UKPEPN̄KPỌ 04
Anie Edi Ata Abasi?
Toto ke eset mme owo ẹkpono nsio nsio abasi. Edi Bible etịn̄ ke enyene Abasi emi “okponde akan kpukpru mme abasi eken.” (2 Chronicle 2:5) Ewe Abasi idi oro? Nso inam enye okpon akan mme abasi eken? Ke ukpepn̄kpọ emi, ọyọdiọn̄ọ ediwak n̄kpọ aban̄a Abasi oro.
1. Abasi ekere didie, ndien nso iwụt ke enye oyom nnyịn idiọn̄ọ ata enyịn̄ imọ?
Abasi asiak enyịn̄ esie ọnọ nnyịn ke Bible. Enye ọdọhọ ete: “Ami ndi Jehovah. Enyịn̄ mi edi oro.” (Kot Isaiah 42:5, 8.) Enyịn̄ oro “Jehovah” oto ikọ Hebrew emi ekemede ndiwọrọ, “Enye Anam Akabade Edi.” Jehovah oyom nnyịn idiọn̄ọ enyịn̄ imọ. (Exodus 3:15) Nso inam idọhọ ntre? Enye ama esịn enyịn̄ esie ebe itie 7,000 ke Bible! a Jehovah edi enyịn̄ “ata Abasi ke enyọn̄ ye ke isọn̄.”—Deuteronomy 4:39.
2. Nso ke Bible etịn̄ aban̄a Jehovah?
Bible ọdọhọ ke Jehovah kpọt edi ata Abasi ke otu kpukpru mme abasi oro mme owo ẹkponode. Nso inam Bible ọdọhọ ntre? Awak ntak. Jehovah enyene odudu akan; enye “ikpọn̄ edi Ata Edikon̄ ke ofụri isọn̄.” (Kot Psalm 83:18.) Enye edi “Ata Ọkpọsọn̄” Abasi sia enye kpọt ekeme ndinam se ededi emi enye oyomde. Enye ‘okobot kpukpru n̄kpọ’—ofụri ekondo ye kpukpru n̄kpọ ke isọn̄. (Ediyarade 4:8, 11) Enye itiehe nte owo, sia enye inyeneke ntọn̄ọ inyụn̄ inyeneke utịt.—Psalm 90:2.
SỊN IDEM KPEP
Se n̄kpọ emi owụtde ke ata enyịn̄ Abasi okpụhọde ye mme enyịn̄ eken emi mme owo ẹsikotde enye. Oyokụt ntak emi enye asiakde enyịn̄ esie ọnọ fi.
3. Abasi enyene ata enyịn̄ kiet
Se VIDIO emi man okụt ke ata enyịn̄ owo okpụhọde ye enyịn̄ ekededi oro ẹsikotde owo; ekem ẹbọrọ mbụme emi ẹnyụn̄ ẹneme ẹban̄a enye.
-
Nso inam ndikot Abasi “Ọbọn̄” okpụhọde ye ndikot ata enyịn̄ esie?
Bible ọdọhọ ke mme abasi ẹwak. Kot Psalm 136:1-3, ekem ẹbọrọ mbụme emi ẹnyụn̄ ẹneme ẹban̄a enye:
-
Anie idi “Abasi mme abasi” ye “Ọbọn̄ mme mbọn̄”?
4. Jehovah oyom fi ọdiọn̄ọ enyịn̄ imọ onyụn̄ esikot imọ ke enyịn̄
Nso iwụt ke Jehovah oyom fi ọdiọn̄ọ enyịn̄ imọ? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ndi emekere ke Jehovah oyom mme owo ẹdiọn̄ọ enyịn̄ esie? Nso inam ọdọhọ ntre?
Jehovah enen̄ede oyom mme owo ẹsikot enyịn̄ esie. Kot Rome 10:13, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ntak emi ekpesikotde ata enyịn̄ Abasi, Jehovah?
-
Esitie fi didie owo ama eti enyịn̄ fo?
-
Ndi emekere ke esinem Jehovah afo ama okot enyịn̄ esie?
5. Jehovah oyom fi enen̄ede ekpere imọ
Mma kiet emi otode Cambodia, emi ekerede Soten, ọkọdọhọ ke enen̄ede enem imọ ndidiọn̄ọ ata enyịn̄ Abasi. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.
-
Se okopde ke vidio oro owụt ke Soten ada ndidiọn̄ọ ata enyịn̄ Abasi didie?
Edieke oyomde ndidi ufan ye owo, emesiyom ndidiọn̄ọ enyịn̄ esie. Kot James 4:8a, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ke Jehovah Abasi ọdọhọ fi anam?
-
Didie ke ndidiọn̄ọ ata enyịn̄ Abasi nnyụn̄ n̄kot enyịn̄ oro edinam fi ekpere Abasi?
NDUSỤK OWO ẸSIDỌHỌ ẸTE: “Abasi kiet odu, emekeme ndikot enye se amama.”
-
Ndi emenịm ke ata Abasi ekere Jehovah?
-
Didie ke akpanam an̄wan̄a owo ke Abasi oyom nnyịn isikot enyịn̄ imọ?
SE IKPEPDE
Ata Abasi ekere Jehovah. Enye oyom nnyịn idiọn̄ọ ata enyịn̄ esie, isinyụn̄ ikot enyịn̄ oro man inen̄ede ikpere enye.
Se M̀mê Emeti
-
Nso inam Jehovah okpụhọde ye kpukpru mme abasi eken?
-
Ntak emi ọfọnde isikot ata enyịn̄ Abasi?
-
Nso iwụt ke Jehovah oyom fi enen̄ede ekpere imọ?
KPEP N̄KPỌ EN̄WEN
Se n̄kpọ ition emi owụtde ke Abasi odu.
Nso iwụt ke owo ndinịm ke Abasi inyeneke ntọn̄ọ inyụn̄ inyeneke utịt iwọrọke ke owo oro edi ndisịme?
Se ntak ikpesikotde ata enyịn̄ Abasi kpa ye oro owo mîdiọn̄ọke nnennen usụn̄ emi ẹkesikotde enyịn̄ oro.
Ndi imekeme ndikot Abasi se imama? Se ntak emi ikemede ndidọhọ ke Abasi enyene ata enyịn̄ kiet.
a Okpoyom ndinen̄ede ndiọn̄ọ se enyịn̄ Abasi ọwọrọde, ye ntak emi enye mîsịneke ke ndusụk Bible, se page 1-5 ke n̄wed Se Idin̄wamde Fi Ekpep Ikọ Abasi.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
