CƐ̃́Ɛ́-ÐƐ̀ 04
Nyɛ́ Mɔ̀ Geɖepɔɔ Kɛ́?
Sɔ̀ìn ti ɓɛ́ nyɔùn-dyù ɖú ma ɓóɖó-kpàà kɔ̃ cĩ́ɛń dyíɛ gboɛɛ, wa ɖà geɖepɔɔ pàɖà ɓè ɓiè. Kɛɛ, Baɓoɔ cɛ̃ Geɖepɔɔ ɖò ɓɛ́ ɔ kpé ɓúá dyí mìɔ ké ɔ zi geɖepɔɔ séín dyí kɛɛ jè. (2 Kánáníkɔ̀ 2:5) Ɔ mɔ̀ nyɛ́ kɛ́? Ké ɖɛ́ nyu ké ɔ kpé zià geɖepɔɔ tɔ̀ɔ̀ séín ɓè ɓɛ́ nyɔùn-dyù ɓiè kɛɛ dyí kɛ́? Ðé cɛ̃́ɛ́-ɖɛ̀ nìà kɛ múɛɛ, cɛ̃́ kà Geɖepɔɔ nìà kɛ nyu ɔ mìɔùn da zàà ɖé m̀ gboɛɛ jè.
1. Xwɛ̀ Geɖepɔɔ nyɛ́nɛ́ jù kɛ́, ké xwɛ̀ à ɓɛ́ìn dyí dyuòɛ̀ jɛ́ɛ́ kà ɔ mɔ́ ɓɛ́ à ké ɔ dyí dyuò kɛ́?
Ðé Baɓoɔ múɛɛ, Geɖepɔɔ zà ɔ mìɔùn da ɖé à gbo. Ɔ ɖá: “Ní nyɛ́nɛ́ mɔ̀ [Jɛhova].” (Zà Àzédyà 42:5, 8 wuɖuún.) “Jɛhova” mɔ̀ ɔ Híìbúɖúù-nyɛ̀nɛ̀ɔ̀ xwíníín-mú-zà-zà kɔ̃̀ xwíníín mɔ̀à “Ɔ Nyuɛ Ké Ɔ Nì” kɛ. Jɛhova mɔ́ ɓɛ́ à ké ɔ nyɛ́nɛ́ dyuò. (Ɛ́séɖɔ̀ 3:15) Xwɛ̀ à ɓɛ́ìn jàà poɛ kɛ́? Ðé Baɓoɔ múɛɛ, ɔ po ɖé ɔ nyɛ́nɛ́ɔ̀ kpa 7,000! a Nyɛ́nɛ́ mɔ̀à Jɛhova kɛɛ kɔ̃̀-nyɔ̀ mɔ̀ jàà “Geɖepɔɔ ɖé dyɔún kè nɔ ɓóɖó-kpàà kɔ̃.”—Dìtɔ̀wáɖánámɛ̀ 4:39.
2. Ðɛ́ Baɓoɔ tɛ̀mɛ̀ìn ɓá Jɛhova jè dyíɛ́?
Baɓoɔ ɖá ɖé geɖepɔɔ séín ɓè ɓɛ́ nyɔùn-dyù ɓiè kɛ hwìɛ̀ kɛɛ, Jɛhova ɖòùn mɔ̀ jàà Geɖepɔɔ. Xwíníínɔ̀ nyɛ́ kɔ̃̀ jèɛ́? Xwíníín pàɖà ɓè nì ɓó. Jɛhova kpé ɓúá dyí mìɔ, ké ɔ “ɖòùn mɔ̀ Ðɛɓíɔ́ ɓó ɓóɖó-kpà gànáà kɔ̃in.” (Zà Wɛ́ɖɛ́ 83:18 wuɖuún.) Ɔ ‘ɓéɖé kpé séín.’ Ɔ xwíníín mɔ̀, ɔ ɓéɖé kpé ɓɛ́ ɔ ké ɖɛ séín ɖò ɔ mɔ́ nyuɛ dyiɛɛ nyu. Ɔ “mɛ ma ɖɛ séín”—ɔ mɛ ma dyɔɔ̀ kè ɓóɖó-kpàà kè ɖɛ séín nì ɓóɖó-kpàà kɔ̃ɛ. (Wɛ̀ɖɛ̀ɓèɖésĩ̀ɔ̀ 4:8, 11) Jɛhova ɖòùn mɔ̀ nì-nì Geɖepɔɔ, ké ɔ mu nììn kánáá pu.—Wɛ́ɖɛ́ 90:2.
