FARKARKOR 04
Manseiso Allah Ḇekaku ya?
Ro fafisu naiwara isof ro baboine, snonggaku sya sisyom allah ḇebor ma karwar sya. Imboi, Refo doḇe Manseren Allah ḇekaku ima oser monda ma ima iba syadi ro allah ḇese syakam. (2 Tawarikh 2:5) Rosai ḇefrur fa iso ḇeba syadi ya? Ro farkarkor ine, nari kawos moḇsa Manseren Allah fyasnai manggundi insama wakmambir I.
1. Manseren Allah snoriso, ma rosai ḇefasnai ima imarisen fa kofawi snonsnon Ḇyedi?
Manseren Allah fyasnaiḇair manggundi ḇe ko ro Refo ya. Doḇe, ”Ayaine Yahwe. Iso snonsnon Ayedi.” (Kowasya Yesaya 42:5, 8.) Sfarwei wos ”Yahwe” ine ro wos Ibrani, ma manfawawi sya soḇe knam ro snonsnon ine isoine ”Iso Ḇefnai fa Ndarirya”. Yahwe imarisen insama kofawi snonsnon Ḇyedi. (Keluaran 3:15) Kofawi roi ine ro? Sfas Manseren Allah snonsnon Ḇyedi ro Refo nasyadi ro rarwan ri 7.000! a Yahwe iso snonsnon ro ”Allah ḇekaku ro nanggi ma supswan” ine.—Ulangan 4:39.
2. Rosai monda Refo ikofenḇair ḇe ko ḇekur Yahwe I?
Refo doḇe snonggaku sia sisyom allah-allah ḇebor sya, fama Yahwe derer monda iso Allah ḇekaku ya. Kukro? Refo isya ikofenḇair roi ḇefnai ya. Yahwe derer monda iso ”Ḇekaki Syadi ro supswan ḇesiper”. (Kowasya Mazmur 83:18.) Refo dap Yahwe I ḇe ’Ḇepoik Syadi’ kukro nya papoik fa ifrur rosai imarisen nakam. Iso ’ḇefrur roi ḇebor kam’ isoine farsyos ḇeba ine ma roi ḇekenem ro supswan ine bori kam. (Fasasna [Wahyu] 4:8, 11) Oso wer ido, Yahwe derer monda ḇekenem isof fyoro-fyoro.—Mazmur 90:2.
SWEWAR KAKU WER
Nari kawos roi ḇefrur fa Manseren Allah snonsnon Ḇyedi iḇese ro nasan Ḇyena. Nari kawos rariso fyasnai snonsnon Ḇyedi ḇe Au ma rosai eḇedar fa fyasnai na ḇe Au ya.
3. Manseren Allah nasan Ḇyena nabore, ḇape nya snonsnon oser monda
Imbe wafawi nasan ima iḇese ro snonsnon ido, komam VIDIO, raimnai kawos fakfuken ine.
-
Moḇsa nasan ya, raris nasan ”Manseren”, iḇese ro snonsnon ya rai?
Refo doḇe kawasa ḇebor sisyom allah ma manseren sibore. Kowasya Mazmur 136:1-3, raimnai kawos fakfuken ine:
-
Manseiso ”Allah ro bo allah syakam”?
4. Yahwe imarisen insama kofawi ma kap snonsnon Ḇyedi
Moḇsa kofawi Yahwe ima imarisen insama kofawi snonsnon Ḇyedi? Komam VIDIO, raimnai kawos fakfuken ine.
-
Kwara ido, rosai ḇefnai fa Yahwe imarisen kofawi snonsnon Ḇyedi?
Yahwe imarisen insama kap snonsnon Ḇyedi. Kowasya Roma 10:13, raimnai kawos fakfuken nane:
-
Rosai ḇefnai fa kap kaku snonsnon Allah isoine, Yahwe I?
-
Snonggaku oso iswarepen snonsnon Bani ma dor Au kuker dap snombri ido, moḇsa na ḇaḇir rai?
-
Kwara ido, moḇsa na Yahwe ḇyaḇir rai fafisu kap snonsnon Ḇyedi?
5. Yahwe imarisen kofanam yoḇ I
Bin oso ḇeraker sup Kamboja snori Soten, ikofen ḇo doḇe fafisu insape dakfawi randak Allah snonsnon Ḇyedi, imarisen syadi. Komam VIDIO, raimnai kawos fakfuken ine.
-
Fafisu imbesrar Soten ifawi Allah snonsnon Ḇyedi kwar, payamyum rosai ismai na?
Bebati fanam kuker snonggaku oso ḇaim ido, na wafawi ḇepon snonsnon ḇyedi resari. Kowasya Yakobus 4:8a, raimnai kawos fakfuken suine:
-
Rosai Yahwe dor ro Au fa wafrur ya?
-
Rosai ḇefnai fa wafawi ma wap Manseren Allah snonsnon Ḇyedi kada nari wafanam syadi yoḇ I?
SIA SOḆE: ”Manseren Allah ḇekaku ima oser monda. Inja imbe kap I kuker apap nabor kako yo, sasar oḇa.”
-
Wakyar kaku Yahwe iso Manseren Allah ḇekaku snonsnon Ḇyedirya ke?
-
Moḇsa na wakofenḇair ḇe ḇesesya snar Manseren Allah imarisen kap snori?
FARKARKOR ḆYENA
Allah ḇekaku ima oser monda ma snonsnon Ḇyediso Yahwe. Imarisen fa kofawi ma kap snonsnon Ḇyedi insama kofanam syadi yoḇ I.
Waswarepen Kaḇer
-
Rosai ḇefrur fa Yahwe ima iḇese ro allah-allah ma roi sor ḇe karwar sia sisyom ansya?
-
Rosai ḇefnai kaku fa kap Allah snonsnon Ḇyedi?
-
Moḇsa kofawi Manseren Allah imarisen insama kofanam yoḇ I?
SWEWAR NABOR WER
Rosai ḇefrur fa kokyar kaku Manseren Allah ima isya kaku? Wawasya roi ri rim ḇero fasfas ine.
Kokyar Manseren Allah ima isya ḇesya kwar nama nasrow ke?
”Manseren Allah Ima Mansei Ḇefrur I?” (Syap Baryas 1 Agustus 2014)
Kofawi mnis ḇa moḇsa snonggaku randak siwara sap Allah snonsnon Ḇyedi rai. Imboi rosai ḇefnai fa kap kaku snonsnon anya?
Bisa kor Manseren Allah kuker apap rosairirya kako ke? Rosai ḇefrur fa kokyar Manseren Allah nya snonsnon oser monda?
”Manseren Allah Nya Snonsnon ri Fis?” (Fasfas ro situs jw.org)
a Imbe wafawi nabor syadi Manseren Allah snonsnon Ḇyedi ma rosai ḇefnai fa sipyos snonsnon anya ro Refo ḇeḇeso na ido, mam ro Lampiran A4 ro Kitab Suci Terjemahan Dunia Baru.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
