CAWN DINGMI 04
Pathian Cu Ahodah A Si?
Minung nih chankhat hnu chankhat in pathian tampi le khuazingnu tampi kha an biak hna. Asinain Baibal nih ‘pathian vialte hna nakin a ngan deuhmi’ Pathian pakhat kong kha a langhter. (2 Chanrelnak 2:5) Mah cu ahodah a si? Mi nih an biakmi pathian vialte nakin zeicah a ngan deuh? Mah Pathian nih a kong zeitindah a phuan ti kha mah cawn dingmi ah hlathlai.
1. Pathian min cu ahodah a si? A min hngal hna seh ti a duh kha zeitindah kan hngalh khawh?
Pathian nih Baibal hmangin a kong kha a kan chimh. Hitin a ti: “Keimah lawnglawng hi BAWIPA [Jehovah, NW] na Pathian cu ka si.” (Isaiah 42:5, 8 rel.) “Jehovah” timi Hebru min i a sullam cu “A Hung Siter” ti a si. Jehovah nih a min kha hngal hna seh ti a kan duh. (Exodus 3:15) Mah cu zeitindah kan hngalh khawh? Baibal ah Pathian min voi 7,000 leng aa tel. a Jehovah timi min a ngeimi Pathian cu “vancung ah khin le vawleicung ah hin Pathian a si.”—Deuteronomi 4:39.
2. Baibal nih Jehovah kong he aa tlaiin zeidah a phuan?
Minung nih an biakmi pathian vialte lakah Jehovah lawng hi a hmaanmi Pathian a si tiah Baibal nih a ti. Zeicah? A ruang tampi a um. Jehovah cu nawl a ngei bikmi a si i amah lawng hi “vawlei dihlak uktu Cungnung Bik” a si. (Salm 83:18 rel.) Anih cu a duhmi paoh tuah khawhnak ṭhawnnak a ngeih caah Baibal nih “Lianngan Bik” tiah a ti. Van le vawlei ah a ummi “zeizong vialte kha” amah nih a ser. (Biathlam 4:8, 11) Aho he hmanh i lo loin Jehovah cu a rak um zungzal i hmailei zongah a um zungzal lai.—Salm 90:2.
TAM DEUH IN HLATHLAI
Pathian i upatnak a min hna le aa thleidangmi a min aa dannak kong kha hlathlai. Cun a min kha zeitin le zeicah a phuan timi kong zong kha hlathlai.
3. Pathian cu upatnak min a phunphun a ngei ko nain a min cu pakhat lawng a si
Upatnak min le min taktak aa dannak kong kha hngalh awkah, VIDEO kha piah, cun a tanglei biahalnak hna hi i ruah u.
-
“Bawipa” timi upatnak min le a min aa dannak cu zeidah a si?
Mi nih pathian tampi le bawipa tampi kha an biak hna tiah Baibal nih a ti. Salm 136:1-3 rel law mah biahalnak hi i ruah u:
-
“Pathian hna Pathian” le “bawi vialte Bawipa” cu ahodah a si?
4. Jehovah nih a min kha hngal hna sehlaw hmang hna seh ti a duh
Jehovah nih a min hngalhter aan duh ti kha zeinihdah a langhter? VIDEO kha piah, cun a tanglei biahalnak hna hi i ruah u.
-
Jehovah nih a min hngalhter a kan duh tiah na ruat maw? Zeicah?
Jehovah nih a min kha hmang hna seh ti a duh. Rom 10:13 rel law mah biahalnak hna hi i ruah u:
-
Jehovah Pathian min hman cu zeitlukin dah a biapit?
-
Mi pakhat nih na min kha aa cinken i a hman tikah zeitindah na um?
-
A min na hman tikah Jehovah cu zeitindah a um lai tiah na ruah?
5. Jehovah nih amah he naihter aan duh
Cambodia ah a ummi Soten timi nu nih “Pathian min ka hngalh caah kaa nuam tuk” tiah a ti. VIDEO kha piah, cun a tanglei biahalnak hi i ruah u.
-
Mah video ah Pathian min cawn cu Soten cungah zeitindah huham a ngeih?
Mi pakhat he hawikom nan si hlanah a min kha na hngalh hmasa a hau. Jeim 4:8a rel, cun mah biahalnak hna hi i ruah u:
-
Jehovah nih zei tuah awkah dah aan sawm?
-
Pathian min hngalhnak le hmannak nih amah he i naih deuh awkah zeitindah aan bawmh?
MI CHEUKHAT CHIMMI: “Pathian cu pakhat lawng a si caah zeitin na auh hmanhah a poi lo.”
-
Pathian min cu Jehovah a si tiah na zum maw?
-
Pathian nih a min hmanter a kan duh ti kha zeitindah na fianter lai?
A TAWINAK
Jehovah timi cu a hmaanmi Pathian i a min a si. A min kha hngal hna sehlaw hmang hna seh ti a kan duh. Cuticun amah he kan i naih kho.
I Ruahṭi Ṭhannak
-
Jehovah cu mi nih an biakmi pathian vialte he zeitindah aa thleidan?
-
Pathian min kha zeicah kan hman awk a si?
-
Jehovah nih amah he naihter aan duh ti kha zeinihdah a langhter?
HLATHLAI CHAP
Pathian a um ti kan zumh khawhnak a ruang panga kha hlathlai.
Pathian a um zungzal ti zumh cu zeicah aa tlak timi kong kha hlathlai.
A hrampi Pathian min aw chuah ning kan hngalh lo hmanhah zeicah Pathian min kan hman awk a si ti kha hlathlai.
Pathian tiah kan auhmi cu a poi maw? Pathian cu pumpak min pakhat lawng a ngei tiah kan chim khawhnak a ruang kha hlathlai.
a Pathian min sullam le Baibal lehmi cheukhat ah zeicah Pathian min an telh lo timi kong he aa tlaiin tam deuh in hngalh awkah Hlathlainak Ca Lamhruainak ah zoh.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