ÐE ÐƐ MÚIN CÁ
Gmɔìn zaìn gboi ɓɛ́ ɔ nì Geɖepɔɔ dya-dè-nyɛ̀nɛ̀ ɓèɔ̀ kè ɔ nyɛ́nɛ́ kpa ɖɛɔ̀ pṹa kɛɛ múin. Nìí, cɛ̃́ kà ɔ nyu ɔ nyɛ́nɛ́ɔ̀ m̀ dyí tɛ̀mɛ̀ìn kè xwíníín kɔ̃̀ jè ɔ nyuà náa kɛ.
3. Geɖepɔɔ ɓéɖé dya-dè-nyɛ̀nɛ̀ pàɖà ɓè, kɛɛ ɔ ɓéɖé nyɛ́nɛ́ dyúáɖò
Ɓɛ́ m̀ ké zaìn gboi nì nyɔ ɖòɛ̀ dya-dè-nyɛ̀nɛ̀ kè ɔ nyɛ́nɛ́ɔ̀ pṹa kɛɛ dyé ní, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ðɛ́ mɔ̀ zaìn gboi ɓɛ́ ɔ nì dya-dè-nyɛ̀nɛ̀ mɔ̀à “Bounɓo” kɛɛ kè nyɛ́nɛ́ ɖò pṹa kɛ́?
Baɓoɔ cɛ̃ɛ kà ɓɛ́ nyɔ ɓè ɓiè geɖepɔɔ kè bounɓo pàɖà ɓèɛ. Zà Wɛ́ɖɛ́ 136:1-3 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Nyɛ́ mɔ̀à ‘Geɖepɔɔ nìà geɖepɔɔ séín kɔ̃in’ kè ‘Bounɓo nìà bounɓo séín kɔ̃in’ nyɛ́?
4. Jɛhova mɔ́ ɓɛ́ m̀ ké ɔ nyɛ́nɛ́ɔ̀ dyuò ɓɛ́ m̀ kéɛ ɖá
Ðɛ́ tɛ̀mɛ̀ìn kà Jɛhova mɔ́ ɓɛ́ m̀ ké ɔ nyɛ́nɛ́ɔ̀ dyuò kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Nì hwòɖò ɖá Jɛhova mɔ́ ɓɛ́ nyɔ ɓè ké ɔ nyɛ́nɛ́ɔ̀ dyuòò? Xwíníínɔ̀ nyɛ́ kɔ̃̀ jèɛ́?
Jɛhova mɔ́ ɓɛ́ nyɔ ɓè ké ɔ nyɛ́nɛ́ɔ̀ ɖá. Zà Wóɖómà 10:13 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Ðɛ́ kɔ̃̀ jè ɔ kpaà ɖɛ ɓɛ́ nyɔ kéà Geɖepɔɔ nyɛ́nɛ́ mɔ̀à Jɛhova kɛɛ ɖá kɛ́?
-
Xwɛ̀ nì hwòɖò nyu nìɛ̀ ɔ jù ké nì nyɛ́nɛ́ɔ̀ dyi nyɔ ɖò hwìɖìi nì ké ɔ dyiɛ ɖá níɛ́?
-
Nì hwòɖò ɖá xwɛ̀ Geɖepɔɔ hwòɖò nyu nìɛ̀ ɔ jù ké m̀ dyi ɔ nyɛ́nɛ́ɔ̀ ɖá níɛ́?
5. Jɛhova mɔ́ ɓɛ́ m̀ ké ɔ bũ̀in xwɛ̃́ìn
Màa ɖò kɔ̃̀ nyɛ́nɛ́ mɔ̀ Sótɛ̃̀ìn ɓɛ́ ɔ sɔ̀ìn Kã̀bóɖíà-ɓòɖòɔ̀ kɔ̃ɛɛ cɛ̃ɛ kà ɓɛ́ Geɖepɔɔ nyɛ́nɛ́ɔ̀ jè cɛ̃́-cɛ̃́ nyu ké “ɔ ɓéɖé múà mìɔ kɛ.” Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ Geɖepɔɔ nyɛ́nɛ́ɔ̀ dyuò-dyuò nyu ma Sótɛ̃̀ìn bììɛ́?
