TANAJ 04
¿Achike ri Dios?
Kan xa xe toq xekʼojeʼ pe ri winaqiʼ, rijeʼ kikanon kityoxiʼ richin nkiyaʼ kiqʼij. Ja kʼa ri Biblia nchʼon chi rij jun Dios ri «janila nïm ruqʼij chi kiwäch chʼaqa chik dios» (2 Crónicas 2:5). ¿Achike rijaʼ? chuqaʼ, ¿achike nbʼanon chi re chi más ruqʼij chi kiwäch ri chʼaqa chik dioses ri nyaʼöx kiqʼij? Tawetamaj chupam re tanaj reʼ achike nrajoʼ ri Dios chi nawetamaj rat chi rij rijaʼ.
1. ¿Achike rubʼiʼ ri Dios y achike ruma qetaman chi rijaʼ nrajoʼ chi röj nqetamaj ri rubʼiʼ?
Ri Dios nukusaj ri Biblia richin nuqʼalajrisaj achike qas rijaʼ. Rijaʼ nubʼij: «Yin Jehová; ja reʼ ri nubʼiʼ» (tasikʼij Isaías 42:5, 8). Ri bʼiʼaj Jehová elesan chupam ri chʼabʼäl hebreo, kʼïy etamanelaʼ nkibʼij chi ri bʼiʼaj riʼ nel chi tzij «rijaʼ nubʼän chi nbʼanatäj». Ri Jehová nrajoʼ chi röj nqetamaj ri rubʼiʼ (Éxodo 3:15). ¿Achike ruma nqabʼij reʼ? Ruma rijaʼ xubʼän chi xtzʼibʼäx más 7,000 mul ri rubʼiʼ chupam ri Biblia. a «Ri Jehová kan ja rijaʼ ri rajaw ri kaj y ri ruwachʼulew y kan man jun chik achiʼel rijaʼ» (Deuteronomio 4:39).
2. ¿Achike nutzijoj ri Biblia chi qe chi rij ri Jehová?
Ri Biblia nubʼij chi, chi kikojöl konojel ri dioses ri nyaʼöx kiqʼij, xa xe ri Jehová ri qitzij Dios. ¿Achike ruma? E kʼo kʼïy achoj ruma. Ri Jehová ja riʼ ri kʼo más ruqʼij chuwäch ronojel chuqaʼ «kan xa xe rijaʼ nqʼaton tzij pa ruwiʼ ri ruwachʼulew» (tasikʼij Salmo 83:18). Rikʼin rijaʼ kʼo ri «nimaläj uchuqʼaʼ», reʼ nel chi tzij chi kʼo ronojel ri uchuqʼaʼ pa ruqʼaʼ richin nubʼän xa bʼa achike na nrajoʼ rijaʼ. Rijaʼ chuqaʼ xbʼanon ronojel: ri universo chuqaʼ ronojel ri kʼo rukʼaslem chuwäch ri Ruwachʼulew (Apocalipsis 4:8, 11). Ri Jehová kan jantapeʼ wi kʼo pe chuqaʼ jantapeʼ xtkʼojeʼ wi (Salmo 90:2).
TQANIKʼOJ RIJ
Tqatzʼetaʼ achike ruma man junan ta ri jalajöj rubʼanik nbʼïx chi re ri Dios rikʼin ri rubʼiʼ, jun bʼiʼaj ri xa xe richin rijaʼ. Chuqaʼ xtqetamaj achike rubʼanik nukʼüt ri rubʼiʼ chi qawäch y achike ruma nrajoʼ chi tqetamaj ri rubʼiʼ.
3. Jalajöj rubʼanik nbʼïx chi re ri Dios, ja kʼa xa xe jun rubʼiʼ ri kʼo
Richin nqatzʼët chi man junan ta ri jalajöj rubʼanik nbʼïx chi re jun winäq rikʼin nsikʼïx rubʼiʼ, titzʼetaʼ ri VIDEO chuqaʼ kixchʼon chi rij reʼ:
-
¿Achike ruma man junan ta ri rubʼiʼ jun winäq rikʼin jun tzij ri nbʼïx chi re, achiʼel ajaw?
Ri Biblia nubʼij chi ri winaqiʼ nkiyaʼ kiqʼij jalajöj kiwäch taq dioses. Tisikʼij Salmo 136:1-3 chuqaʼ kixchʼon chi rij reʼ:
-
¿Achike ri «Dios ri kʼo más nïm ruchuqʼaʼ pa kiwiʼ ri chʼaqa chik dios»?
