ADZESUA 04
Woana Nye Nyankopɔn?
Sɛ yɛbɛka a, ofitsi adasamba ahyɛse no, nyimpa asom enyame pii. Naaso, Bible no ka Nyame bi ho asɛm dɛ ‘ɔso sen enyame nyinara.’ (2 Mbermunsɛm 2:5) Woana nye dɛm Nyame no? Na ebɛnadze na ɔma ɔyɛ kɛse sen enyame a wɔaka a nyimpa som hɔn no nyinara? Wɔ adzesua yi mu no, hwɛ mbrɛ dɛm Nyame yi da noho edzi kyerɛ wo mbrɛ ɔbɛyɛ a ibohu no yie.
1. Nyankopɔn ne dzin dze dɛn, na yesi dɛn hu dɛ ɔpɛ dɛ yehu ne dzin no ampa?
Nyankopɔn ada noho edzi akyerɛ hɛn wɔ Bible no mu. Ɔkaa dɛ: “Emi nye Jehovah.” (Kenkan Exodus 6:2, 3.) Hebrew dzin a wɔkyerɛ ase “Jehovah” no, ɔda edzi dɛ dza ɔkyerɛ nye “Nyia Ɔma Ɔyɛ Hɔ.” Jehovah pɛ dɛ yehu ne dzin no. (Exodus 3:15) Yɛyɛ dɛn hu dɛm? Nyankopɔn hwɛe hun dɛ ne dzin no epue wɔ Bible no mu bɔbor mpɛn 7,000! a Nyia dzin Jehovah no da no do no, ɔno na ɔyɛ nokwar “Nyankopɔn wɔ sor ɔsor nye asaase do famu.”—Deuteronomy 4:39.
2. Ebɛnadze na Bible no ma yehu fa Jehovah ho?
Bible no ka dɛ, wɔ enyame a nyimpa som hɔn no nyina mu no, Jehovah nkotsee na ɔyɛ nokwar Nyame no. Ebɛnadze ntsi a? Siantsir ahorow no dɔɔ so. Jehovah no tum krɔn sen obiara nedze, osiandɛ ɔno nkotsee nye “Ɔsorsornyi wɔ asaase nyinara do.” (Kenkan Ndwom 83:18.) Ɔyɛ adze nyina do “Tumfo,” osiandɛ ɔwɔ tum a obotum dze ayɛ biribiara a ɔpɛ dɛ ɔyɛ biara. Ɔno na ‘ɔbɔɔ adze nyina’—amansan no nye biribiara a nkwa wɔ mu wɔ asaase do. (Nyikyerɛ 4:8, 11) Obiara nnyi hɔ a ɔtse dɛ Jehovah, ɔno nkotsee na onnyi ahyɛse na onnyi ewiei.—Ndwom 90:2.
PƐNSAPƐNSA MU KƆ EKYIR
Nsonsonee da Nyankopɔn n’abɔdzin ahorow nye ne dzin a ɔda nsew no ntamu. Ma yɛnhwɛ iyi ho asɛm kakra. Afei so, yɛbɔhwɛ ɔkwan a Nyankopɔn afa do ada ne dzin no edzi akyerɛ wo, nye siantsir a ɔada no edzi akyerɛ wo.
3. Nyankopɔn wɔ abɔdzin ahorow pii, naaso ne dzin ankasa dze, ɔyɛ kortsee
Mbrɛ ɔbɛyɛ a ibohu nsonsonee a ɔda obi n’abɔdzin nye ne dzin ankasa ntamu no, ma yɛnhwɛ VIDEO no, na yensusu asɛmbisa a odzi do no ho.
-
Ebɛn nsonsonee na ɔda abɔdzin bi tse dɛ “Ewuradze” nye dzin ankasa bi ntamu?
Bible no ka dɛ nkorɔfo som enyame nye ewuranom pii. Ma yɛnkenkan Ndwom 136:1-3, na yensusu dɛm asɛmbisa yi ho:
-
Woana nye “enyame mu Nyame” nye “ewuranom Ewuradze” no?
4. Jehovah pɛ dɛ ihu ne dzin no na edze dzi dwuma
Isi dɛn hu dɛ Jehovah pɛ dɛ ihu ne dzin no? Ma yɛnhwɛ VIDEO no, na yensusu nsɛmbisa a odzidzi do no ho.
