ISHOMO RYA 04
Ruhanga ni oha?
Kwiha omu bwire bwa kare abantu bakaba nibaramya ba Ruhanga bingi b’ebishuba. Konka Bibuli negamba ku hariho Ruhanga omwe ‘ori kukira ba ruhanga bona.’ (2 Obusingye 2:5) Ruhanga ogo ni oha? Kandi shi ni enki ekiri kutuma yakira abandi ba ruhanga bona abu abantu bari kuramya? Omuri eri ishomo orebe oku Ruhanga ari kwenda ngu omumanye.
1. Izina rya Ruhanga ni riha, kandi shi ni enki ekiri kwereka ku ari kwenda ngu omumanye?
Ruhanga akoresize Bibuli natumanyisa owu ari we. Nagira ngu: ‘Ni inye Yehova.’ (Shoma omu Kuruga 6:2, 3.) “Yehova” ni izina eryahindwirwe kuruga omu Ruheburaayo eriri kumanyisa ngu, “natuma byabaho.” Yehova nayenda ngu tumanye izina ryeye. (Okutandika 3:15) Eco nitukimanya tuta? Omuri Bibuli izina rya Ruhanga nirirebekamu emirundi eri kurenga 7,000! * Izina Yehova ni izina rya ‘Ruhanga omwe ow’amazima’ omu iguru n’omu nsi.—Yohaana 17:3.
2. Ni enki eki Bibuli eri kutugambira ahari Yehova?
Bibuli netugambira ku omuri ba ruhanga bona abari kuramibwa, Yehova ari we Ruhanga wenka ow’amazima. Ahabw’enki? Hariho enshonga nyingi. Yehova ni Owobushoborozibwona kandi ni we wenka ‘orikukira bona kandi otegeka ensi yona.’ (Shoma omuri Zaaburi ya 83:18.) Ni ‘Owobushoborozibwona’ ekiri kumanyisa ku ayine amani g’okukora cona eki ari kwenda. Akahanga ebintu byona eby’omu iguru n’eby’omu nsi. (Okushuuruurwa 4:8, 11) Yehova ni we wenka owabireho kuruga kare kandi nayija kubaho ebiro byona.—Zaaburi 90:2.
YEGA BYINGI
Shwijuma entanisa eri ahagati y’amazina ga Ruhanga g’ekitinisa n’izina ryeye bwite, rero orebe oku yarikumanyisize n’enshonga ahabw’enki yarikumanyisize.
3. Ruhanga ayine amazina mingi g’ekitinisa, konka ayine izina bwite rimwe
Waba ori kwenda kumanya entanisa eri ahagati y’izina ry’ekitinisa n’izina bwite, Zana VIDIYO, rero muganire ahari eki kibuzo.
-
Ni eha ntanisa eri ahagati y’amazina g’ekitinisa nka “Mukama” n’izina bwite?
Bibuli negamba ku abantu bari kuramya ba ruhanga bingi n’abakama bingi. Shoma omu Ky’Ebiragiro 10:17, rero muganire ahari eki kibuzo:
-
‘Ruhanga wa ba ruhanga’ kandi ‘Omukama w’abakama’ ni oha?
4. Yehova nayenda ngu omanye izina ryeye kandi orikorese
Ni enki ekiri koreka ku Yehova ari kwenda ngu omanye izina ryeye? Zana VIDIYO, rero muganire ahari ebi bibuzo.
-
Mbehi notekateka ngu Yehova nayenda ngu abantu bamanye izina ryeye? Ahabw’enki?
Yehova nayenda ngu abantu bakorese izina ryeye. Shoma omu Barooma 10:13, rero muganire ahari ebi bibuzo:
-
Ni guha mugasho oguri omu kukoresa izina rya Ruhanga, Yehova?
-
Noyehurira ota omuntu yayijuka izina ryawe kandi akarikoresa?
-
Notekateka ngu Yehova nayehurira ata wakoresa izina ryeye?
5. Yehova nayenda ngu omuhike hihi
Omukazi ori kwetwa Soten w’omuri Kambodiya akagamba ku okumanya Yehova catumire yatunga “okushemererwa oku yabire atakatungagaho.” Zana VIDIYO, rero muganire ahari eki kibuzo.
-
Nk’oku wakireba omuri vidiyo, Soten akagasirwa ata ku yamanyire izina rya Ruhanga?
Waba ori kwenda kuba munywani w’omuntu ec’okubanza eki ori kukora n’okumanya izina ryeye. Shoma omuri Yakobo 4:8a, rero muganire ahari ebi bibuzo:
-
Ni enki eki Yehova ari kwenda ngu okore?
-
Ni bata oku kumanya izina rya Ruhanga n’okurikoresa kiri kukukwasa kumuhika hihi?
ABANTU ABAMWE NIBAGAMBA NGU: “Hariho Ruhanga omwe, obwe rero ti kibi kumweta oku ori kwenda.”
-
Mbehi noyikiriza ku Yehova ari ryo izina rya Ruhanga?
-
Ni bata oku ori kubasa kushobororera omuntu ku Ruhanga ari kwenda ngu tukorese izina ryeye?
EMPINYE
Yehova ni izina rya Ruhanga wenka ow’amazima. Nayenda ngu turimanye kandi turikorese kugira ngu tumuhike hihi.
Wayega ki?
-
Ni bata oku Yehova ari kutana ahari ba ruhanga bona abu abantu bari kuramya?
-
Ahabw’enki tushemerire kukoresa izina rya Ruhanga?
-
Ni enki ekiri kwereka ku Yehova ari kwenda ngu tumuhike hihi?
CONDOZA
Shwijuma enshonga itano eziri kwereka ku Ruhanga ariho.
Yetegereze enshonga ahabw’enki kwikiriza ku Ruhanga ariho kiri ec’obwenge.
“Ni oha owahangire Ruhanga?” (Omunara g’Omurinzi, gw’aha kiro ca 1 Okwamunana, 2014)
Yega enshonga ahabw’enki tushemerire kukoresa izina rya Ruhanga n’obu tutari kumanya oku ryabire riri kugambwa omu bwire bwa kare.
Mbehi kweta Ruhanga izina eri ari ryo ryona kine enshonga? Reba enshonga ahabw’enki turi kubasa kugamba ku ayine izina rimwe bwite.
^ Waba ori kwenda okumanya byingi aha bikwatirine n’eki izina rya Ruhanga riri kumanyisa n’enshonga ahabw’enki abahinduzi baryihire omuri Bibuli, reba Appendix A4 omuri Bibuli y’Obuhinduzi bw’ensi ensya.
