NIKASEMƆ 04
Namɔ Ji Anɔkwa Nyɔŋmɔ Lɛ?
Bei ni adesai kɛhi shi lɛ amli fɛɛ lɛ, amɛjá nyɔŋmɔi srɔtoi pii. Shi Biblia lɛ kɛɛ Nyɔŋmɔ kome ko yɛ ni “da fe nyɔŋmɔi krokomɛi fɛɛ.” (2 Kronika 2:5) Namɔ ni? Ni mɛni hãa efeɔ mɔ ni da fe nyɔŋmɔi krokomɛi fɛɛ ni mɛi jáa lɛ? Yɛ nikasemɔ nɛɛ mli lɛ, obaana nɔ ni Nyɔŋmɔ nɛɛ miitao ole yɛ ehe.
1. Te atsɛɔ Nyɔŋmɔ tɛŋŋ, ni mɛni tsɔɔ akɛ eesumɔ ni wɔle egbɛ́i lɛ?
Nyɔŋmɔ ehã wɔle mɔ ni eji yɛ Biblia lɛ mli. Ekɛɛ: “Miji Yehowa. Migbɛ́i ji no.” (Kanemɔ Yesaia 42:5, 8.) Biblia he nilelɔi pii kɛɔ akɛ, Hebri gbɛ́i ni atsɔɔ shishi akɛ “Yehowa” lɛ shishi ji, “Ehãa Etsɔɔ” loo “Ehãa Nɔ Fɛɛ Nɔ Ni Kɔɔ Eyiŋtoo He Lɛ Baa Mli.” Nyɔŋmɔ miisumɔ ni wɔle egbɛ́i Yehowa lɛ. (2 Mose 3:15) Mɛni tsɔɔ nakai? Ehã atsĩ egbɛ́i lɛ tã yɛ Biblia lɛ mli nɔ ni fa fe shii 7,000 sɔŋŋ! a “Anɔkwa Nyɔŋmɔ ni yɔɔ ŋwɛi shɔŋŋ kɛ shikpɔŋ ni yɔɔ shishi lɛ nɔ lɛ” gbɛ́i ji Yehowa.—5 Mose 4:39.
2. Mɛni Biblia lɛ kɛɔ wɔ yɛ Yehowa he?
Biblia lɛ kɛɔ akɛ, yɛ nyɔŋmɔi fɛɛ ni adesai jáa lɛ ateŋ lɛ, Yehowa ji anɔkwa Nyɔŋmɔ koome lɛ. Mɛni hewɔ? Naa otii ahewɔ ni eji nakai. Yehowa ji nɔyelɔ ni fe fɛɛ, ni ekome too ji “Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.” (Kanemɔ Lala 83:18.) Lɛ ji “Ofe lɛ,” ni tsɔɔ akɛ, eyɛ hewalɛ ni ebaanyɛ ekɛfee nɔ fɛɛ nɔ ni esumɔɔ. Lɛ ‘ebɔ nibii fɛɛ’—nibii fɛɛ ni yɔɔ ŋwɛi kɛ shikpɔŋ lɛ nɔ lɛ. (Kpojiemɔ 4:8, 11) Yehowa kome too pɛ ehi shi daa, ni ebaahi shi kɛya naanɔ.—Lala 90:2.
KASEMƆ PII OFATA HE
Obaana srɔto ni yɔɔ Nyɔŋmɔ gbɛnaa gbɛ́ii lɛ kɛ egbɛ́i ni nɔ bɛ lɛ teŋ. Obaana gbɛ ni etsɔ nɔ ehã ale egbɛ́i lɛ, kɛ nɔ hewɔ ni efee nakai lɛ hu.
3. Nyɔŋmɔ yɛ gbɛnaa gbɛ́ii pii, shi eyɛ gbɛ́i kome pɛ
Bɔ ni afee ni ona srɔto ni yɔɔ gbɛnaa gbɛ́i kɛ gbɛ́i diɛŋtsɛ teŋ lɛ, jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛɛ srɔto yɔɔ gbɛnaa gbɛ́i tamɔ “Nuŋtsɔ,” kɛ gbɛ́i diɛŋtsɛ teŋ?
Biblia lɛ kɛɛ adesai jáa nyɔŋmɔi kɛ nuŋtsɔmɛi pii. Nyɛkanea Lala 136:1-3 lɛ, ni nyɛsusua sanebimɔ nɛɛ he:
-
Namɔ ji “nyɔŋmɔi a-Nyɔŋmɔ” kɛ “nuŋtsɔmɛi a-Nuŋtsɔ lɛ”?
