KALANSEN 04
Ala ye jɔni ye?
Kabini Hadamadenw kɛra yen, u ye ala caman ani batofɛn musoman caman bato. Nka Bibulu bɛ Ala kelen kofɔ, o min “ka bon ni batofɛn tɔw bɛɛ ye.” (2 Tilew Kibaru 2:5) O ye Ala jumɛn ye? Ani mun de ye ale kɛ Ala ye, min ka bon ni batofɛn tɔw bɛɛ ye mɔgɔw bɛ minnu bato? Nin kalansen in kɔnɔ, a ɲini k’a dɔn o Ala in b’a fɛ i ka fɛn min dɔn ale ko la.
1. Ala tɔgɔ ye jumɛn ye ani an bɛ se ka d’a la cogo di ko a b’a fɛ an ka o tɔgɔ dɔn?
Ala y’a yɛrɛ jira an na Bibulu kɔnɔ. A ko: “Ne ye Jehova de ye, o ye ne tɔgɔ ye.” (Esayi 42:5, 8 kalan, Bible Senuma, 1961.) Fɔcogo min ye ko “Jehova”, o ye Heburukan tɔgɔ bayɛlɛmalen ye, min kɔrɔ ye ko “A b’a fɛ min ka kɛ o bɛ kɛ”. Jehova b’a fɛ an k’a tɔgɔ dɔn. (Ekisode 3:15, Bible Senuma, 1961) An bɛ se ka da o la cogo di? A y’a tɔgɔ don Bibulu kɔnɔ fo siɲɛ 7 000 ni kɔ ɲɔgɔn! a Tɔgɔ min ye ko Jehova, o ye Ala kelenpe dɔrɔn de tɔgɔ ye, o min ye “Ala ye sankolo la ani dugukolo kan”.—Dutɛrɔnɔmɛ 4:39, Bible Senuma, 1961.
2. Bibulu bɛ mun de fɔ an ye Jehova ko la?
Bibulu b’a fɔ ko mɔgɔw bɛ ala minnu bato, olu bɛɛ cɛla, Jehova kelenpe de ye Ala sɛbɛ ye. Mun na? O kunw ka ca? Kuntigiya kɔrɔtalenba bɛ Jehova de bolo ani ale kelenpe de ye “Kɔrɔtalen Ba ye dugukolo bɛɛ kun na.” (Zaburu 83:19 kalan, Bible Senuma, 1961.) “Sebaayabɛɛtigi” don, ka d’a kan ni a y’a latigɛ ko a bɛ fɛn o fɛn kɛ, o kɛli se b’a ye. “Fɛn bɛɛ dabaa” don—Dunuya kuuru bɛɛ ani fɛn o fɛn bɛ dugukolo kan. (Jirali 4:8, 11) Jehova kelenpe dɔrɔn kɛra yen tuma bɛɛ wa a bɛna ta’a fɛ ka kɛ yen fo badaa.—Zaburu 90:2.
DƆ FARA I KA DƆNNIYA KAN
Danfara min bɛ Ala bonyali tɔgɔw ni a tɔgɔ sɛbɛ cɛ, an ka o sɛgɛsɛgɛ. O kɔ, an b’a ɲini k’a dɔn, cogo min na ani kun min na Ala y’a tɔgɔ jira an na.
3. Bonyali tɔgɔ caman bɛ Ala la, nka tɔgɔ sɛbɛ kelenpe de b’a la
Walasa k’a dɔn danfara min bɛ mɔgɔ bonyali tɔgɔw ni a tɔgɔ yɛrɛ cɛ, a’ye WIDEYO lajɛ, o kɔ aw ka baro kɛ nin ɲininkali kan:
-
Danfara jumɛn de bɛ bonyali tɔgɔ, i n’a fɔ “Matigi,” ani tɔgɔ yɛrɛ cɛ?
Bibulu b’a fɔ ko mɔgɔw bɛ ala caman ani matigi caman bato. Zaburu 136:1-3 kalan, Bible Senuma, 1961. O kɔ aw ka baro kɛ nin ɲininkali kan:
-
Jɔni de ye “batofɛnw bɛɛ kun na Ala” [walima alaw ka Ala] ani “matigiw ka Matigi” ye?
