ISAMBILILO 04
Bushe Lesa Nani?
Ukufuma fye na kale, abantu balapepa balesa abalekanalekana. Lelo Baibolo ilanda fye pali Lesa umo “umukalamba ukucila balesa bambi.” (2 Imilandu 2:5) Nani uyu wine Lesa? Kabili cinshi calenga abe umukalamba sana ukucila balesa bonse abo abantu bapepa? Muli ili isambililo, mumone ifyo uyu Lesa afwaya mwaishiba pali ena.
1. Bushe Lesa nani ishina, kabili kuti twashininkisha shani ukuti alafwaya twaishiba ishina lyakwe?
Lesa umwine ali-ilondolola mu Baibolo. Alanda ukuti: “Nine Yehova. Ilyo e shina lyandi.” (Belengeni Esaya 42:5, 8.) Ishina “Yehova” balipilibula ukufuma kwi shiwi lya ciHebere ilyo abasambilila ifya mu Baibolo abengi balanda ukuti lipilibula ukutila “E Ulenga Ifintu Ukubako.” Yehova alafwaya twaishiba ishina lyakwe. (Ukufuma 3:15) Twaishiba shani ukuti Yehova alafwaya twaishiba ishina lyakwe? Alilenga ishina lyakwe ukulembwa mu Baibolo ukucila pa miku 7,000! a Ishina lya kuti Yehova lilosha fye kuli “Lesa wa cine mu muulu ku muulu na pe sonde pa nshi.”—Amalango 4:39.
2. Finshi Baibolo itweba pali Yehova?
Baibolo itila pali balesa bonse abo abantu bapepa, Yehova fye e Lesa wa cine. Cinshi ilandila ifi? Kwaliba ifingi ifilanga ukuti Yehova e Lesa wa cine eka. Yehova e wakwatisha amaka ya kuteka, kabili eka fye ‘E Wapulamo pano isonde ponse.’ (Belengeni Amalumbo 83:18.) Baibolo imwita ukuti “Uwa Maka Yonse,” pantu alikwata amaka ya kucita conse ico alefwaya ukucita. ‘E wabumbile ifintu fyonse,’ e kutila umuulu ne sonde e lyo na fyonse ifya mweo ifyabamo. (Ukusokolola 4:8, 11) Na kabili Yehova fye e wabako ukufuma umuyayaya, kabili akatwalilila ukubako umuyayaya.—Amalumbo 90:2.
SAMBILILENI NA FIMBI
Sambilileni ubupusano bwaba pa malumbo ya kwa Lesa ne shina lyakwe ilyaibela. Lyena sambilileni ne fyo acita pa kulenga mwishibe ishina lyakwe, ne co afwaila mwalishiba.
3. Lesa alikwata amalumbo ayengi, lelo akwata fye ishina limo
Pa kuti mwishibe ubupusano bwaba pa malumbo abantu babomfya pa kwita umuntu e lyo ne shina lyakwe, tambeni VIDIO, lyena lanshanyeni icipusho cakonkapo.
-
Bupusano nshi bwaba pa malumbo pamo nga “Shikulu,” e lyo ne shina?
Baibolo itila abantu balapepa balesa abengi na bashikulu abengi. Belengeni Amalumbo 136:1-3, lyena lanshanyeni ici cipusho:
-
Bushe “Lesa uwacila tulesa tonse” kabili “Shikulu uwacila bashikulu bonse” nani?
4. Yehova afwaya mwaishiba ishina lyakwe no kulalibomfya
Finshi filanga ukuti Yehova afwaya mwaishiba ishina lyakwe? Tambeni VIDIO, lyena lanshanyeni icipusho cakonkapo.
-
Cinshi muletontonkanishisha ukuti Yehova alafwaya abantu baishiba ishina lyakwe?
Yehova afwaya abantu balebomfya ishina lyakwe. Belengeni Abena Roma 10:13, lyena lanshanyeni aya mepusho:
-
Bushe ukubomfya ishina lya kwa Lesa ilya kuti Yehova kwacindama shani?
-
Bushe mumfwa shani umuntu nga aibukisha ishina lyenu no kulibomfya?
-
Bushe mulemona ukuti Yehova omfwa shani nga mwabomfya ishina lyakwe?
5. Yehova afwaya ukuti mwaba cibusa wakwe
Ba Soten abanakashi aba ku Cambodia batile ilyo basambilile pe shina lya kwa Lesa bali ne nsansa isho bashabalile abakwatapo. Tambeni VIDIO, lyena lanshanyeni icipusho cakonkapo.
-
Muli iyi vidio twatamba, finshi fyafuminemo ilyo ba Soten baishibe ishina lya kwa Lesa?
Ilingi line ilyo mushilaba ifibusa no muntu, mubalilapo ukwishiba ishina lyakwe. Belengeni Yakobo 4:8a, lyena lanshanyeni aya mepusho:
-
Cinshi Yehova afwaya mwacita?
-
Bushe ukwishiba ishina lya kwa Lesa no kulalibomfya kuti kwalenga shani mwaba sana icibusa cakwe?
ABANTU BAMO BATILA: “Kwaba fye Lesa umo, kanshi kuti mwamwita ifyo mulefwaya.”
-
Bushe namushininkisha ukuti ishina lya kwa Lesa ni Yehova?
-
Kuti mwalondolwela shani umuntu ukuti Lesa alafwaya tulebomfya ishina lyakwe?
IFYO MUSAMBILILE
Kwaba fye Lesa wa cine umo, ishina lyakwe ni Yehova. Alafwaya twaishiba ishina lyakwe no kulalibomfya pa kuti tube sana ifibusa fyakwe.
Ukupitulukamo
-
Bushe Yehova apusanako shani kuli balesa bambi abo abantu bapepa?
-
Mulandu nshi tulingile ukubomfesha ishina lya kwa Lesa?
-
Finshi filanga ukuti Yehova alafwaya mwaba sana cibusa wakwe?
ISHIBILENIPO NA FIMBI
Moneni ifintu 5 ifingalenga twashininkisha ukuti Lesa e ko aba.
Moneni umulandu tulingile ukucetekelela ukuti Lesa e ko aba ukufuma umuyayaya no kuya umuyayaya.
“Nani Uwapangile Lesa?” (Ulupungu lwa kwa Kalinda, August 1, 2014)
Moneni ico tulingile ukulabomfesha ishina lya kwa Lesa nangu ca kuti tatwaishiba bwino bwino ifyo balelishimbula kale sana.
Bushe Lesa kuti twamwita fye ifili fyonse ifyo tulefwaya? Moneni ico twingalandila ukuti akwata fye ishina limo.
a Nga mulefwaya ukwishibilapo na fimbi pa bupilibulo bwe shina lya kwa Lesa e lyo ne co balifumishamo mu maBaibolo yamo, moneni Akatabo ka Kutwafwa Ukusambilila Icebo ca kwa Lesa, amabula 1-5.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