-
Ehwɛ a, Jehovah pɛ dɛ yehu ne dzin a? Ebɛnadze ntsi na ereka dɛm?
Jehovah pɛ dɛ nkorɔfo dze ne dzin no dzi dwuma. Ma yɛnkenkan Romefo 10:13, na yensusu nsɛmbisa yi ho:
-
Ebɛnadze ntsi na no ho hia dɛ yɛdze Nyankopɔn ne dzin Jehovah no dzi dwuma?
-
Sɛ obi kaa wo dzin na ɔdze frɛ wo a, etse nka dɛn?
-
Ehwɛ a, sɛ yɛdze Jehovah so ne dzin no frɛ no anaa yɛdze dzi dwuma a, ɔtse nka dɛn?
5. Jehovah pɛ dɛ ebɛn no na efa no nyɛnko
Ɔbaa bi fi Cambodia, na wɔfrɛ no Soten. Ɔkaa dɛ Nyankopɔn ne dzin no a obohunii no maa ‘dɛw soronko bi bɛhyɛɛ n’akoma mu.’ Ma yɛnhwɛ VIDEO no, na yensusu asɛmbisa a odzi do no ho.
-
Wɔ video no mu no, Soten kaa dɛ aber a ohun Nyankopɔn ne dzin no, ebɛn nkantando na onyae wɔ no do?
Mpɛn pii no, ansaana ebɛfa obi nyɛnko no, idzi kan hu ne dzin. Ma yɛnkenkan James 4:8a, na yensusu nsɛmbisa yi ho:
-
Jehovah to nsa frɛ wo dɛ yɛ dɛn?
-
Sɛ ihu Nyankopɔn ne dzin na edze dzi dwuma a, ehwɛ a ebɛnadze ntsi na ɔno bɔboa wo ma aabɛn no?
BINOM KA DƐ: “Nyankopɔn kor pɛ na ɔwɔ hɔ, ntsi dzin biara a edze bɛfrɛ no no mmfa ho.”
-
Egye dzi dɛ Nyankopɔn ne dzin dze Jehovah a?
-
Ibesi dɛn akyerɛkyerɛ mu akyerɛ obi ma ɔaatse ase dɛ Nyankopɔn pɛ dɛ yɛdze ne dzin no dzi dwuma?
DZA ESUA
Nokwar Nyankopɔn no, ne dzin ankasa nye Jehovah. Ɔpɛ dɛ yehu dɛm dzin no na yɛdze dzi dwuma ama yeetum abɛn no na yaafa no nyɛnko.
Mbobɔdo
-
Ebɛnadze na ɔma Jehovah yɛ soronko fi enyame a wɔaka a nyimpa som hɔn no nyinara ho?
-
Ebɛnadze ntsi na ɔsɛ dɛ yɛdze Nyankopɔn ne dzin no dzi dwuma?
-
Ebɛnadze na ɔma ihu dɛ Jehovah pɛ dɛ ebɛn no?
HWEHWƐ PII KA HO
Hwɛ ndzɛmba etsitsir enum bi a odzi dase ampa dɛ Nyankopɔn wɔ hɔ.
Hwɛ siantsir a nyansa wɔ mu dɛ ebɛgye edzi dɛ Nyankopɔn wɔ hɔ fi tsetseetse, na onnyi ahyɛse.
Hwɛ siantsir a sɛ yennyim mbrɛ nna wosi bɔ Nyankopɔn ne dzin wɔ tsetse mber mu mpo a, ɔwɔ dɛ yɛdze dzin no dzi dwuma.
Aso ohia dɛ yɛdze dzin pɔtsee bi frɛ Nyankopɔn? Hwɛ siantsir a yebotum aka dɛ ne dzin ankasa yɛ kortsee.
a Sɛ epɛ dɛ ihu dza Nyankopɔn ne dzin no kyerɛ ho nsɛm pii nye siantsir a Bible nkyerɛase ahorow bi eyi dzin no efi hɔn Bible no mu a, hwɛ Appendix A4 a ɔwɔ New World Translation of the Holy Scriptures no mu no.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
