n an koko kosan yɛ’n i su yalɛ:
-
?Wan yɛ ɔ ti “ɲanmiɛn’m be Ɲanmiɛn” nin “miɛn’m be Miɛn’n” niɔn?
4. Zoova kunndɛ kɛ a si i dunman’n naan a fa flɛ i
?Ngue yɛ ɔ kle kɛ Zoova kunndɛ kɛ a si i dunman’n niɔn? An bo VIDEO’N, i sin’n an koko kosan yɛ’n i su yalɛ:
-
?Ngue ti yɛ ɔ ti cinnjin kɛ e bo Zoova i dunman’n niɔn?
Zoova kunndɛ kɛ sran’m be bo i dunman’n. An kanngan Rɔmunfuɛ Mun 10:13 nun, i sin’n an koko kosan yɛ’m be su yalɛ:
-
?Kɛ sran kun i wla kpɛn ɔ dunman’n su m’ɔ fa flɛ wɔ’n, i sɔ’n yo wɔ sɛ?
-
?Kɛ e bo Zoova i dunman’n, i sɔ’n yo i sɛ?
-
?A bu i kɛ Zoova kunndɛ kɛ sran’m be si i dunman’n? ?Ngue ti-ɔ?
5. Zoova kunndɛ kɛ a fa ɔ wun mɛntɛn i
Be flɛ bla kun kɛ Sotɛnin, ɔ fin Kanbɔji. Ɔ seli kɛ, kɛ ɔ sili Ɲanmiɛn i dunman’n, i sɔ’n yoli i fɛ dan. An bo VIDEO’N, i sin’n an koko kosan yɛ’n i su yalɛ:
-
?Video’n nun’n, kɛ Sotɛnin sili Ɲanmiɛn i dunman’n, i sɔ’n yoli i sɛ?
Sɛ a kunndɛ kɛ á káci sran kun i janvuɛ’n, ɔ fata kɛ a si i dunman’n. An kanngan Zaki 4:8 i bue klikli’n nun, i sin’n an koko kosan yɛ’m be su yalɛ:
-
?Ngue yɛ Zoova kunndɛ kɛ a yo-ɔ?
-
?Ngue ti yɛ sɛ a si Ɲanmiɛn i dunman’n naan a fa flɛ i’n, i sɔ’n yó maan a nin i amun afiɛn mántan-ɔn?
SRAN WIE’M BE WAAN: “Ɲanmiɛn ti kunngba cɛ, ɔ maan ɔ timan cinnjin kɛ e bo i dunman’n.”
-
?A lafi su kɛ Ɲanmiɛn i dunman’n yɛle Zoova?
-
?Wafa sɛ yɛ a kwla yiyi nun kle sran kun kɛ Ɲanmiɛn kunndɛ kɛ e bo i dunman-ɔn?
NDƐ’N I KPƆLƐ BOLƐ
Ɲanmiɛn Kpli i dunman’n yɛle Zoova. Ɔ kunndɛ kɛ e si i dunman’n naan e fa flɛ i. I liɛ’n, e nin i e afiɛn mántan.
Ndɛ’n i nun flanlɛ
-
?Ngue ti yɛ Zoova nin ninnge nga sran’m be sɔ be’n be timan kun-ɔn?
-
?Ngue ti yɛ ɔ fata kɛ e bo Zoova i dunman’n niɔn?
-
?Ngue yɛ ɔ kle kɛ Zoova kunndɛ kɛ a fa ɔ wun mɛntɛn i-ɔ?
NDƐ WIE MUN EKUN
Like nnun mɔ be kle kɛ Ɲanmiɛn o lɛ sakpa’n.
Like nga ti yɛ sɛ e lafi su kɛ Ɲanmiɛn o lɛ tititi’n ɔ ti su’n.
“?Wan yɛ ɔ yili Ɲanmiɛn-ɔn?” (Sasafuɛ Tranwlɛ’n, afuɛ 2014 Utu 1)
Kannzɛ bɔbɔ e siman wafa nga be kanngan Ɲanmiɛn i dunman’n i trele sa’n, sanngɛ ɔ ti cinnjin kɛ e fɛ i dunman’n e flɛ i.
?Dunman nga e fa flɛ Ɲanmiɛn’n, ɔ ti cinnjin? Nian sa nga ti yɛ e kwla se kɛ i dunman kpakpa’n ti kunngba’n.
a Sɛ a kunndɛ kɛ á sí Ɲanmiɛn i dunman’n i su ndɛ wie mun ekun’n, annzɛ like nga ti yɛ be yili dunman sɔ’n Biblu wie’m be nun’n, nian Ɲanmiɛn Ndɛ’n—Mɛn Uflɛ Biblu’n i ndɛ uflɛ wie mun A4 nun lɔ.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