4. Jehova b’a fɛ i k’a tɔgɔ dɔn ani ka to k’a fɔ
Mun b’a jira ko Jehova b’a fɛ i k’a tɔgɔ dɔn? A’ye WIDEYO lajɛ, o kɔ aw ka baro kɛ nin ɲininkaliw kan:
-
Yala e hakili la, Jehova b’a fɛ mɔgɔw ka a tɔgɔ dɔn wa? Mun na?
Jehova b’a fɛ mɔgɔw ka to ka a tɔgɔ fɔ. Romɛkaw 10:13 kalan, Bible Senuma, 1961. O kɔ aw ka baro kɛ nin ɲininkaliw kan:
-
Ka to ka Ala tɔgɔ Jehova fɔ, nafa jumɛn de b’o la?
-
E bɛ kɛ cogo di ni mɔgɔ dɔ hakili tora i tɔgɔ la ani ka to ka i wele i tɔgɔ la?
-
E hakili la, Jehova bɛ kɛ cogo di ni i tora ka a tɔgɔ fɔ?
5. Jehova b’a fɛ i ka gɛrɛ a la
Muso dɔ min bɛ bɔ Kanbɔdiji, min tɔgɔ ye Soten, o y’a fɔ ko Ala tɔgɔ dɔnni y’a dɛmɛ ka nisɔndiya sɔrɔ a “ma deli ka min ɲɔgɔn sɔrɔ.” A’ye WIDEYO lajɛ, o kɔ aw ka baro kɛ nin ɲininkali kan:
-
Wideyo kɔnɔ, Ala tɔgɔ dɔnni ye mun de kɛ Soten la?
Sani i ka kɛ mɔgɔ dɔ teri ye, siga t’a la ko i b’a ɲini ka a tigi tɔgɔ dɔn fɔlɔ. Yakuba 4:8a kalan, o kɔ aw ka baro kɛ nin ɲininkaliw kan:
-
Jehova b’a ɲini i fɛ i ka mun de kɛ?
-
Ka Ala tɔgɔ dɔn ani ka to ka a fɔ, o bɛ se ka i dɛmɛ cogo di i k’a ye ko i gɛrɛlen b’a la kosɛbɛ?
MƆGƆ DƆW B’A FƆ KO: “Ala kelenpe de bɛ yen, o la i mana a wele welecogo fɛn o fɛn na, o bɛ bɛn.”
-
Yala i dalen b’a la ko Jehova de ye Ala tɔgɔ ye wa?
-
E bɛ se k’a ɲɛfɔ cogo di ko Jehova b’a fɛ an ka to k’a tɔgɔ fɔ?
BAKURUBAFƆLI
Jehova de ye Ala sɛbɛ kelenpe tɔgɔ ye. A b’a fɛ an ka o tɔgɔ in dɔn ani ka to k’a fɔ walasa an ka se ka gɛrɛ a la.
Seginnkanni
-
Danfara jumɛnw de bɛ Jehova ni ala tɔw bɛɛ cɛ mɔgɔw bɛ minnu bato?
-
Mun na an ka kan ka to ka Ala tɔgɔ fɔ?
-
Mun de b’a jira ko Jehova b’a fɛ i ka gɛrɛ a la?
NINNU LAJƐ
Kun duuru sɛgɛsɛgɛ minnu na an bɛ se ka d’a la ko Ala bɛ yen.
A lajɛ kun min na an ka kan ka to ka Ala tɔgɔ fɔ hali ni a fɔcogo kɔrɔ dɔnnen tɛ tigitigi.
An bɛ Ala wele cogo min na, yala nafa b’o la wa? A lajɛ kun min na an bɛ se k’a fɔ ko halala tɔgɔ kelenpe de b’a la.
a Walasa ka kunnafoni wɛrɛw sɔrɔ Ala tɔgɔ kɔrɔ ko la ani k’a dɔn kun min na Ala tɔgɔ jɔsira ka bɔ Bibulu bayɛlɛmalen dɔw kɔnɔ, Ala ka kuma kalanni ɲɛminɛlan gafenin kalan.