Hwɛ̀ ɓɛ́ m̀ ké nyɔ ɖò ɓàto jù ní, m̀ kɔ̃̀ m̀ ké ɔ nyɛ́nɛ́ dyuò. Zà Jĩ́ìn 4:8 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Jɛhova ɖá m̀, ɓɛ́ m̀ ké ɖɛ́ nyu kɛ́?
-
Xwɛ̀ Geɖepɔɔ nyɛ́nɛ́ɔ̀ dyuò-dyuò kè ɔ ɖá-ɖá ɓɛ́ìn m̀ gbo kpáa, ɓɛ́ m̀ ké ɔ bũ̀in xwɛ̃́ìn nyɛ́?
NYƆ ÐÍƐ́ ƁÈ ÐÁ: “Geɖepɔɔ dyúáɖò nì ɓó. Ɔ jèɛɛ, kà séín ɖò m̀ nyu ɔ ɖáa kɛɛ se ɖɛ ɖò.”
-
M̀ poɛ jààà kà ɓɛ́ Geɖepɔɔ nyɛ́nɛ́ mɔ̀ Jɛhova kɛɛ̀?
-
Xwɛ̀ nì muɛ kɔ̃in zaìn kà ɓɛ́ Geɖepɔɔ mɔ́ ɓɛ́ à ké ɔ nyɛ́nɛ́ɔ̀ ɖá kɛ́?
SṸÌN-XWÍNÍÍN
Jɛhova mɔ̀ jàà Geɖepɔɔ dyúáɖò kpéé-kpééɔ̀ nyɛ́nɛ́. Ɔ mɔ́ ɓɛ́ à ké ɔ nyɛ́nɛ́ɔ̀ dyuò kè ɓɛ́ à kéɛ ɖá, ɓɛ́ à ké ɔ bũ̀in xwɛ̃́ìn ɓɛ́ìn.
Ðɛ-kɔ̃in-kpa-kpa
-
Xwɛ̀ Jɛhova nyu kòɛ̀ ɓó geɖepɔɔ tɔ̀ɔ̀ séín ɓè ɓɛ́ nyɔ ɓè ɓiè kɛɛ gbo kɛ́?
-
Xwíníínɔ̀ nyɛ́ kɔ̃̀ jè à mɛ ɖáà Geɖepɔɔ nyɛ́nɛ́ɔ̀ kɛ́?
-
Ðɛ́ tɛ̀mɛ̀ìn kà ɓɛ́ Jɛhova mɔ́ ɓɛ́ à ké ɔ bũ̀in xwɛ̃́ìn nyɛ́?
CƐ̃́ ÐƐ PÀÐÀ
Gmɔìn jàà-ɖɛ̀ hm̀m̀ ɓè ɓɛ́ wa tɛ̀mɛ̀ìn wáɖáá kà ɓɛ́ Geɖepɔɔ nì kɛɛ múin.
Dyé xwíníín kɔ̃̀ jè kà Geɖepɔɔ ɖà nì ti séín nyɛɛ jè jàà-po-po nyuà fɔ̀nɔ̀ hwòɖò kɛ.
“Nyɛ́ Mɛ Ma Geɖepɔɔ Kɛ́?” (Dyí-Gmɔ̀ìn-Gbò-Cèè-Ðɛ̀ɔ̀, Káná-Vɛ̀nɛ̀ 1, 2014)
Cɛ̃́ xwíníín kɔ̃̀ jè à mɛ ɖáà Geɖepɔɔ nyɛ́nɛ́ɔ̀ kɛbì à mɛ se kà wa nyuó ɔ zɔ̃̀ɔ̀ ɖáa kĩ́ín nyɛɛ dyí dyuòɛ.
Kà à nyu Geɖepɔɔ ɖáa kɛɛ jè kpa ɖɛɛ̀? Dyé xwíníín kɔ̃̀ jè à ɓɛ́àìn cɛ̃ɛ kà ɓɛ́ Geɖepɔɔ ɓéɖé nyɛ́nɛ́ jɛ́ɛ́ dyúáɖò kɛ.