4. Yehowa miisumɔ ni ole egbɛ́i lɛ ni okɛtsɛ lɛ
Mɛni tsɔɔ akɛ Yehowa miisumɔ ni ole egbɛ́i lɛ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Ani osusuɔ akɛ Yehowa miisumɔ ni ale egbɛ́i lɛ? Mɛni hewɔ?
Yehowa miisumɔ ni mɛi kɛ egbɛ́i lɛ atsɛ lɛ. Nyɛkanea Romabii 10:13 lɛ, ni nyɛsusua sanebimɔi nɛɛ ahe:
-
Mɛni hewɔ ehe hiaa waa ni wɔkɛ Nyɔŋmɔ gbɛ́i Yehowa lɛ atsɛ lɛ lɛ?
-
Kɛ́ mɔ ko kai ogbɛ́i ni ekɛtsɛ bo lɛ, te onuɔ he ohãa tɛŋŋ?
-
Kɛ́ okwɛ lɛ, kɛ́ okɛ Yehowa gbɛ́i lɛ tsɛ lɛ lɛ, te ebaanu he ehã tɛŋŋ?
5. Yehowa miisumɔ ni obatsɔ enaanyo
Yoo ko ni jɛ Cambodia ni atsɛɔ lɛ Soten lɛ kɛɛ, Nyɔŋmɔ gbɛ́i lɛ ni ená ele lɛ “ji nɔ ko ni he hiaa fe fɛɛ yɛ shihilɛ mli.” Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Te Soten nu he ehã tɛŋŋ be ni ená ele Nyɔŋmɔ gbɛ́i lɛ?
Bei pii lɛ, oleɔ mɔ ko gbɛ́i dani ebatsɔɔ onaanyo. Nyɛkanea Yakobo 4:8a lɛ, ni nyɛsusua sanebimɔi nɛɛ ahe:
-
Mɛni Yehowa fɔ̃ɔ bo nine ni ofee?
-
Kɛ́ ole Nyɔŋmɔ gbɛ́i ni okɛtsɛ lɛ lɛ, mɛɛ gbɛ nɔ no baahã otsɔ enaanyo?
MƐI KOMƐI KƐƆ AKƐ: “Nyɔŋmɔ koome pɛ yɔɔ, hewɔ lɛ, ehe ehiaaa ni akɛ gbɛ́i pɔtɛɛ ko atsɛ lɛ.”
-
Ani oheɔ oyeɔ akɛ Nyɔŋmɔ gbɛ́i ji Yehowa?
-
Mɛni hewɔ osusuɔ akɛ Nyɔŋmɔ miisumɔ ni akɛ egbɛ́i lɛ atsɛ lɛ lɛ?
EMLI OTI
Yehowa ji anɔkwa Nyɔŋmɔ koome lɛ gbɛ́i. Eesumɔ ni wɔle egbɛ́i lɛ ni wɔkɛtsɛ lɛ, koni wɔbatsɔ enaanyo.
Mɛni Okase?
-
Mɛɛ gbɛ nɔ esoro Yehowa yɛ nyɔŋmɔi krokomɛi fɛɛ ni mɛi jáa lɛ ahe?
-
Mɛni hewɔ esa akɛ wɔkɛ Nyɔŋmɔ gbɛ́i lɛ atsɛ lɛ lɛ?
-
Mɛni tsɔɔ akɛ Yehowa miisumɔ ni otsɔ enaanyo?
EHE SAJI KROKOMƐI
Obaana otii enumɔ ni baahã ohe oye akɛ Nyɔŋmɔ yɛ.
Obaana nɔ hewɔ ni nilee yɔɔ mli akɛ obaahe oye akɛ Nyɔŋmɔ ehi shi daa lɛ.
Obaana nɔ hewɔ ni esa akɛ wɔkɛ Nyɔŋmɔ gbɛ́i lɛ atsɛ lɛ, kɛ́ wɔleee bɔ ni atsɛ lɛ ahã yɛ blema po.
Ani ehe hiaa ni wɔkɛ gbɛ́i ko atsɛ Nyɔŋmɔ? Obaana nɔ hewɔ ni eyɔɔ gbɛ́i kome pɛ lɛ.
a Kɛ́ ootao ole saji krokomɛi ni kɔɔ Nyɔŋmɔ gbɛ́i lɛ shishinumɔ lɛ he, kɛ nɔ hewɔ ni gbɛ́i nɛɛ bɛ Biblia shishitsɔɔmɔi komɛi amli lɛ, ofainɛ, kwɛmɔ Saji Krokomɛi A4 ni yɔɔ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ mli lɛ.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