4. Ri Jehová nrajoʼ chi nawetamaj rubʼiʼ chuqaʼ nakusaj
¿Achike ruma nqabʼij chi ri Jehová nrajoʼ chi rat nawetamaj ri rubʼiʼ? Titzʼetaʼ ri VIDEO chuqaʼ kixchʼon chi rij reʼ:
-
¿Achike ruma nabʼij chi ri Jehová nrajoʼ chi netamäx ta rubʼiʼ?
Ri Jehová nrajoʼ chi ri winaqiʼ nkikusaj ri rubʼiʼ. Tisikʼij Romanos 10:13 TNM chuqaʼ kixchʼon chi rij reʼ:
-
¿Achike ruma janila rejqalem nqakusaj ri rubʼiʼ ri Dios?
-
¿Achike nanaʼ toq jun winäq ri nchʼon awikʼin nukusaj ri abʼiʼ?
-
¿Achike nunaʼ ri Jehová toq rat nakusaj ri rubʼiʼ?
5. Ri Jehová nrajoʼ chi rat yatok rachibʼil
Jun ixöq aj Camboya rubʼiʼ Soten xubʼij chi ri nawetamaj rubʼiʼ ri Dios jun chi ke ri nuyaʼ más kikotem pa akʼaslem. Titzʼetaʼ ri VIDEO chuqaʼ kixchʼon chi rij reʼ:
-
Achiʼel xqatzʼët pa video, ¿achike utzil xukʼäm pe chi re ri Soten toq xretamaj rubʼiʼ ri Dios?
Toq nawajoʼ yatok rachibʼil jun winäq, ja ri rubʼiʼ nabʼey kʼo chi nawetamaj. Tisikʼij Santiago 4:8a chuqaʼ kixchʼon chi rij reʼ:
-
¿Achike nrajoʼ ri Jehová chi nabʼän rat?
-
¿Nabʼij rat chi ri nawetamaj chuqaʼ nakusaj ri rubʼiʼ ri Dios ntikïr yarutoʼ richin más yajel apo rikʼin? ¿Achike ruma?
E KʼO JUJUN NKIBʼIJ REʼ: «Ri Dios majun rubʼiʼ ta, xa bʼa achike na bʼiʼaj yojtikïr nqakusaj».
-
¿Nanimaj rat chi Jehová rubʼiʼ ri Dios?
-
¿Achike rubʼanik naqʼalajrisaj chi ke ri chʼaqa chik chi ri Dios nrajoʼ chi nqakusaj ri rubʼiʼ?
TQAKAMULUJ
Jehová rubʼiʼ ri qitzij Dios. Rijaʼ nrajoʼ chi nqetamaj ri rubʼiʼ chuqaʼ nqakusaj richin yojtikïr yojok rachibʼil.
Ri xawetamaj
-
¿Achike ruma man junan ta ri Jehová kikʼin ri chʼaqa chik dioses ri nyaʼöx kiqʼij?
-
¿Achike ruma ütz nqakusaj rubʼiʼ ri Dios?
-
¿Nrajoʼ ri Jehová chi rat yatok rachibʼil? ¿Achike ruma awetaman riʼ?
RICHIN NAWETAMAJ MÁS
Tatzʼetaʼ woʼoʼ naʼoj ri nkikʼüt chi ri Dios kan kʼo wi.
Tatz’eta’ achike ruma ütz nqanimaj chi ri Dios majun achike ta ri xb’anon richin.
«¿Achike ri xbʼanon richin ri Dios?» (La Atalaya, 1 de agosto de 2014)
Tatzʼetaʼ achike ruma kʼo chi nqakusaj ri rubʼiʼ ri Dios stapeʼ majun qetaman ta achike rubʼanik nbʼïx ri rubʼiʼ ojer kan.
¿Kʼo rejqalem nqakusaj rubʼiʼ ri Dios? Tatzʼetaʼ achike ruma nqabʼij chi ri Dios xa xe kʼo jun rubʼiʼ.
a Chupam ri apéndice A4 chi re ri La Biblia. Traducción del Nuevo Mundo xtawetamaj más chi rij ri achike nel chi tzij ri rubʼiʼ ri Dios chuqaʼ achike ruma chupam chʼaqa chik Biblias elesan kan ri bʼiʼaj riʼ.
